એલોન મસ્કે પોતાના પુત્રનું નામ ‘શેખર’ રાખ્યું, પાર્ટનરના ભારત સાથેના ખાસ જોડાણનો પણ કર્યો ઉલ્લેખ
અબજોપતિ ઉદ્યોગપતિ એલોન મસ્કે એક મોટો ખુલાસો કરતાં જણાવ્યું છે કે તેમના એક પુત્રનું મિડલ નામ ‘શેખર’ છે, જેનું નામ પ્રસિદ્ધ ભારતીય-અમેરિકન વૈજ્ઞાનિક અને નોબેલ પુરસ્કાર વિજેતા સુબ્રહ્મણ્યન ચંદ્રશેખરના સન્માનમાં રાખવામાં આવ્યું છે.
સ્પેસએક્સ (SpaceX)ના સીઈઓ એલોન મસ્કે કહ્યું છે કે તેમની પાર્ટનર શિવોન ઝિલિસ (Shivon Zilis) અડધી ભારતીય છે અને તેમણે તેમના એક બાળકનું મિડલ નામ નોબેલ પુરસ્કાર વિજેતા સુબ્રહ્મણ્યન ચંદ્રશેખરના નામ પરથી ‘શેખર’ રાખ્યું છે. મસ્કે આ વાત ઝીરોધાના કો-ફાઉન્ડર નિખિલ કામતની પોડકાસ્ટમાં કહી હતી. ઝિલિસ અને મસ્કને ચાર બાળકો છે. ઝિલિસ મસ્કની એક કંપની ન્યુરાલિંક (Neuralink)માં ‘ઓપરેશન્સ અને સ્પેશિયલ પ્રોજેક્ટ્સ’માં ડાયરેક્ટર છે.
મસ્કે શું કહ્યું?
મસ્કે ઝીરોધાના સહ-સ્થાપક નિખિલ કામથના કાર્યક્રમ ‘પીપલ બાય ડબલ્યુટીએફ’માં આપેલા ઇન્ટરવ્યુમાં કહ્યું, “ઝિલિસ સાથે મારો એક દીકરો છે, તેનું મધ્ય નામ ચંદ્રશેખરના નામ પરથી શેખર રાખવામાં આવ્યું છે.”
એસ. ચંદ્રશેખર એક જાણીતા ભારતીય-અમેરિકન ખગોળ ભૌતિક વિજ્ઞાની (Astrophysicist) હતા, જેમને “તારાઓની રચના અને વિકાસ માટે મહત્વપૂર્ણ ભૌતિક પ્રક્રિયાઓ પરના તેમના સૈદ્ધાંતિક અભ્યાસો” માટે ૧૯૮૩માં ભૌતિકશાસ્ત્રનો નોબેલ પુરસ્કાર આપવામાં આવ્યો હતો.
ઝિલિસના ભારત જોડાણ વિશે મસ્ક શું બોલ્યા?
જ્યારે મસ્કને પૂછવામાં આવ્યું કે શું ઝિલિસ ભારતમાં રહી છે, ત્યારે તેમણે કહ્યું કે જ્યારે તે નાની હતી ત્યારે જ તેને દત્તક લેવામાં આવી હતી અને તે કેનેડામાં ઉછરી છે. તેમણે કહ્યું, “મને લાગે છે કે તેમના પિતા યુનિવર્સિટીમાં ભણવા આવ્યા હતા, અથવા કંઈક આવું જ રહ્યું હશે. મને તેની સંપૂર્ણ જાણકારી નથી. તેણીને (ઝિલિસને) દત્તક લેવામાં આવી છે.” આના પરથી સ્પષ્ટ થાય છે કે ઝિલિસના મૂળ ભારતીય છે, ભલે તે કેનેડામાં મોટી થઈ હોય.
શિવોન ઝિલિસ વિશે જાણો
શિવોન ઝિલિસ લાંબા સમયથી ટેકનોલોજી અને આર્ટિફિશિયલ ઈન્ટેલિજન્સ (AI) ક્ષેત્રે કામ કરી રહી છે.
- તેમણે ૨૦૧૭માં ન્યુરાલિંક જોઈન કર્યું અને હાલમાં તેઓ કંપનીના ડાયરેક્ટર ઓફ ઓપરેશન્સ એન્ડ સ્પેશિયલ પ્રોજેક્ટ્સ છે.
- તેમણે યેલ યુનિવર્સિટીમાંથી અર્થશાસ્ત્ર અને ફિલોસોફીનો અભ્યાસ કર્યો છે અને આઇસ હોકી ટીમમાં ગોલકીપર પણ રહી ચૂકી છે.
- આ પછી તેમણે IBM અને Bloombergમાં કામ કર્યું અને પછી વેન્ચર કેપિટલ (Venture Capital)માં પ્રવેશ કર્યો.
- ૨૦૧૬માં તેમણે AI પર ધ્યાન કેન્દ્રિત કર્યું અને ઓપનએઆઈ (OpenAI) સાથે જોડાઈ, જ્યાં તે બોર્ડ ઓફ ડાયરેક્ટર્સની સૌથી યુવા સભ્ય બની હતી.
મસ્કે ભારતીય પ્રોફેશનલ્સની સરાહના કરી
આ જ પોડકાસ્ટમાં મસ્કે અમેરિકામાં ભારતીય પ્રોફેશનલ્સની ભૂમિકાને ખૂબ વખાણી. તેમણે કહ્યું, “મારું માનવું છે કે અમેરિકાને પ્રતિભાશાળી ભારતીયોથી ઘણો લાભ થયો છે.”
H-1B વિઝા પર વાત કરતા તેમણે કહ્યું કે “એ કહેવું યોગ્ય છે કે H-1B કાર્યક્રમનો થોડોક દુરુપયોગ થયો છે.” જોકે, તેમણે એમ પણ કહ્યું કે, “મને નથી લાગતું કે આપણે H-1B કાર્યક્રમ બંધ કરી દેવો જોઈએ. મને લાગે છે કે આવું કરવું ખરેખર ખૂબ ખરાબ હશે.”
