મોજતબા ખામેનીએ આપ્યું મોટું નિવેદન—’લોહીનો બદલો લોહીથી લઈશું’

‘અમારા સમયના હુસૈનનું લોહી વહ્યું છે…’ મોજતબા ખામેનીના સળગતા સંદેશાથી અમેરિકા સહિત પશ્ચિમી દેશોમાં ખળભળાટ

પશ્ચિમ એશિયાના રાજકારણમાં ફરી એકવાર મોટો ભૂકંપ આવ્યો છે. ઈરાનના સર્વોચ્ચ નેતા આયતોલ્લાહ સૈયદ અલી ખામેનીના અવસાન અને તેમની દફનવિધિ બાદ સમગ્ર ઇસ્લામિક જગતમાં ભારે આક્રોશ જોવા મળી રહ્યો છે. આ દરમિયાન અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે પોતાની હત્યાનો ભય વ્યક્ત કર્યો છે, જેનાથી વૈશ્વિક સ્તરે સનસનાટી મચી ગઈ છે. ટ્રમ્પના આ નિવેદન વચ્ચે, ઈરાનના દિવંગત સર્વોચ્ચ નેતાના પુત્ર અને શક્તિશાળી ધાર્મિક ગુરુ મોજતબા ખામેનીએ એક અત્યંત આક્રમક અને સળગતો સંદેશ જારી કર્યો છે. મોજતબા ખામેનીએ સ્પષ્ટ શબ્દોમાં “લોહીનો બદલો…” લેવાની જાહેરાત કરી છે, જેણે અમેરિકા અને ઇઝરાયેલ સહિતના પશ્ચિમી દેશોની ઊંઘ હરામ કરી દીધી છે.

બદલાની આગમાં સળગતું ઈરાનનું નવું નેતૃત્વ

વિશ્વભરના શિયા મુસ્લિમો અને સત્ય શોધનારા નેતા માનવામાં આવતા શહીદ ઇમામ સૈયદ અલી ખામેનીના અંતિમ સંસ્કાર અને દફનવિધિ સંપન્ન થયાના ગણતરીના કલાકોમાં જ ઇમામ સૈયદ મોજતબા ખામેનીએ શ્રેણીબદ્ધ નિવેદનો અને પોસ્ટ્સ જારી કરી છે. આ નિવેદનોનો સ્વર સંપૂર્ણપણે બદલાની ભાવનાથી ભરેલો છે. તેહરાન અને વોશિંગ્ટન વચ્ચે પહેલાથી જ મિસાઇલ હુમલાઓને કારણે યુદ્ધ જેવી સ્થિતિ સર્જાઈ હતી. જો કે આ હુમલાઓ અત્યારે થોડા શાંત પડ્યા છે, પરંતુ મોજતબા ખામેનીના આ નવા સંદેશાથી ગમે ત્યારે ફરીથી યુદ્ધ ફાટી નીકળે તેવી આશંકા સેવાઈ રહી છે. મોજતબાએ લખ્યું છે કે, તેમનો દેશ ઇમામ હુસૈનના પવિત્ર લોહીનો અને આજના સમયના શહીદોના લોહીનો બદલો લઈને જ રહેશે.

ઇસ્લામિક ક્રાંતિ, જેહાદ અને કરબલાનો પડઘો

મોજતબા ખામેનીએ પોતાના લાંબા સંદેશમાં ઈરાનની ઇસ્લામિક ક્રાંતિના મૂળભૂત સિદ્ધાંતોનો ઉલ્લેખ કર્યો છે. તેમણે જણાવ્યું કે ઈરાનની ક્રાંતિ મૂળભૂત રીતે ‘હુસૈની ક્રાંતિ’ છે, જે અન્યાય સામે અવાજ ઉઠાવવાના સિદ્ધાંતો પર ખીલી છે. શહીદ નેતા અલી ખામેનીનું પાત્ર અને વર્તન પણ ઇમામ હુસૈન જેવું જ હતું, જેમણે અન્યાયી શક્તિઓ સામે ઝૂકવાનો ઇનકાર કર્યો હતો અને જેહાદ તેમજ પ્રતિકાર (રેઝિસ્ટન્સ) માં સક્રિય ભાગ લીધો હતો.

