અદાણી ફાઉન્ડેશનનું ૩ દાયકાનું સામાજિક યોગદાન: ૨૨ રાજ્યોના ૭,૦૦૦ ગામડાઓમાં ૧.૩૦ કરોડ લોકોના જીવન પર સકારાત્મક અસર
સાંસ્કૃતિક અને આધ્યાત્મિક વિરાસતના વૈશ્વિક કેન્દ્ર સમાન પવિત્ર નગરી વારાણસી ખાતે ૨ નવેમ્બર, ૨૦૨૬ ના રોજ “આધુનિક પડકારો માટે પ્રાચીન શાણપણ” વિષય પર એક ભવ્ય અને ઐતિહાસિક વિશ્વ પરિસંવાદનું ઉદ્ઘાટન કરવામાં આવ્યું હતું. આ આંતરરાષ્ટ્રીય સંગોષ્ઠીના ઉદ્ઘાટન સમારોહમાં અદાણી ફાઉન્ડેશનના અધ્યક્ષા ડૉ. પ્રીતિ અદાણીએ મુખ્ય વક્તા તરીકે હાજરી આપી હતી. પોતાના સંબોધનમાં તેમણે સ્પષ્ટપણે જણાવ્યું હતું કે પૌરાણિક ડહાપણ અને સભ્યતાનું જ્ઞાન માત્ર એટલા માટે જ પૂજનીય કે મૂલ્યવાન નથી કે તે અતિ પ્રાચીન છે, પરંતુ તેની ખરી કિંમત અને સાર્થકતા ત્યારે જ સાબિત થાય છે જ્યારે આપણે વર્તમાન સમયની જટિલ સમસ્યાઓ અને માનવ જીવનના સુધારા સાથે તેની સુસંગતતા શોધી કાઢીએ છીએ.
પ્રાચીન ફિલસૂફી અને વસુધૈવ કુટુંબકમનો સમન્વય
ડૉ. પ્રીતિ અદાણીએ સભ્યતાના જ્ઞાનને સાચવવા તેમજ દુઃખ, સામાજિક અસમાનતા અને વૈશ્વિક સંઘર્ષોનો ઉકેલ લાવવા માટે તેનો વ્યવહારિક અમલ કરવાની જોરદાર હિમાયત કરી હતી. તેમણે પોતાના ભાષણમાં ગ્રીક ફિલોસોફર એરિસ્ટોટલના માનવ વિકાસ પરના વિચારો, માનવ દુઃખના નિવારણ માટે માર્ગ દર્શાવનારા ભગવાન બદ્ધના ઉપદેશો તેમજ નૈતિક આચરણ, જવાબદારી અને સામાજિક સંવાદિતા પર ભાર મૂકનારા પ્રાચીન ચીની ફિલોસોફર કન્ફ્યુશિયસના જીવન સિદ્ધાંતોનો ખાસ ઉલ્લેખ કર્યો હતો.
તેમણે ઉમેર્યું હતું કે આ તમામ મહાન આંતરરાષ્ટ્રીય વિચારકોની પરંપરાઓને ભારતની સનાતન વિભાવના ‘વસુધૈવ કુટુંબકમ’ (સમગ્ર વિશ્વ એક પરિવાર છે) સાથે સાંકળીને જીવન સુધારણા અને ટકાઉ વિકાસને આગળ ધપાવવો જોઈએ. ડૉ. અદાણીએ કહ્યું કે, “જ્ઞાન આપણને દુનિયા બદલવાની તાકાત આપે છે, પરંતુ આપણું શાણપણ અને વિવેક એ વાતની ખાતરી આપે છે કે આપણે આ દુનિયાને વધુ સુંદર અને બહેતર ભવિષ્ય માટે બદલી રહ્યા છીએ.”
૩ દાયકાની સેવા યાત્રા અને ભારત નોલેજ ગ્રાફ
પોતાના સંબોધનમાં અદાણી ફાઉન્ડેશનના ત્રણ દાયકાના સામુદાયિક વિકાસ કાર્યોની યાત્રા પર પ્રકાશ પાડતાં ડૉ. પ્રીતિ અદાણીએ ભારપૂર્વક જણાવ્યું કે સાચી પ્રગતિનું માપદંડ ભૌતિક આંકડાઓ નથી, પરંતુ સામાન્ય લોકોના જીવન પર પડેલી સકારાત્મક અસર છે. ૧૯૯૬માં સ્થપાયેલું અદાણી ફાઉન્ડેશન આજે દેશના ૨૨ રાજ્યોના ૭,૦૦૦ થી વધુ ગામડાઓમાં કાર્યરત છે, જેણે ૧.૩૦ કરોડથી વધુ લોકોના જીવનને સકારાત્મક રીતે સ્પર્શ્યું છે.
