WWE WrestleMania 43માં રોમન રેન્સના વિરોધીનું નામ આવ્યું સામે: કંપનીના મેગા પ્લાનનો થયો ખુલાસો
વર્લ્ડ રેસલિંગ એન્ટરટેઈનમેન્ટ (WWE)ના ઈતિહાસમાં આગામી સમયમાં ઘણા મોટા ફેરફારો જોવા મળવાના છે. જો કે ‘મેગા ઇવેન્ટ’ એટલે કે WrestleMania 43ના આયોજનમાં હજી ઘણો લાંબો સમય બાકી છે, પરંતુ રેસલિંગ દુનિયાના સૌથી મોટા સુપરસ્ટાર ‘ધ ટ્રાઇબલ ચીફ’ રોમન રેન્સ (Roman Reigns)ના વિરોધીને લઈને અત્યારથી જ ચર્ચાઓ તેજ થઈ ગઈ છે. તાજેતરમાં સામે આવેલા એક રિપોર્ટમાં રોમન રેન્સના ભવિષ્યના પ્લાનને લઈને એક સનસનાટીભર્યો ખુલાસો થયો છે.
અત્રે ઉલ્લેખનીય છે કે, WrestleMania 43નું આયોજન સાઉદી અરેબિયામાં થવાનું છે. WWEના ઈતિહાસમાં આ પ્રથમ વખત બનશે જ્યારે રેસલમેનિયા જેવો મોટો પ્રીમિયમ લાઈવ ઈવેન્ટ (PLE) અમેરિકાની બહાર યોજાશે. સાઉદી સરકાર સાથે કંપનીની અબજો ડોલરની નવી ડીલ બાદ આ ઐતિહાસિક નિર્ણય લેવાયો છે.
રોમન રેન્સ માટે ૨૦૨૬ રહ્યું છે શાનદાર
રોમન રેન્સ માટે વર્ષ ૨૦૨૫ બિલકુલ સારું રહ્યું ન હતું. તેણે ઘણી મોટી મેચોમાં હારનો સામનો કરવો પડ્યો હતો અને તેનો દબદબો ઓછો થતો દેખાયો હતો. પરંતુ, વર્ષ ૨૦૨૬માં રોમન રેન્સે ધમાકેદાર પુનરાગમન કર્યું છે. આ વર્ષની શરૂઆતમાં જ તેણે પ્રતિષ્ઠિત ‘રોયલ રમ્બલ’ (Royal Rumble) મેચ જીતીને ઈતિહાસ રચ્યો હતો. ત્યારબાદ WrestleMania 42 માં સીએમ પંક (CM Punk)ને ધૂળ ચટાવીને ‘વર્લ્ડ હેવીવેઇટ ચેમ્પિયનશિપ’ પોતાના નામે કરી લીધી હતી. હાલમાં તેનો આ ટાઈટલ રન જબરદસ્ત ચાલી રહ્યો છે અને કંપનીએ આવતા વર્ષે પણ તેને ટોચ પર રાખવાનો પૂરો પ્લાન બનાવી લીધો છે.
કોની સાથે થશે ટક્કર? ડેવ મેલ્ટઝરનો મોટો દાવો
રેસલિંગ ઈન્ડસ્ટ્રીના સૌથી વિશ્વસનીય પત્રકાર અને ‘રેસલિંગ ઓબ્ઝર્વર ન્યૂઝલેટર’ના દિગ્ગજ ડેવ મેલ્ટઝર (Dave Meltzer)ના જણાવ્યા અનુસાર, WrestleMania 43માં રોમન રેન્સની ટક્કર WWEના નેક્સ્ટ જનરેશન મોન્સ્ટર ઓબા ફેમી (Obba Femi) સાથે થઈ શકે છે.
Roman to Oba: “Let’s see how you do through the summer, then we’ll know if you can step up to the GOAT” Yall just don’t pay attention. pic.twitter.com/OKerDrmeZQ
— Kerri (@NYKerri_) July 2, 2026
ડેવ મેલ્ટઝરે પોતાના રિપોર્ટમાં જણાવ્યું છે કે:
“ઓબા ફેમીને બહુ જલ્દી ચેમ્પિયનશિપ મેચ મળવા જઈ રહી છે અને આ મેગા ફાઈટ આવતા વર્ષે રેસલમેનિયામાં જોવા મળશે. એવી પણ ચર્ચા છે કે બ્રોક લેસનર કદાચ સાઉદી અરેબિયા ટ્રાવેલ કરવા માંગતા ન હોય. લેસનર પોતે પણ ઈચ્છતા હતા કે ઓબા ફેમી ‘કિંગ ઓફ ધ રિંગ’ જીતે અને તે બે વાર હારી ન જાય. ‘ધ બીસ્ટ’ (બ્રોક લેસનર)ની કામ કરવાની શૈલી થોડી અલગ છે, પરંતુ બિઝનેસ અને કમાણીના દ્રષ્ટિકોણથી જોઈએ તો અત્યારે રોમન રેન્સ અને ઓબા ફેમીની મેચથી મોટી કોઈ મેચ હોઈ શકે નહીં. પૂરેપૂરી સંભાવના છે કે આ બંને દિગ્ગજો રેસલમેનિયા 43ના મેન ઇવેન્ટમાં સામસામે ટકરાશે.”
સમરસ્લેમ 2026માં જોવા મળશે મોટી મેચોની ટક્કર
ઓબા ફેમીએ હાલમાં જ ‘કિંગ ઓફ ધ રિંગ’ ટૂર્નામેન્ટ જીતીને SummerSlam 2026 માટે વર્લ્ડ ચેમ્પિયનશિપ મેચની ટિકિટ મેળવી લીધી છે. રેસલિંગ ફેન્સને આશા હતી કે ઓબા ફેમી ચેમ્પિયનશિપ મેચ માટે રોમન રેન્સને પડકારશે. પરંતુ, ફેમીએ બધાને ચોંકાવી દેતા રોમન રેન્સના બદલે બ્રોક લેસનર (Brock Lesnar)ને પડકાર ફેંક્યો છે. ફેમીનું કહેવું છે કે તે રોમન તરફ વળતા પહેલા બ્રોક લેસનર સાથેની પોતાની જૂની દુશ્મનીનો અંત લાવવા માંગે છે.
