Adani સ્વચ્છ ઉર્જા ક્ષેત્રે ભારતનો નવો દબદબો: આગામી ૫ વર્ષમાં ૫૦ GWh સ્ટોરેજ ક્ષમતા હાંસલ કરશે અદાણી ગ્રીન
Adani ભારતની અગ્રણી અને દેશની સૌથી મોટી રિન્યુએબલ એનર્જી કંપની ‘અદાણી ગ્રીન એનર્જી લિમિટેડ’ (AGEL) એ સ્વચ્છ ઊર્જા ક્ષેત્રે એક અદ્ભુત અને ઐતિહાસિક સિદ્ધિ સર કરી છે. કંપનીએ ગુજરાતના કચ્છ સ્થિત ખાવડા ખાતે આવેલી પોતાની બેટરી એનર્જી સ્ટોરેજ સિસ્ટમ (BESS) ની કાર્યરત ક્ષમતા જૂન ૨૦૨૬ ના ૩.૫૫ GWh થી વધારીને ૬.૬૩ ગીગાવોટ-અવર (GWh) કરી દીધી છે. આ સાથે ભારતની અંદાજિત ૧૨.૬ GWh ની કુલ કાર્યરત BESS ક્ષમતામાં એકલી અદાણી ગ્રીન એનર્જીનો હિસ્સો હવે ૫૦ ટકા કરતાં પણ વધી ગયો છે. આ સિદ્ધિ સાથે ખાવડા સ્થિત આ પ્લાન્ટ વિશ્વના એક જ સ્થળે સ્થિત સૌથી મોટા કાર્યરત બેટરી એનર્જી સ્ટોરેજ ઇન્સ્ટોલેશન તરીકે મજબૂત રીતે સ્થાપિત થયો છે.
માત્ર ૧૪ મહિનામાં મેળવી અભૂતપૂર્વ સફળતા
અદાણી ગ્રીને કચ્છના ખાવડા ખાતે BESS નું ઓન-સાઇટ નિર્માણ કાર્ય શરૂ કર્યાના આશરે ૧૪ મહિના જેટલા ટૂંકા સમયગાળામાં જ ૬.૬૩ GWh નો આ મહત્વાકાંક્ષી આંકડો હાંસલ કરી બતાવ્યો છે. ખાસ વાત એ છે કે, ક્ષમતામાં કરવામાં આવેલો તાજેતરનો આ મોટો વધારો નિર્માણ કાર્યના પ્રારંભથી માત્ર દસ મહિનાના સમયગાળામાં જ સફળતાપૂર્વક કાર્યરત કરી દેવામાં આવ્યો છે. કંપની દ્વારા ૫૩૮ ચોરસ કિલોમીટરની પડતર અને બિન-ઉપજાઉ જમીન પર વિકસાવવામાં આવી રહેલા ૩૦ ગીગાવોટ (GW) ના રિન્યુએબલ એનર્જી પ્રોજેક્ટ સાથે આ બેટરી સંગ્રહ સિસ્ટમને સીધી રીતે જોડી દેવામાં આવી છે.
દિલ્હી મેટ્રો અને ૨૦ લાખ ઘરોને વીજળી આપી શકે તેટલું વિશાળ કદ
અદાણી ગ્રીન એનર્જી લિ.ની આ ૬.૬૩ GWh ક્ષમતા ધરાવતી BESS સિસ્ટમ એટલી વિપુલ પ્રમાણમાં ગ્રીન એનર્જીનો સંગ્રહ કરી શકે છે કે તેનાથી દરરોજ આશરે ૨૦ લાખ ઘરોને સતત વીજ પુરવઠો પૂરો પાડી શકાય છે. આ સિવાય નાગપુર, પટના કે વિશાખાપટ્ટનમ જેવા મોટા શહેરોની વીજળીની ટોચની (પિક) માંગને પણ કેટલાય કલાકો સુધી સરળતાથી સંતોષી શકાય છે. ખાવડાના આ વિશાળ સ્ટોરેજ પ્રોજેક્ટનું કદ ૧,૫૦,૦૦૦ થી પણ વધુ મધ્યમ કદના ઇલેક્ટ્રિક વાહનો (EVs) ની બેટરી ક્ષમતાની સમકક્ષ છે. એટલું જ નહીં, તે દિલ્હી મેટ્રોની દૈનિક કુલ વીજ જરૂરિયાત કરતાં લગભગ બમણી ઊર્જાનો સંગ્રહ કરવા માટે સક્ષમ છે, જે આ સમગ્ર ઇન્સ્ટોલેશનના વિશાળ પાયાને સ્પષ્ટ રીતે દર્શાવે છે.
