શું UAE છૂપી રીતે ઈરાન સાથેના યુદ્ધમાં જોડાયું? રિપોર્ટના ચોંકાવનારા દાવાએ મચાવ્યો ખળભળાટ
મિડલ-ઈસ્ટનું રાજકારણ હંમેશા ગૂંચવણભર્યું રહ્યું છે, પરંતુ તાજેતરમાં આવેલા એક રિપોર્ટે સમગ્ર વિશ્વનું ધ્યાન ખેંચ્યું છે. અહેવાલ મુજબ, સંયુક્ત આરબ અમીરાત (UAE) એ અત્યંત ગુપ્ત રીતે આ ક્ષેત્રીય યુદ્ધમાં એન્ટ્રી કરી છે અને ઈરાન પર સીધા હુમલા કર્યા છે. આ દાવાએ માત્ર આરબ દેશોમાં જ નહીં, પરંતુ વૈશ્વિક રાજદ્વારી સ્તરે પણ હલચલ મચાવી દીધી છે. અત્યાર સુધી UAE આ સંઘર્ષમાં પરોક્ષ રીતે સામેલ હોવાનું મનાતું હતું, પરંતુ હવે તે અમેરિકા અને ઈઝરાયેલની જેમ સીધું સહભાગી બન્યું હોવાનું જણાય છે.
લાવાન ટાપુ પરની રિફાઇનરીને નિશાન બનાવી
રિપોર્ટમાં સૂત્રોના હવાલેથી દાવો કરવામાં આવ્યો છે કે, એપ્રિલની શરૂઆતમાં જ્યારે અમેરિકી પ્રમુખ ડોનાલ્ડ ટ્રમ્પ પાંચ અઠવાડિયાના હવાઈ હુમલા બાદ યુદ્ધવિરામની જાહેરાત કરવાની તૈયારીમાં હતા, બરાબર તે જ સમયે UAE ના દળોએ ઈરાનના લાવાન ટાપુ પર આવેલી એક મહત્વની ઓઈલ રિફાઇનરીને નિશાન બનાવી હતી.
ઈરાનના સરકારી પ્રસારણકર્તા IRIB ના જણાવ્યા અનુસાર, 8 એપ્રિલની સવારે આ ‘કાયરતાપૂર્ણ’ હુમલો કરવામાં આવ્યો હતો. લાવાન રિફાઇનરી ઈરાન માટે આર્થિક રીતે અત્યંત મહત્વની છે, જ્યાં દરરોજ આશરે 60,000 બેરલ કાચું તેલ પ્રોસેસ કરવામાં આવે છે. આ હુમલો એ સંકેત હતો કે UAE હવે ઈરાન સામે આક્રમક વલણ અપનાવવા તૈયાર છે.
અમેરિકાનું મૌન સમર્થન
નવી દિલ્હી કે વોશિંગ્ટન, દરેક દેશની નજર આ વિસ્તાર પર છે. રસપ્રદ વાત એ છે કે, અમેરિકાએ યુએઈના આ પગલાનું છૂપી રીતે સ્વાગત કર્યું છે. વોશિંગ્ટનના સૂત્રોના જણાવ્યા મુજબ, અમેરિકાને આ હુમલાઓ સામે કોઈ વાંધો નહોતો કારણ કે તે સમયે યુદ્ધવિરામ સંપૂર્ણપણે લાગુ થયો નહોતો. અમેરિકા ઈચ્છે છે કે ખાડી દેશો પણ આ પ્રાદેશિક સુરક્ષામાં સક્રિય ફાળો આપે, અને યુએઈનો આ હુમલો તે દિશામાં એક મોટું પગલું માનવામાં આવે છે.
ઈરાનનો વળતો પ્રહાર: યુએઈ પર મિસાઈલ વર્ષા
યુએઈના હુમલાના જવાબમાં ઈરાને પણ શાંત બેસવાનું પસંદ ન કર્યું. રિપોર્ટ અનુસાર, ઈરાને યુએઈના પ્રદેશો, એરપોર્ટ અને અન્ય મહત્વના ઈન્ફ્રાસ્ટ્રક્ચરને નિશાન બનાવીને 2,800 થી વધુ મિસાઈલો અને ડ્રોન છોડ્યા હતા. યુએઈના વિદેશ મંત્રાલયે જાહેરમાં ઈરાન પર હુમલાની વાત સ્વીકારી નથી, પરંતુ તેમણે સ્પષ્ટપણે કહ્યું છે કે દેશ પાસે દુશ્મનના કોઈપણ હુમલાનો જવાબ આપવાનો અને લશ્કરી કાર્યવાહી કરવાનો સંપૂર્ણ અધિકાર છે.
UAE ની આધુનિક વાયુસેના અને બદલાતી રણનીતિ
સુરક્ષા નિષ્ણાતોના મતે, યુએઈ પાસે મધ્ય-પૂર્વની સૌથી આધુનિક વાયુસેનાઓમાંની એક છે. તેમની પાસે ફ્રેન્ચ મિરાજ ફાઈટર જેટ્સ, અત્યાધુનિક F-16 જેટ્સ અને શક્તિશાળી ડ્રોન સિસ્ટમ છે. યુદ્ધની શરૂઆતમાં જ્યારે ઈરાનના આકાશમાં અજાણ્યા ફાઈટર પ્લેન જોવા મળ્યા, ત્યારે જ અટકળો શરૂ થઈ ગઈ હતી કે આ યુએઈના વિમાનો હોઈ શકે છે.
આ ઉપરાંત, યુએઈએ રાજદ્વારી સ્તરે પણ ઈરાન પર દબાણ વધાર્યું છે. તેણે હોર્મુઝ સ્ટ્રેટ (Hormuz Strait) ની સુરક્ષા માટે જરૂર પડે તો બળપ્રયોગ કરવાની મંજૂરી આપતા યુએન પ્રસ્તાવને ટેકો આપ્યો છે. એટલું જ નહીં, દુબઈમાં ઈરાન સાથે સંકળાયેલી શાળાઓ, ક્લબ અને ટ્રાવેલ એજન્સીઓ પર પણ પ્રતિબંધો લાદવામાં આવ્યા છે.
