NEET 2026 પરીક્ષા રદ: પેપર લીક થવાની આશંકાએ NTAનો મોટો નિર્ણય, હવે નવેસરથી લેવાશે પરીક્ષા
દેશભરના મેડિકલ વિદ્યાર્થીઓ માટે લેવાતી પ્રતિષ્ઠિત ‘નીટ’ (NEET-UG) પરીક્ષાને લઈને મોટા સમાચાર સામે આવ્યા છે. 3 મે, 2026 ના રોજ લેવાયેલી આ પરીક્ષામાં ગેરરીતિ અને પેપર લીકના આક્ષેપો બાદ, નેશનલ ટેસ્ટિંગ એજન્સી (NTA) એ મંગળવારે સત્તાવાર રીતે આ પરીક્ષા રદ કરવાની જાહેરાત કરી છે. એજન્સીએ જણાવ્યું છે કે વિદ્યાર્થીઓના હિત અને પરીક્ષાની વિશ્વસનીયતા જાળવી રાખવા માટે આ કઠોર નિર્ણય લેવામાં આવ્યો છે.
પરીક્ષા રદ કરવાનું મુખ્ય કારણ શું?
NTA દ્વારા જારી કરવામાં આવેલા નિવેદન મુજબ, રાજસ્થાનના સ્પેશિયલ ઓપરેશન્સ ગ્રુપ (SOG) અને અન્ય તપાસ એજન્સીઓ પાસેથી મળેલા અહેવાલોના આધારે આ નિર્ણય લેવાયો છે. તપાસમાં એવી વિગતો સામે આવી છે કે વર્તમાન પરીક્ષા પ્રક્રિયામાં ગંભીર ગેરરીતિઓ થઈ હતી, જેના કારણે આ પરીક્ષાના પરિણામોને માન્ય રાખવા શક્ય નથી.
અગાઉ 10 મેના રોજ NTA એ દાવો કર્યો હતો કે પરીક્ષા પૂર્ણ સુરક્ષા પ્રોટોકોલ હેઠળ લેવામાં આવી હતી, જેમાં GPS ટ્રેકિંગ વાહનો, AI સંચાલિત CCTV અને 5G જામરનો ઉપયોગ કરવામાં આવ્યો હતો. તેમ છતાં, ગ્રાઉન્ડ લેવલ પર થયેલી ગેરરીતિઓએ આ તમામ સુરક્ષા દાવાઓને પોલા સાબિત કર્યા છે.
CBI ને સોંપાઈ તપાસ
આ મામલો માત્ર પરીક્ષા રદ કરવા પૂરતો સીમિત નથી. ભારત સરકારે આ સમગ્ર કૌભાંડની ઊંડાણપૂર્વક તપાસ કરવા માટે કેસ CBI (સેન્ટ્રલ બ્યુરો ઓફ ઇન્વેસ્ટિગેશન) ને સોંપવાનો નિર્ણય કર્યો છે. NTA એ ખાતરી આપી છે કે તેઓ CBI ને તમામ રેકોર્ડ્સ અને દસ્તાવેજો પૂરા પાડીને તપાસમાં સંપૂર્ણ સહયોગ આપશે.
એજન્સીએ સ્વીકાર્યું છે કે પરીક્ષા ફરીથી લેવાને કારણે વિદ્યાર્થીઓ અને તેમના પરિવારોને ઘણી અગવડતા પડશે, પરંતુ પારદર્શિતા જાળવી રાખવા માટે આ એકમાત્ર વિકલ્પ હતો. જો ગેરરીતિવાળી પરીક્ષાને માન્ય રાખવામાં આવી હોત, તો તે લાયક વિદ્યાર્થીઓ સાથે મોટો અન્યાય થયો હોત.
In continuation of its press release dated 10 May 2026, the National Testing Agency wishes to inform candidates, parents, and members of the public of the following decisions taken in respect of NEET (UG) 2026. NTA had, on 8 May 2026, referred the matters then under consideration…
— National Testing Agency (@NTA_Exams) May 12, 2026
વિદ્યાર્થીઓ માટે મહત્વની સૂચનાઓ
પરીક્ષા રદ થયા બાદ વિદ્યાર્થીઓના મનમાં ઘણા સવાલો છે, જેના જવાબ NTA એ નીચે મુજબ આપ્યા છે:
નવી તારીખ: પરીક્ષાની નવી તારીખ હજુ જાહેર કરવામાં આવી નથી. આગામી દિવસોમાં સત્તાવાર ચેનલો દ્વારા પરીક્ષા અને નવા એડમિટ કાર્ડ (Admit Card) અંગેની જાણકારી આપવામાં આવશે.
રજીસ્ટ્રેશન: જે વિદ્યાર્થીઓએ મે 2026 ની પરીક્ષા માટે નોંધણી કરાવી હતી, તેમનો ડેટા અને ઉમેદવારી યથાવત રાખવામાં આવશે.
ફી: ફરીથી પરીક્ષા આપવા માટે વિદ્યાર્થીઓએ કોઈ વધારાની ફી ચૂકવવાની રહેશે નહીં. એટલું જ નહીં, NTA એ અગાઉ ભરેલી ફી પરત કરવાની અને આ પરીક્ષા પોતાના આંતરિક સંસાધનોથી લેવાની જાહેરાત કરી છે.
કેન્દ્રો: અગાઉ પસંદ કરેલા પરીક્ષા કેન્દ્રો જ મોટે ભાગે યથાવત રહેશે, જોકે આ અંગે અંતિમ નિર્ણય એડમિટ કાર્ડ સાથે જાહેર થશે.
તંત્ર સામે ઉઠ્યા સવાલો
નેશનલ ટેસ્ટિંગ એજન્સીએ ભલે હાઈ-ટેક સુરક્ષાના દાવા કર્યા હોય, પરંતુ પેપર લીક થવાની આ ઘટનાએ દેશની પરીક્ષા પદ્ધતિ પર ફરી એકવાર સવાલો ઉભા કર્યા છે. લાખો વિદ્યાર્થીઓ મહિનાઓ અને વર્ષો સુધી મહેનત કરતા હોય છે, ત્યારે આ પ્રકારની ઘટનાઓ તેમની માનસિક સ્થિતિ પર નકારાત્મક અસર કરે છે. રાજસ્થાન SOG ની તપાસમાં જે રીતે કૌભાંડો બહાર આવ્યા છે, તેનાથી સ્પષ્ટ થાય છે કે શિક્ષણ માફિયાઓ હજુ પણ સિસ્ટમમાં છીંડા શોધવામાં સફળ થઈ રહ્યા છે.