આ પ્રસંગે તેમણે ૧ કરોડ ડોલરના સમર્થનથી તૈયાર થઈ રહેલા ‘ભારત નોલેજ ગ્રાફ’ નો પણ ઉલ્લેખ કર્યો હતો. આ વિશિષ્ટ પ્રોજેક્ટ ભારતીય સભ્યતાના અખૂટ જ્ઞાનને વિવિધ આંતરશાખાકીય સંશોધનો માટે સરળતાથી ઉપલબ્ધ કરાવશે અને હાલમાં ૧૪ ડોક્ટરલ વિદ્વાનોને ટેકો આપી રહ્યો છે.
https://drive.google.com/drive/folders/1MchySz-tL6ggt39T5ywc8SqXUfMAQ5f9
વૈશ્વિક અર્થતંત્રમાં ભારતનો વધતો દબદબો
પરિસંવાદમાં યુએન સસ્ટેનેબલ ડેવલપમેન્ટ સોલ્યુશન્સ નેટવર્કના પ્રમુખ અને કોલંબિયા યુનિવર્સિટીના પ્રો. જેફરી ડી. સૅક્સે “ધ રીટર્ન ઓફ અ મલ્ટીપોલર વર્લ્ડ” વિષય પર વૈશ્વિક આર્થિક શક્તિના બદલાતા સંતુલન વિશે ઊંડાણપૂર્વક વાત કરી હતી. તેમણે આંકડાકીય માહિતી આપતાં જણાવ્યું કે વૈશ્વિક ઉત્પાદનમાં ભારતનો હિસ્સો વર્ષ ૨૦૦૦માં જે માત્ર ૫.૨% હતો, તે વર્ષ ૨૦૨૬માં વધીને ૮.૫% પર પહોંચી ગયો છે. તેમનું અનુમાન છે કે વર્ષ ૨૦૫૦ સુધીમાં ભારતનો હિસ્સો ૧૩.૧% અને ૨૧૦૦ સુધીમાં ૧૫.૧% થઈ જશે.
પ્રો. જેફરીએ જણાવ્યું કે ૨૧૦૦ સુધીમાં અમેરિકા, કેનેડા અને યુરોપનો સંયુક્ત આર્થિક હિસ્સો ઘટીને ૧૩.૭% થઈ જશે અને વૈશ્વિક અર્થતંત્રનું કેન્દ્ર એશિયા અને આફ્રિકા તરફ શિફ્ટ થશે. તેમણે ભારતના માળખાકીય વિકાસ અને દેશની પ્રગતિમાં અદાણી ગ્રુપ અને અદાણી ફાઉન્ડેશનની ભૂમિકાની સરાહના કરી હતી.
સાંસ્કૃતિક પુનરુત્થાન અને AI નો ઉપયોગ
આ પ્રસંગે ભારત સરકારના સંસ્કૃતિ મંત્રાલયના સચિવ વિવેક અગ્રવાલે જણાવ્યું હતું કે ભારતની સંસ્કૃતિ અને જ્ઞાન પરંપરા અવિરત છે. તેને વધુ સુલભ બનાવવા માટે આર્ટિફિશિયલ ઇન્ટેલિજન્સ (AI) નો ઉપયોગ કરી શકાય છે. AI ના માધ્યમથી પ્રાચીન ગ્રંથોની ઊંડી સમજ કેળવીને નવી પેઢી સુધી ભારતીય વિરાસત પહોંચાડી શકાશે.
કોલંબિયા યુનિવર્સિટીના વરિષ્ઠ સંશોધક ડૉ. નિરુપમ બાજપાઈએ સ્વાગત પ્રવચનમાં પરિસંવાદ માટે વડાપ્રધાન નરેન્દ્ર મોદી દ્વારા પાઠવવામાં આવેલા શુભેચ્છા સંદેશનો પાઠ કર્યો હતો. તેમણે યાદ અપાવ્યું હતું કે આ વૈશ્વિક સંવાદ શ્રેણી અગાઉ ૨૦૨૨ અને ૨૦૨૩માં ગ્રીસ (એથેન્સ અને સ્ટેગિરા) તેમજ ૨૦૨૪માં ચીન (કુફુ અને બેઇજિંગ) ખાતે યોજાઈ હતી, અને હવે આ વૈશ્વિક કારવાં વારાણસીની પવિત્ર ભૂમિ પર પહોંચ્યું છે.