મોજતબાએ ઉમેર્યું કે, “આજે પણ હુસૈનના અસંખ્ય અનુયાયીઓનું લોહી આતંકવાદી શક્તિઓ દ્વારા અન્યાયી રીતે વહેવડાવવામાં આવી રહ્યું છે. આ બલિદાન સમગ્ર મુસ્લિમ સમુદાયને જાગૃત કરવા અને અન્યાય સામે લડવા માટે પ્રેરિત કરે છે. આ એક એવી જીવનદાયી હાકલ છે જે કરબલાના મેદાનમાં ઇમામ હુસૈન દ્વારા અપાયેલા ઐતિહાસિક પોકાર—’શું કોઈ મારી મદદ માટે છે?’—નો પડઘો પાડે છે.” આ પડઘો હવે માત્ર ઈરાન પૂરતો સીમિત નથી રહ્યો, પરંતુ ઇરાક અને અન્ય ઇસ્લામિક દેશોમાં ફેલાઈ ચૂક્યો છે, જે દુશ્મનોના શાસનના પાયા હચમચાવી રહ્યો છે.

લાખોની જનમેદનીનો આભાર અને ભવિષ્યની પ્રતિજ્ઞા

પોતાના પિતાના જનાઝામાં ઉમટેલી ઐતિહાસિક ભીડને સંબોધતા મોજતબા ખામેનીએ તેહરાન, કોમ, નજફ, કરબલા અને મશહદ જેવા પવિત્ર શહેરોના લાખો લોકોનો હૃદયપૂર્વક આભાર માન્યો હતો. તેમણે કહ્યું કે જનમેદનીની આ અવિશ્વસનીય અને ઐતિહાસિક હાજરી જ દુશ્મનોને પરાજિત કરવા માટે પૂરતી છે. તેમણે પ્રતિજ્ઞા લેતા કહ્યું કે, “ઓ અન્યાયી રીતે શહીદ કરાયેલા નેતા! ઓ ભગવાનના ન્યાયી સેવક! અમે તમારા વારસાનું રક્ષણ કરવા માટે કટિબદ્ધ છીએ. તમે બતાવેલા સીધા માર્ગ પર અમે મજબૂતાઈથી આગળ વધીશું અને રસ્તામાં આવતી કોઈ પણ મુશ્કેલી કે આંતરરાષ્ટ્રીય દબાણથી ડરીશું નહીં.”

હઝરત ઇમામ હુસૈનના બલિદાનનો ઇતિહાસ

ઇસ્લામિક ઇતિહાસમાં હઝરત ઇમામ હુસૈનના બલિદાનને સર્વોચ્ચ સ્થાન આપવામાં આવ્યું છે. ૧૦ ઓક્ટોબર, ૬૮૦ ના રોજ ઇરાકના કરબલાના મેદાનમાં પયગંબર મુહમ્મદ સાહેબના દોહિત્ર (પૌત્ર) ઇમામ હુસૈન અને તેમના ૭૨ સાથીઓને ઉમૈયા ખલીફા યઝીદની ક્રૂર આર્મી દ્વારા શહીદ કરવામાં આવ્યા હતા. યઝીદનું શાસન અલોકતાંત્રિક અને ક્રૂર હતું, જેની સામે વફાદારીના સોગંદ લેવાનો ઇમામ હુસૈને સ્પષ્ટ ઇનકાર કર્યો હતો. કરબલાની આ ઘટના જુલમ સામે સત્ય અને બહાદુરીના વિજયનું સૌથી મોટું પ્રતીક છે, જેની યાદમાં આજે પણ દર વર્ષે વિશ્વભરના મુસ્લિમો મોહરમ મહિનામાં શોક મનાવે છે. ઈરાન અત્યારે પોતાના આ જ ધાર્મિક ઇતિહાસ અને આક્રોશને હથિયાર બનાવીને અમેરિકા સામે આરપારની લડાઈ લડવાના મૂડમાં દેખાઈ રહ્યું છે.