ડોનાલ્ડ ટ્રમ્પના નજીકના સહયોગી ચાર્લી કિર્કની હત્યા: ભારતીયો પરનું તેમનું નિવેદન ફરી ચર્ચામાં
અમેરિકાના રાજકારણમાં સક્રિય અને પૂર્વ રાષ્ટ્રપતિ ડોનાલ્ડ ટ્રમ્પના નજીકના સહયોગી રહેલા ચાર્લી કિર્કની બુધવારે ગોળી મારીને હત્યા કરી દેવામાં આવી. યુટા યુનિવર્સિટીમાં એક કોલેજ કાર્યક્રમ દરમિયાન તેમના પર ગોળીબાર થયો, જેમાં તેમનું ઘટનાસ્થળે જ મૃત્યુ થયું. આ ઘટનાએ અમેરિકી સમાજ અને રાજકારણ બંનેમાં હલચલ મચાવી દીધી છે. ચાર્લી કિર્ક જમણેરી વિચારધારાના મુખ્ય ચહેરાઓમાંથી એક હતા અને યુવાનોમાં તેમની લોકપ્રિયતા ઘણી વધારે હતી.
તેમની હત્યા બાદ તાજેતરમાં ભારતીય પ્રવાસીઓ વિશે આપેલું તેમનું નિવેદન ફરી ચર્ચામાં આવ્યું છે. થોડા દિવસો પહેલાં તેમણે કહ્યું હતું કે, “અમેરિકા હવે ભરાઈ ગયું છે અને અમને ભારતથી વધુ વિઝાની કોઈ જરૂર નથી.” તેમણે એવો પણ દાવો કર્યો હતો કે કાયદેસર ઇમિગ્રેશનના ઘણા સ્વરૂપોમાંથી, ભારતથી આવતા લોકોએ અમેરિકી કામદારો પર સૌથી વધુ દબાણ ઊભું કર્યું છે. તેમના મતે હવે અમેરિકાએ પોતાના લોકોને પ્રાથમિકતા આપવી જોઈ
ચાર્લી કિર્કે આ નિવેદન 2 સપ્ટેમ્બરે એક્સ (પહેલાં ટ્વિટર) પર કર્યું હતું. તેમણે ફોક્સ ન્યૂઝની એન્કર લૌરા ઇંગ્રામની એક પોસ્ટ પર પ્રતિક્રિયા આપતા આ વાત લખી હતી. ઇંગ્રામે કહ્યું હતું કે ભારત સાથેના કોઈપણ વેપાર કરારની સ્થિતિમાં અમેરિકાએ વધુ વિઝા આપવા પડી શકે છે. તેના પર કિર્કે જવાબ આપ્યો હતો કે તેઓ કોઈપણ સ્થિતિમાં ભારત માટે વિઝા વધારવાનું સમર્થન કરતા નથી, કારણ કે તેનાથી અમેરિકન નાગરિકોના હિતોને નુકસાન થશે.
કિર્કનું સંગઠન અને લોકપ્રિયતા
ચાર્લી કિર્ક યુવાનો માટે બનાવાયેલા સંગઠન “ટર્નિંગ પોઈન્ટ યુએસએ”ના સહ-સ્થાપક અને CEO હતા. આ સંગઠન અમેરિકામાં કન્ઝર્વેટિવ (conservative) વિચારધારાને પ્રોત્સાહન આપવા માટે જાણીતું છે. તેમની લોકપ્રિયતા ખાસ કરીને કોલેજ વિદ્યાર્થીઓ અને યુવા વર્ગમાં ખૂબ જ હતી. તેઓ ઘણીવાર ખુલ્લા મંચો અને મીડિયા પર ઇમિગ્રેશન, રોજગાર અને અમેરિકી સમાજ સાથે જોડાયેલા મુદ્દાઓ પર પોતાના વિવાદાસ્પદ નિવેદનો આપતા રહ્યા છે.
ટ્રમ્પે દુઃખ વ્યક્ત કર્યું
તેમની હત્યાના સમાચાર સૌથી પહેલાં ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ “ટ્રુથ સોશિયલ” પર શેર કર્યા. ટ્રમ્પે લખ્યું કે, “ચાર્લી યુવાનોની ભાવનાઓને સૌથી સારી રીતે સમજતા હતા. તેઓ મારા ખૂબ નજીક હતા અને અમારા સૌના પ્રિય હતા. તેમનું મૃત્યુ મારા અને મારા પરિવાર માટે એક ઊંડો આઘાત છે.” તેમણે પોતાની પત્ની મેલાનિયા સાથે ચાર્લીની પત્ની એરિકા અને પરિવાર પ્રત્યે ઊંડી સંવેદનાઓ વ્યક્ત કરી.
