દિલ્હી-યુપી સહિત દેશભરમાં ચોમાસું રૌદ્ર સ્વરૂપ ધારણ કરશે; હવામાન વિભાગનું રેડ એલર્ટ
સમગ્ર દેશમાં હાલ ચોમાસું બરાબરનું જામ્યું છે. દેશના મોટાભાગના વિસ્તારોમાં મેઘરાજા મન મૂકીને વરસી રહ્યા છે, જેના કારણે ક્યાંક ખુશી તો ક્યાંક ચિંતાનો માહોલ જોવા મળી રહ્યો છે. આ દરમિયાન ભારતીય હવામાન વિભાગ (IMD) દ્વારા દેશના અલગ-અલગ ભાગો માટે એક અત્યંત ગંભીર અને નવી ચેતવણી જારી કરવામાં આવી છે. હવામાન વિભાગના જણાવ્યા અનુસાર, દિલ્હી, ઉત્તર પ્રદેશ, બિહાર અને રાજસ્થાન સહિત દેશના ૧૮ રાજ્યોમાં આગામી કલાકોમાં ભારેથી અતિભારે વરસાદ અને ભયંકર વાવાઝોડાની સ્થિતિ સર્જાઈ શકે છે. આ સમયગાળા દરમિયાન દરિયાકાંઠાના અને પહાડી વિસ્તારોમાં ૮૫ કિલોમીટર પ્રતિ કલાકની પ્રચંડ ઝડપે પવન ફૂંકાવાની આશંકા છે, જેને પગલે લોકોને બિનજરૂરી બહાર ન નીકળવા અને સાવચેત રહેવા વિનંતી કરવામાં આવી છે.
લો-પ્રેશર અને મોન્સૂન ટ્રફ સક્રિય: આગામી ૪૮ કલાક મુશ્કેલ
હવામાન વૈજ્ઞાનિકોના જણાવ્યા અનુસાર, કુદરતનું આ રૌદ્ર સ્વરૂપ એક મજબૂત સિસ્ટમના કારણે જોવા મળી રહ્યું છે. હાલમાં ઉત્તર-પશ્ચિમ મધ્યપ્રદેશ અને તેને અડીને આવેલા દક્ષિણ-પશ્ચિમ ઉત્તર પ્રદેશ પર એક સ્પષ્ટ લો-પ્રેશર (ઓછા દબાણનો વિસ્તાર) સક્રિય થયો છે. આ સાથે જ, દરિયાની સપાટી પર ચોમાસાની મુખ્ય લાઇન (મોન્સૂન ટ્રફ) ઉત્તર-પશ્ચિમ રાજસ્થાનથી લઈને છેક ઉત્તર-પૂર્વ બંગાળની ખાડી સુધી વિસ્તરેલી છે. આ સંયુક્ત સિસ્ટમના કારણે આગામી ૪૮ કલાક દેશના અનેક રાજ્યો માટે ભારે મુશ્કેલીભર્યા સાબિત થઈ શકે છે. ખાસ કરીને પૂર્વી ભારતમાં વીજળી પડવાની અને પહાડી રાજ્યોમાં ભૂસ્ખલનની ઘટનાઓ વધી શકે છે. સાવચેતીના ભાગરૂપે માછીમારોને નદી અને સમુદ્ર કિનારાથી દૂર રહેવાની કડક સલાહ અપાઈ છે.
૧૮ રાજ્યો માટે તોફાન અને કરા પડવાનું એલર્ટ
જે ૧૮ રાજ્યોમાં કુદરતનો પ્રકોપ જોવા મળી શકે છે તેમાં ઉત્તર પ્રદેશ, બિહાર, દિલ્હી, હરિયાણા, રાજસ્થાન, ઉત્તરાખંડ, હિમાચલ પ્રદેશ, પંજાબ, જમ્મુ-કાશ્મીર, લદ્દાખ, ઝારખંડ, પશ્ચિમ બંગાળ, ઓડિશા, આસામ, મેઘાલય, મહારાષ્ટ્ર અને કેરળનો સમાવેશ થાય છે. આ રાજ્યોમાં ૮૦ થી ૮૫ કિમી પ્રતિ કલાકની ઝડપે પવન ફૂંકાશે અને કેટલાક વિસ્તારોમાં મોટા પાયે કરા પડવાની પણ સંભાવના છે.
