મુંબઈ ક્ષેત્રમાં મંગળવારથી ઓટો અને ટેક્સીના ભાડામાં વધારો: જાણો કેટલો ખર્ચ વધશે
મુંબઈ અને તેની આસપાસના વિસ્તારોમાં રોજીંદી મુસાફરી કરતા લાખો લોકો માટે એક મહત્વના સમાચાર આવ્યા છે. મુંબઈ મેટ્રોપોલિટન રિજન (MMR) માં આગામી મંગળવારથી ઓટો-રિક્ષા અને કાળી-પીળી ટેક્સીના ભાડામાં વધારો થવા જઈ રહ્યો છે. મુંબઈ મેટ્રોપોલિટન રિજન ટ્રાન્સપોર્ટ ઓથોરિટી (MMRTA) દ્વારા ઓટો-રિક્ષાના લઘુત્તમ ભાડામાં ₹1 અને કાળી-પીળી ટેક્સીના લઘુત્તમ ભાડામાં ₹2 નો વધારો મંજૂર કરવામાં આવ્યો છે.
પરિવહન અધિકારીઓએ આપેલી માહિતી મુજબ, મંગળવાર એટલે કે ૧ સપ્ટેમ્બરથી મુંબઈ મેટ્રોપોલિટન રિજનમાં મુસાફરી કરતી વખતે ઓટો-રિક્ષા માટે ઓછામાં ઓછા ₹27 અને કાળી-પીળી ટેક્સી માટે ₹33 ચૂકવવા પડશે. આ નવા ભાડા દર અમલમાં આવતાની સાથે જ મુંબઈગરાઓના ખિસ્સા પર સીધો બોજ પડશે.
નવા ભાડા દર અને કિલોમીટર દીઠ ભાવ વધારાની વિગત
RTO ના વરિષ્ઠ અધિકારીએ નવા ભાડા માળખા અંગે વિગતવાર માહિતી આપતા જણાવ્યું હતું કે પ્રથમ ૧.૫ કિલોમીટર માટે સુધારેલા દરો નીચે મુજબ રહેશે:
ઓટો-રિક્ષા ભાડું: ઓટો-રિક્ષાનું લઘુત્તમ ભાડું ₹26 થી વધીને ₹27 થયું છે. આ સિવાય, પ્રતિ કિલોમીટરનો દર ₹17.14 થી વધારીને ₹18.22 કરવામાં આવ્યો છે.
કાળી-પીળી ટેક્સી ભાડું: પ્રથમ ૧.૫ કિમી માટે ટેક્સીનું લઘુત્તમ ભાડું ₹31 થી વધીને ₹33 થશે. તે જ સમયે, ટેક્સી માટે પ્રતિ કિલોમીટરનો દર ₹20.66 થી વધીને ₹21.90 થયો છે.
મહારાષ્ટ્ર પરિવહન સચિવની અધ્યક્ષતામાં યોજાયેલી MMRTA ની તાજેતરની બેઠકમાં આ ભાડા સુધારાને વિધિવત મંજૂરી આપવામાં આવી હતી. સીએનજી (CNG) ની કિંમતોમાં થયેલા ફેરફારો અને ઈંધણના વધતા ખર્ચને ધ્યાનમાં રાખીને આ નિર્ણય લેવાયો હોવાનું માનવામાં આવે છે.
મીટર રિકેલિબ્રેશન અને ત્રણ મહિનાની સમયસીમા
ભાડા વધારાની મંજૂરી મળ્યા બાદ ટેક્સી અને ઓટો-રિક્ષા ચાલોકો સુધારેલા ભાડા કેવી રીતે વસૂલ કરી શકશે તે અંગે પણ અધિકારીઓએ સ્પષ્ટતા કરી છે. RTO ના જણાવ્યા અનુસાર, ડ્રાઇવરો તેમના વાહનોના ઇલેક્ટ્રોનિક ભાડા મીટરનું માપાંકન (Recalibration) કરાવ્યા પછી અથવા RTO દ્વારા માન્ય પ્રાપ્ત ભાડા પત્રક (Fare Table) મુસાફરોને દર્શાવીને જ સુધારેલું ભાડું વસૂલ કરી શકે છે.
ચાલકોને તેમના ઇલેક્ટ્રોનિક મીટરનું પુનઃમાપન કરાવવા માટે નવેમ્બરના અંત સુધી એટલે કે ત્રણ મહિનાનો સમય આપવામાં આવ્યો છે. પરંતુ સુધારેલા ભાડા દરો તો ૧ સપ્ટેમ્બરથી જ અમલી બની જશે. જો નિર્ધારિત સમયગાળાની અંદર કોઈપણ ઓટો કે ટેક્સી ચાલક પોતાના મીટરનું પુનઃમાપન કરવામાં નિષ્ફળ જશે, તો તેમણે RTO ના કડક દંડનો સામનો કરવો પડશે.
૧૮ મહિના પછી થયો ભાડા વધારો
મુંબઈ મેટ્રોપોલિટન ક્ષેત્રમાં મુસાફરીનો મુખ્ય આધાર ટેક્સી અને ઓટો-રિક્ષા છે. આ ક્ષેત્રમાં હાલમાં ૪.૫ લાખથી વધુ ઓટો-રિક્ષા અને ૫૦,૦૦૦ થી વધુ કાળી-પીળી ટેક્સીઓ દોડી રહી છે, જેમાંથી મોટાભાગના વાહનો કોમ્પ્રેસ્ડ નેચરલ ગેસ (CNG) પર ચાલે છે.
નોંધનીય છે કે MMR ક્ષેત્રમાં આ ભાડા વધારો લગભગ ૧૮ મહિનાના લાંબા અંતરાલ પછી આવ્યો છે. આ અગાઉ MMR માં ટેક્સી અને ઓટો-રિક્ષાના ભાડામાં ₹3 નો વધારો ૧ ફેબ્રુઆરી, ૨૦૨૫ ના રોજ અમલમાં મૂકવામાં આવ્યો હતો. આ ભાડા વધારાથી દૈનિક ધોરણે મુસાફરી કરતા લાખો લોકોને હવે પોતાના માસિક બજેટમાં થોડો ફેરફાર કરવો પડશે.
