વિદેશી પિચો પર બાઉન્સ અને સ્વીંગનો સામનો કરવા ભારતના બે દિગ્ગજો તૈયાર
ભારતીય ક્રિકેટમાં જ્યારે પણ કોઈ મોટો પ્રવાસ નજીક આવે છે, ત્યારે પ્રેશર બિલ્ડ-અપ થવું સ્વાભાવિક છે. પરંતુ આગામી મહિને ભારતીય ટીમ જ્યારે ત્રણ વનડે મેચોની સિરીઝ માટે ઇંગ્લેન્ડની ધરતી પર પગ મૂકશે, ત્યારે આ પ્રવાસ માત્ર એક સામાન્ય દ્વિપક્ષીય શ્રેણી નહીં હોય. આ પ્રવાસ ભારતીય ક્રિકેટના બે સૌથી મોટા સ્તંભો—વિરાટ કોહલી અને રોહિત શર્મા—માટે પોતાની કારકિર્દી અને ભવિષ્યની દિશા નક્કી કરનારી સર્વોચ્ચ કસોટી સાબિત થવાનો છે.
તાજેતરના સમયમાં મીડિયા અને સોશિયલ મીડિયા પર ચાલી રહેલી ચર્ચાઓ પર નજર કરીએ તો, આ બંને વરિષ્ઠ ખેલાડીઓ માટે અત્યારે ‘કરો યા મરો’ અથવા ક્રિકેટની ભાષામાં કહીએ તો ‘દબાણના પાંજરામાંથી બહાર આવવાનો’ આ આખરી મોકો છે. જો તેઓ ઇંગ્લેન્ડમાં બેટથી ધમાકો કરીને ભારતને જીત અપાવશે, તો જ તેઓ આકરી ટીકાઓ અને સિસ્ટમના દબાણમાંથી મુક્ત થઈ શકશે. ૨૦૨૭ના વનડે વર્લ્ડ કપ સુધી પહોંચવા માટે ઇંગ્લેન્ડ, ઓસ્ટ્રેલિયા, ન્યુઝીલેન્ડ અને દક્ષિણ આફ્રિકા (SENA દેશો) માં પ્રદર્શન કરવું એ આ બંને દિગ્ગજો માટે ગેમ-ચેન્જર સાબિત થશે.
ઓસ્ટ્રેલિયા પ્રવાસની કડવી યાદો અને ટીકાઓનો સામનો
ભૂતકાળની ઘટનાઓ પર નજર કરીએ તો, ગયા વર્ષે ઓક્ટોબરમાં ઓસ્ટ્રેલિયા સામે રમાયેલી વનડે શ્રેણી ભારત માટે બહુ સારી રહી નહોતી. શુભમન ગિલની આગેવાની હેઠળની યુવા ભારતીય ટીમને ત્યાં ૨-૧થી હારનો સામનો કરવો પડ્યો હતો. એ પ્રવાસમાં વિરાટ કોહલીનું ફોર્મ ભારે ચર્ચામાં રહ્યું હતું. પ્રથમ બે વનડે મેચોમાં કોહલી શૂન્ય રને આઉટ થયો, જેના કારણે સોશિયલ મીડિયા અને ક્રિકેટ પંડિતો દ્વારા તેની આકરી ટીકા કરવામાં આવી. ૩૭ વર્ષની ઉંમરે પહોંચેલા કોહલી માટે વાતાવરણ એટલું નકારાત્મક બની ગયું હતું કે લોકો સિડની વનડે પછી તેની નિવૃત્તિની અટકળો કરવા લાગ્યા હતા. ચાહકો અને નિષ્ણાતો એવું કહેવા લાગ્યા હતા કે હવે કોહલીમાં તે જૂની વાત નથી રહી અને તેણે યુવા ખેલાડીઓ માટે રસ્તો સાફ કરી દેવો જોઈએ. તે થોડા દિવસો કોહલી માટે સોશિયલ મીડિયા પર ટ્રોલિંગનો એક મુશ્કેલ તબક્કો હતો.
જોકે, સિડનીની ત્રીજી વનડેમાં જ્યાં ભારત ૨૩૭ રનનો પીછો કરી રહ્યું હતું, ત્યાં કોહલીએ પોતાની ક્લાસ બતાવી અને ૭૪ રનની શાનદાર ઇનિંગ રમીને ટીમને ગૌરવપૂર્ણ જીત અપાવી. બીજી તરફ, કેપ્ટન રોહિત શર્માએ એડિલેડમાં ૭૩ રન અને બાદમાં ૧૨૧ રનની અણનમ ઇનિંગ રમીને પોતાની જાતને ટીકાકારોના નિશાન પરથી અમુક અંશે બચાવી લીધી હતી, ભલે ભારત સિરીઝ હારી ગયું હોય.
વિદેશી પિચોનો અસલી પડકાર: કેમ ભારતીય બેટ્સમેનો મૂંઝાય છે?
ભારતીય ઉપખંડની પિચો પર રન બનાવવા અને સેના (SENA) દેશોની પિચો પર પ્રદર્શન કરવું એ બે તદ્દન અલગ બાબતો છે. તાજેતરના વર્ષોમાં ઇંગ્લેન્ડ, ઓસ્ટ્રેલિયા અને દક્ષિણ આફ્રિકાએ સફેદ બોલના ક્રિકેટ માટે બેટ્સમેનોને અનુકૂળ પિચો બનાવવાનો પ્રયાસ ચોક્કસ કર્યો છે, પરંતુ તેમ છતાં તે પિચો ક્યારેય ભારત જેવી સ્પિન-ફ્રેન્ડલી કે ફ્લેટ બની શકતી નથી. ત્યાંની પિચોમાં કુદરતી ઉછાળો (Bounce) હોય છે અને શરૂઆતની ઓવરોમાં લેટરલ મૂવમેન્ટ એટલે કે બોલ હવામાં અને ટપ્પો પડ્યા પછી સ્વિંગ થાય છે.