દિલ્હી અને ઉત્તર પ્રદેશમાં તોફાની પવનની દહેશત
રાજધાની દિલ્હીમાં હવામાન વિભાગે ભારે વરસાદની સાથે ૭૦ કિલોમીટર પ્રતિ કલાકની ઝડપે પવન ફૂંકાવાનું એલર્ટ આપ્યું છે. દિલ્હીમાં મહત્તમ તાપમાન ૩૩ ડિગ્રી અને લઘુત્તમ તાપમાન ૨૭ ડિગ્રી સેલ્સિયસ આસપાસ રહેશે. બીજી તરફ, ઉત્તર પ્રદેશમાં ચક્રવાતી પવન સાથે અતિભારે વરસાદની આશંકા છે. યુપીના અયોધ્યા, મેરઠ, ગૌતમ બુદ્ધ નગર, આગ્રા, મથુરા, કાનપુર, પીલીભીત, મુરાદાબાદ, બરેલી, સીતાપુર, અમેઠી અને આઝમગઢ જેવા જિલ્લાઓમાં ભારે એલર્ટ અપાયું છે, જ્યાં ૮૦ કિમીની ઝડપે પવન ફૂંકાઈ શકે છે.
બિહાર, ઝારખંડ અને પશ્ચિમ બંગાળની સ્થિતિ
બિહારમાં પટના, ગયા, પૂર્વ અને પશ્ચિમ ચંપારણ, મુઝફ્ફરપુર, દરભંગા અને ભાગલપુર સહિતના વિસ્તારોમાં ભારે ગાજવીજ સાથે વરસાદ પડી શકે છે. ઝારખંડના રાંચી, હજારીબાગ, બોકારો અને જમશેદપુરમાં ૬૦ થી ૭૦ કિમીની ઝડપે પવન ફૂંકાશે. જ્યારે પશ્ચિમ બંગાળના કોલકાતા, પુરુલિયા, બાંકુરા અને કૂચ બિહાર જેવા વિસ્તારોમાં પણ વાવાઝોડાની ગંભીર ચેતવણી આપવામાં આવી છે.
પહાડી રાજ્યો અને પંજાબ-રાજસ્થાનમાં આકાશી આફત
ઉત્તરાખંડના હરિદ્વાર, નૈનિતાલ, ઋષિકેશ અને ઉત્તરકાશીમાં મુશળધાર વરસાદને કારણે વહીવટીતંત્રને એલર્ટ પર રાખવામાં આવ્યું છે. હિમાચલ પ્રદેશના મનાલી, સોલન અને ચંબા જેવા પ્રવાસન સ્થળો પર ભારે પવનના કારણે તાપમાનનો પારો ગગડીને લઘુત્તમ ૧૦ ડિગ્રી સુધી પહોંચી ગયો છે. પંજાબના જલંધર, અમૃતસર અને પટિયાલામાં ૭૦ કિમીની ઝડપે પવન ફૂંકાશે, જ્યારે રાજસ્થાનના જયપુર, અજમેર, ઉદયપુર, જોધપુર અને કોટામાં ૭૫ કિમીની ઝડપે તોફાની પવન સાથે વરસાદ તૂટી પડવાની સંભાવના છે. મધ્યપ્રદેશના ભોપાલ, ઇન્દોર, ઉજ્જૈન અને સાગરમાં પણ ભારે પવન અને ગાજવીજ સાથે વરસાદી માહોલ રહેશે.
