અંબુજા સિમેન્ટ્સનો મોટો ધમાકો: દેશભરમાં ક્ષમતામાં ૩૦ મિલિયન ટનનો વધારો કરવા રૂ. ૧૪,૫૦૦ કરોડનું રોકાણ કરશે
ભારતના બિલ્ડિંગ મટિરિયલ ક્ષેત્રની અગ્રણી અને અદાણી ગ્રૂપની મહત્વની કંપની અંબુજા સિમેન્ટ્સે તેના વ્યવસાયિક વિસ્તરણના આગામી તબક્કાની જાહેરાત કરી છે. કંપનીએ દેશના મુખ્ય બજારોમાં પોતાની પહોંચ મજબૂત કરવા માટે ગ્રીનફિલ્ડ (નવા) અને બ્રાઉનફિલ્ડ (હાલના એકમોના વિસ્તરણ) પ્રકલ્પો દ્વારા પ્રતિ વર્ષ ૩૦ મિલિયન ટન (MTPA) નવી સિમેન્ટ ઉત્પાદન ક્ષમતા ઉમેરવાની યોજના આખરી કરી છે. આ મહત્વાકાંક્ષી વિસ્તરણ યોજના માટે કંપની અંદાજે રૂ. ૧૪,૫૦૦ કરોડનું મૂડીરોકાણ (Capex) કરશે.
પૂર્વ, પશ્ચિમ અને ઉત્તર ભારતમાં નેટવર્ક મજબૂત બનશે
હાલમાં અંબુજા સિમેન્ટ્સ ૨૪ સંકલિત પ્રકલ્પો અને ૨૪ ગ્રાઇન્ડિંગ એકમો સાથે વાર્ષિક ૧૧૩.૫ મિલિયન ટનની ઉત્પાદન ક્ષમતા ધરાવે છે. નવા વિસ્તરણ હેઠળ પૂર્વ, પશ્ચિમ અને ઉત્તર ક્લસ્ટરમાં ઉત્પાદન નેટવર્કનો વ્યાપ વધારવામાં આવશે.
પશ્ચિમ ક્લસ્ટર (૧૫.૫ MTPA): ગુજરાતના મુંદ્રા અને હજીરા (દરેકમાં ૨.૯ MTPA), મહારાષ્ટ્રના રાયગઢ, અમરાવતી અને કલ્યાણ (દરેકમાં ૨.૯ MTPA) તથા દહાણુમાં ૦.૭ MTPA ની ક્ષમતા ઉમેરાશે.
પૂર્વ ક્લસ્ટર (૧૧.૬ MTPA): આસામના રંગિયા અને હોજાઈ (દરેકમાં ૨.૯ MTPA), ઝારખંડના ગોડ્ડા (૨.૯ MTPA) અને બિહારના મુઝફ્ફરપુર (૨.૯ MTPA) માં નવી ગ્રાઇન્ડિંગ ક્ષમતા સ્થપાશે.
ઉત્તર ક્લસ્ટર (૨.૯ MTPA): ઉત્તર પ્રદેશના દાદરી ખાતે નવી ક્ષમતાનો ઉમેરો કરવામાં આવશે.
આ ઉપરાંત કાચા માલના પુરવઠાને સુનિશ્ચિત કરવા માટે આસામના ઉમરાંગસો (૪ MTPA), મહારાષ્ટ્રના મરાઠા (૪ MTPA) અને મુંદ્રા (૨.૩ MTPA) ખાતે કુલ ૧૦.૩ MTPA નવી ‘ક્લિન્કર’ ઉત્પાદન ક્ષમતા પણ વિકસાવવામાં આવશે.
૨૦૩૦ સુધીમાં ૧૫૫ મિલિયન ટન ક્ષમતાનો લક્ષ્યાંક
અદાણી ગ્રુપના સિમેન્ટ બિઝનેસના સીઈઓ શ્રી વિનોદ બાહેટીએ જણાવ્યું હતું કે, “અમારા વિસ્તરણનો આ આગામી તબક્કો સંતુલિત ઉત્પાદન નેટવર્ક અને ઉચ્ચ વૃદ્ધિ ધરાવતા બજારોની નજીક પહોંચવા પર કેન્દ્રિત છે. ઉત્પાદન એકમો બજારની નજીક હોવાથી લોજિસ્ટિક્સ ખર્ચમાં મોટો ઘટાડો થશે અને વ્યવસાયની સ્પર્ધાત્મકતા વધશે.” તેમણે ઉમેર્યું કે આ પગલાંથી નાણાકીય વર્ષ ૨૦૩૦ સુધીમાં કંપનીની એકંદર ઉત્પાદન ક્ષમતા વધીને વાર્ષિક ૧૫૫ મિલિયન ટન સુધી પહોંચી જશે.
નજીકના ભવિષ્યની યોજનાઓ અને વર્તમાન પ્રગતિ
કંપનીના જણાવ્યા મુજબ, ચાલુ નાણાકીય વર્ષના પ્રથમ છ મહિનામાં દહેજ (ગુજરાત), સલઈ બાનવા (યુપી) અને કલંબોલી (મહારાષ્ટ્ર) ખાતે કુલ ૪.૬ MTPA ક્ષમતા ઉમેરવામાં આવી ચૂકી છે. આ ઉપરાંત, ચાલુ નાણાકીય વર્ષના બાકીના સમયગાળામાં પંજાબના ભટિંડા, રાજસ્થાનના જોધપુર અને બિહારના વારિસલીગંજ ખાતેના એકમો કાર્યરત થતાં કંપનીની ક્ષમતા ૧૧૯ મિલિયન ટન સુધી પહોંચવાની ધારણા છે.
અદાણી ગ્રૂપ દ્વારા હસ્તગત કર્યા બાદ અંબુજા સિમેન્ટ્સે અત્યાર સુધીમાં ૧૧ પ્રકલ્પો સફળતાપૂર્વક પૂર્ણ કર્યા છે, જેનાથી તેની ભૌગોલિક પહોંચ અને ઉત્પાદન ક્ષમતામાં અભૂતપૂર્વ વધારો થયો છે.