ગ્રીડ સ્થિરતા અને અદ્યતન ટેકનોલોજીનો સમન્વય
૬.૬૩ GWh સુધીનું આ ક્ષમતા વિસ્તરણ દેશની મુખ્ય વીજ ગ્રીડમાં સ્વચ્છ વીજળીનો સંગ્રહ કરવા અને માંગ અનુસાર તેનો પુરવઠો પૂરો પાડવાની શ્રેષ્ઠ સવલત આપે છે. આ પ્રોજેક્ટમાં ચાર્જિંગ અને ડિસ્ચાર્જિંગનું ચોક્કસ સંચાલન કરવા માટે લિથિયમ-આયન બેટરી ટેકનોલોજીનો ઉપયોગ કરવામાં આવ્યો છે, જે એનર્જી મેનેજમેન્ટ સિસ્ટમ્સ (EMS) અને ઓટોમેટેડ ટેલિમેટ્રી સાથે સંકલિત છે. અદ્યતન ડિજિટલ મોનિટરિંગ સિસ્ટમ્સ, કુશળ બાંધકામ વ્યવસ્થાપન અને વિશ્વના શ્રેષ્ઠ BESS OEM સાથેની વ્યૂહાત્મક ભાગીદારીને કારણે કંપની આટલા ઝડપી સમયમાં પ્રોજેક્ટ પૂર્ણ કરી શકી છે.
ભારતના ઉર્જા સંક્રમણમાં નવો અધ્યાય: સાગર અદાણી
Adani આ સિદ્ધિ અંગે ખુશી વ્યક્ત કરતા અદાણી ગ્રીન એનર્જીના એક્ઝિક્યુટિવ ડિરેક્ટર શ્રી સાગર અદાણીએ જણાવ્યું હતું કે, “ફક્ત ૧૪ મહિનામાં ૬.૬૩ GWh કાર્યરત બેટરી સ્ટોરેજના આંકડાને આંબવો એ અમારી કંપની માટે તો ખાસ છે જ, પરંતુ સાથોસાથ ભારતના સ્વચ્છ ઉર્જા સંક્રમણ (Clean Energy Transition) ના ક્ષેત્રમાં પણ એક ઐતિહાસિક સીમાચિહ્ન સમાન છે. જ્યારે પણ વીજ ગ્રીડને જરૂર પડશે ત્યારે આ સંગ્રહિત ઉર્જા નવીનીકરણીય ઉર્જાને વધુ મજબૂત, વિશ્વસનીય અને ડિસ્પેચેબલ બનાવશે.” તેમણે ઉમેર્યું હતું કે ભારતની ઝડપથી વધતી વીજ માંગને પહોંચી વળવા કંપની બેટરી અને પમ્પ્ડ સ્ટોરેજ બંને ક્ષેત્રે ઝડપી કામગીરી ચાલુ રાખશે.
આગામી ૫ વર્ષમાં ૫૦ GWh નો ધ્યેય
અદાણી ગ્રીન એનર્જી ચાલુ નાણાકીય વર્ષ ૨૬-૨૭ માં ૧૦ GWh થી વધુ નવી ક્ષમતા ઉમેરવાની દિશામાં ખૂબ ઝડપથી આગળ વધી રહી છે. કંપનીએ આગામી ૫ વર્ષના સમયગાળામાં કુલ ૫૦ GWh ની ભવ્ય સ્ટોરેજ ક્ષમતા હાંસલ કરવાનો મજબૂત રોડમેપ તૈયાર કર્યો છે, જે ભારતને વૈશ્વિક સ્તરે ગ્રીન એનર્જી હબ બનાવવા માટે મહત્વપૂર્ણ યોગદાન આપશે.
