૩૦ સપ્ટેમ્બરે પૂરી થઈ રહી છે આ મહત્વપૂર્ણ મુદતો: LPG, બેંકિંગ, ટેક્સ અને બચત યોજનાઓ અંગે તાત્કાલિક જાણો આ ફેરફારો
નવી દિલ્હી: જો તમે તમારા મહત્વપૂર્ણ નાણાકીય કાર્યો અને સરકારી યોજનાઓના વેરિફિકેશનને મુલતવી રાખી રહ્યા છો, તો આજે ૩૦ સપ્ટેમ્બર ૨૦૨૬ ના રોજ તમારી પાસે આ તમામ કાર્યો આખરી આખરી ઓપ આપવાની અંતિમ તક છે. દેશમાં ૧ ઓક્ટોબરથી એલપીજી સબસિડી, બેંકિંગ એટીએમ ટ્રાન્ઝેક્શન મર્યાદા, નેશનલ પેન્શન સિસ્ટમ (NPS) ના ચાર્જિસ અને ડિજિટલ પેમેન્ટ સંબંધિત સેવાઓમાં મોટા ફેરફારો અમલી બનવા જઈ રહ્યા છે.
જોકે કરદાતાઓ માટે રાહતના સમાચાર એ છે કે સરકારે કેટલીક મહત્વપૂર્ણ સમયમર્યાદા લંબાવી આપી છે, પરંતુ અન્ય સેવાઓમાં આજે જ પ્રક્રિયા પૂર્ણ કરવી અનિવાર્ય છે.
૧. LPG સબસિડી માટે e-KYC ની છેલ્લી તારીખ
ઘરેલુ ગેસ સિલિન્ડર પર સબસિડી મેળવતા ગ્રાહકો માટે આજે અત્યંત મહત્વનો દિવસ છે. ૧ ઓક્ટોબરથી સબસિડી વિતરણની પ્રક્રિયામાં મોટો ફેરફાર થઈ રહ્યો છે. સરકારે તમામ સબસિડી ધારકોને બાયોમેટ્રિક આધાર પ્રમાણીકરણ (e-KYC) પૂર્ણ કરવા માટે આજ સુધીનો સમય આપ્યો હતો. જો આજે આ પ્રક્રિયા પૂર્ણ નહીં થાય, તો આગામી મહિનાથી સબસિડી અટકી જવાની શક્યતા છે.
૨. ટેક્સ ઓડિટ રિપોર્ટ સબમિશનમાં રાહત
આવકવેરા ઓડિટને આધીન કરદાતાઓ માટે સરકારે એક મોટો રાહતનો નિર્ણય લીધો છે. અગાઉ ટેક્સ ઓડિટ રિપોર્ટ અપલોડ કરવાની સમયમર્યાદા ૩૦ સપ્ટેમ્બર હતી, પરંતુ નાણા મંત્રાલયે આ મુદત લંબાવીને ૨૧ ઓક્ટોબર ૨૦૨૬ સુધી કરી દીધી છે. પરિણામે, કરદાતાઓને પોતાના ઓડિટ રિપોર્ટ સબમિટ કરવા માટે વધારાનો સમય મળી રહેશે.
૩. સ્ટેટ બેંક ઓફ ઈન્ડિયા (SBI) ના ATM નિયમોમાં ફેરફાર
સ્ટેટ બેંક ઓફ ઈન્ડિયાએ પોતાના સેલરી પેકેજ એકાઉન્ટ ધારકો માટે ફ્રી ટ્રાન્ઝેક્શન મર્યાદામાં ફેરફાર કર્યો છે, જે ૧ ઓક્ટોબરથી લાગુ થશે. અત્યાર સુધી સેલરી એકાઉન્ટ હોલ્ડર્સને અન્ય બેંકોના એટીએમ અને ઓટોમેટેડ ડિપોઝિટ મશીનો પર દર મહિને ૧૦ મફત ટ્રાન્ઝેક્શન મળતા હતા, જે ઘટાડીને હવે ૫ કરી દેવામાં આવ્યા છે. જેથી જૂની મર્યાદાનો લાભ લેવાનો આજે છેલ્લો દિવસ છે.
૪. વોટ્સએપ બિઝનેસ અને UPI પેમેન્ટ સેવાઓ
વોટ્સએપ બિઝનેસનો ઉપયોગ કરતા વેપારીઓ માટે આજે પેમેન્ટ મેથડ અપડેટ કરવાનો આખરી દિવસ છે. ૧ ઓક્ટોબરથી ૨૪ કલાકની ફ્રી કસ્ટમર સપોર્ટ વિન્ડો નાબૂદ કરવામાં આવી રહી છે. આવતીકાલથી દરેક વિશિષ્ટ સેવા માટે ૧૪ પૈસા વત્તા જીએસટી (GST) ચાર્જ વસૂલવામાં આવશે.
૫. NPS અને NPS Lite માં ઓનબોર્ડિંગ ફી
પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી (PFRDA) દ્વારા પોઈન્ટ ઓફ પ્રેઝન્સ (PoP) ચાર્જિસમાં ફેરફાર કરવામાં આવ્યા છે. ૧ ઓક્ટોબરથી PoP દ્વારા નવું PRAN એકાઉન્ટ ખોલાવનાર ગ્રાહકો પાસેથી ૨૦૦ રૂપિયા વન-ટાઇમ ઓનબોર્ડિંગ ફી અને AUM ના ૦.૨૦% વાર્ષિક ચાર્જ લેવાશે. જોકે, આ જ પ્રક્રિયા સંપૂર્ણ ડિજિટલ માધ્યમથી કરવામાં આવે તો ફી માત્ર ૧૦૦ રૂપિયા રહેશે.
૬. નાની બચત યોજનાઓના વ્યાજદરમાં સમીક્ષા
આજના દિવસે નાણા મંત્રાલય દ્વારા પીપીએફ (PPF), સિનિયર સિટીઝન સેવિંગ્સ સ્કીમ (SCSS), સુકન્યા સમૃદ્ધિ યોજના અને નેશનલ સેવિંગ્સ સર્ટિફિકેટ જેવી નાની બચત યોજનાઓના વ્યાજદરોની ત્રિમાસિક સમીક્ષા પણ થવા જઈ રહી છે. નવા દરો જાહેર થયા બાદ તેની અસર આગામી ઓક્ટોબર થી ડિસેમ્બર ક્વાર્ટર દરમિયાન રોકાણકારોને જોવા મળશે.