આ ઉપરાંત, આ દેશોના સ્ટેડિયમની બાઉન્ડ્રીઝ ભારત કરતાં ઘણી મોટી હોય છે. ભારતમાં જે શોર્ટ શોટ સરળતાથી સિક્સરમાં ફેરવાઈ જાય છે, તે ઓસ્ટ્રેલિયા કે ઇંગ્લેન્ડમાં બાઉન્ડ્રી લાઇન પર ફિલ્ડરના હાથમાં સરળ કેચ બની જાય છે (ન્યુઝીલેન્ડના નાના મેદાનો અપવાદ છે). ઓસ્ટ્રેલિયામાં પર્થ અને એડિલેડની મુશ્કેલ પિચો પર મિશેલ સ્ટાર્ક અને ઝેવિયર બાર્ટલેટ જેવા ફાસ્ટ બોલરો સામે ભારતીય ટોપ ઓર્ડર સંપૂર્ણપણે લાચાર દેખાયો હતો. આજના આધુનિક ક્રિકેટમાં પ્રથમ બેટિંગ કરતી વખતે મોટો સ્કોર ઊભો કરવાના દબાણમાં બેટ્સમેનો વધુ જોખમ લે છે, જે આવી અજાણી પિચો પર આત્મઘાતી સાબિત થાય છે.
કોહલીનો વાયરલ ઇન્ટરવ્યૂ અને BCCI ની આંતરિક રાજનીતિ
આ વિવાદોમાં ઘી હોમવાનું કામ ગયા મહિને આઈપીએલ (IPL) દરમિયાન કોહલીના એક વાયરલ થયેલા ઇન્ટરવ્યૂએ કર્યું. આ ઇન્ટરવ્યૂમાં કોહલીના આક્રોશ પરથી સ્પષ્ટ થતું હતું કે તે BCCI (ભારતીય ક્રિકેટ કંટ્રોલ બોર્ડ) ના સેટ-અપમાં કેટલાક લોકોના કામ કરવાની પદ્ધતિથી ખુશ નથી. તેના નિવેદનો પરથી ક્રિકેટ જગતમાં એવો ગણગણાટ શરૂ થયો કે બોર્ડના કેટલાક પદાધિકારીઓ કે પસંદગીકારો કદાચ વિરાટ અને રોહિતને આગામી ૨૦૨૭ના વર્લ્ડ કપના રોડમેપમાં જોવા માંગતા નથી.
જો આ અટકળો સાચી હોય, તો વિરાટ અને રોહિત પાસે સિસ્ટમને જવાબ આપવાનો એક જ રસ્તો બચે છે—બેટથી રનનો પહાડ ખડકવો. જો બોર્ડના કેટલાક લોકો આ વરિષ્ઠ ખેલાડીઓને ટીમની બહાર કરવા માંગતા હોય, તો તેઓ ચોક્કસપણે એવું ઈચ્છશે કે કોહલી અને શર્મા આગામી વિદેશી પ્રવાસોમાં નિષ્ફળ જાય, જેથી તેમને ટીમમાંથી પડતા મૂકવા માટે એક મજબૂત બહાનું મળી જાય. તેથી જ આ આગામી ઇંગ્લેન્ડ પ્રવાસ આ બંને માટે ‘અગ્નિપરીક્ષા’ સમાન છે.
૨૦૨૭ વર્લ્ડ કપનો રોડમેપ અને આગામી પડકારો
૨૦૨૭નો વનડે વર્લ્ડ કપ દક્ષિણ આફ્રિકા, ઝિમ્બાબ્વે અને નામિબિયાની ધરતી પર રમાવાનો છે. દક્ષિણ આફ્રિકાની પિચો હંમેશા ફાસ્ટ બોલરોની મદદગાર અને બેટ્સમેનો માટે કાળ સમાન રહી છે. ત્યાં વર્લ્ડ કપ રમવા જતાં પહેલાં ભારતે ઘણી બધી વનડે મેચો રમવાની છે. હોમ કન્ડિશન્સ એટલે કે ભારતની ધરતી પર વેસ્ટ ઇન્ડીઝ, શ્રીલંકા અને ઝિમ્બાબ્વે જેવી ટીમો સામે ઘરઆંગણે સિરીઝ રમવાની છે, જ્યાં રન બનાવવા કોહલી અને રોહિત માટે કોઈ મોટી વાત નથી. ત્યાં તેઓ સરળતાથી રન બનાવી લેશે.
અસલી કસોટી ત્યારે જ થશે જ્યારે તેઓ વિદેશ પ્રવાસે જશે.
જુલાઈ ૨૦૨૬: ઇંગ્લેન્ડ પ્રવાસ (૩ વનડે) – જ્યાં સારો દેખાવ સપ્ટેમ્બર સુધી રાહત આપશે.
નવેમ્બર ૨૦૨૬: ન્યુઝીલેન્ડ પ્રવાસ (૫ વનડે) – સ્વીઇંગ અને સીમ બોલિંગ સામે મોટો પડકાર.
આગામી સમય: ઓસ્ટ્રેલિયા અને દક્ષિણ આફ્રિકાના પ્રવાસો.
