જાણીને દિલ ખુશ થઈ જશે! સરકારના આ મોટા અભિયાનથી બદલાઈ રહી છે હજારો બાળકોની તાસીર!
પ્રધાનમંત્રી નરેન્દ્ર મોદીના જનસેવાના ગૌરવવંતા ૨૫ વર્ષ પૂર્ણ થવાના અવસર નિમિત્તે રાજ્યભરમાં ‘સેવા સંકલ્પ અભિયાન’ની ભવ્ય ઉજવણી ચાલી રહી છે. આ વિશેષ અભિયાન અંતર્ગત ગુજરાતના મુખ્યમંત્રી ભૂપેન્દ્ર પટેલે અમદાવાદના બોપલ સ્થિત આંગણવાડી ખાતે આયોજિત ‘આંગણ મિલન સેવા’ ઉત્સવમાં ઉત્સાહભેર સહભાગી થઈને બાળકો સાથે અદ્ભુત પળો વિતાવી હતી. મુખ્યમંત્રીની આ અણધારી મુલાકાતથી આંગણવાડીના ભૂલકાંઓ અને ઉપસ્થિત વાલીઓમાં ભારે આનંદ જોવા મળ્યો હતો.
મુખ્યમંત્રી દ્વારા બાળકોને ફળ, સુખડી અને રમકડાંનું વિતરણ
બોપલ આંગણવાડી-૬ ની મુલાકાત દરમિયાન મુખ્યમંત્રી ભૂપેન્દ્ર પટેલે ખૂબ જ સહજ અને માયાળુ સ્વભાવનો પરિચય આપતા આંગણવાડીના નાના-નાના ભૂલકાંઓ સાથે વાતચીત કરી હતી. તેમણે પોતાના હસ્તે બાળકોને પૌષ્ટિક ફળ અને સુખડીનું વિતરણ કર્યું હતું. આ ઉપરાંત, બાળકોને રમકડાં ભેટમાં આપીને એક વડીલ અને વાત્સલ્યમય સ્વરૂપે તેમના પર વહાલ વરસાવ્યું હતું.
મુખ્યમંત્રીએ આંગણવાડી પરિસરમાં ઉપલબ્ધ સુવિધાઓનું બારીકાઈથી નિરીક્ષણ કર્યું હતું અને બાળકો માટે ચલાવવામાં આવતી વિવિધ પ્રવૃત્તિઓ તથા અભ્યાસક્રમ વિશે વિગતવાર માહિતી મેળવી હતી.
સગર્ભા બહેનો અને કિશોરીઓ માટે ‘THR’ નું વિતરણ તથા ‘પોષણ ચેમ્પિયન એવોર્ડ’
આ પ્રસંગે માત્ર બાળકો જ નહીં, પરંતુ મહિલા કલ્યાણ અને પોષણક્ષમ આહાર પર વિશેષ ભાર મૂકવામાં આવ્યો હતો. મુખ્યમંત્રીના હસ્તે સગર્ભા બહેનો, કિશોરીઓ તેમજ ૬ માસથી ૩ વર્ષ સુધીના બાળકોને ‘ટેક હોમ રેશન’ (THR) નું વિતરણ કરવામાં આવ્યું હતું, જેથી કુપોષણ સામેની લડાઈને વધુ મજબૂત બનાવી શકાય.
આ સાથે જ, આંગણવાડીના જે બાળકોના પોષણ સ્તરમાં નોંધપાત્ર સુધારો થયો છે અથવા તો જેમનું પોષણ સ્તર ઉત્તમ રીતે જળવાઈ રહ્યું છે, તેવા તેજસ્વી બાળકોને પ્રોત્સાહિત કરવા માટે મુખ્યમંત્રીના હસ્તે ‘પોષણ ચેમ્પિયન એવોર્ડ’ પણ એનાયત કરવામાં આવ્યા હતા. આ પહેલથી માતાઓ અને બાળકોમાં પોષણયુક્ત આહાર પ્રત્યે જાગૃતિ વધશે.
ઉત્કૃષ્ઠ કામગીરી કરનાર આંગણવાડી કાર્યકરો અને આશાવર્કરોનું સન્માન
કોઈપણ યોજનાને સફળ બનાવવામાં જમીની સ્તરે કામ કરતા કર્મચારીઓની ભૂમિકા સૌથી મહત્વપૂર્ણ હોય છે. આ બાબતને ધ્યાનમાં રાખીને, મુખ્યમંત્રી ભૂપેન્દ્ર પટેલે ઉત્કૃષ્ઠ અને પ્રશંસનીય કામગીરી કરનાર આંગણવાડી કાર્યકરો, તેડાગર બહેનો અને આશાવર્કરોને સન્માનિત કર્યા હતા.
મુખ્યમંત્રીએ બાળકો અને તેમના વાલીઓ સાથે ખૂબ જ હૂંફાળા વાતાવરણમાં સંવાદ સાધ્યો હતો. તેમણે વાલીઓ પાસેથી આંગણવાડી દ્વારા પૂરી પાડવામાં આવતી સેવાઓની નિયમિતતા અને તેની ગુણવત્તા વિશે સીધી જાણકારી મેળવી હતી, જેથી સેવામાં વધુ સુધારો કરી શકાય.
ગરિમાપૂર્ણ ઉપસ્થિતિ અને લોકકલ્યાણનો સંદેશ
આ કાર્યક્રમમાં રાજ્ય અને સ્થાનિક વહીવટી તંત્રના અનેક અગ્રણી મહાનુભાવો ઉપસ્થિત રહ્યા હતા. જેમાં અમદાવાદ શહેરના મેયર હિતેશભાઈ બારોટ, કલેક્ટર ભવ્ય વર્મા, ડેપ્યુટી મેયર અંજુબહેન શાહ, સ્ટેન્ડિંગ કમિટીના ચેરમેન કમલેશભાઈ પટેલ તેમજ મહિલા અને બાળ વિકાસ વિભાગના ઉચ્ચ અધિકારીઓ, મ્યુનિસિપલ કોર્પોરેશનના પદાધિકારીઓ અને કર્મચારીઓ વિશેષ રૂપે જોડાયા હતા. આ ઉપરાંત, મોટી સંખ્યામાં સ્થાનિક વાલીઓ અને બાળકો પણ આ ઉત્સવના સાક્ષી બન્યા હતા.
