કેન્સરની સારવારમાં મોટી સફળતા: જાપાની દેડકાના આંતરડામાં મળ્યા ‘જાદુઈ બેક્ટેરિયા’, માત્ર એક ઈન્જેક્શનથી ટ્યુમર ગાયબ!
વિશ્વભરમાં કેન્સરના વધતા જતા કેસો વચ્ચે જાપાનના વૈજ્ઞાનિકોએ એક આશાસ્પદ અને ચોંકાવનારી શોધ કરી છે. જાપાન એડવાન્સ ઇન્સ્ટિટ્યૂટ ઓફ સાયન્સ એન્ડ ટેકનોલોજી (JAIST) ના સંશોધકોએ શોધી કાઢ્યું છે કે જાપાનીઝ ટ્રી ફ્રોગ (દેડકા) ના આંતરડામાં જોવા મળતા એક ખાસ પ્રકારના બેક્ટેરિયા ‘કોલોરેક્ટલ કેન્સર’ (આંતરડાનું કેન્સર) ને મૂળમાંથી ખતમ કરવાની ક્ષમતા ધરાવે છે.
શું છે આ ‘જાદુઈ’ બેક્ટેરિયા?
રિપોર્ટ અનુસાર, આ સંશોધનમાં દેડકાના આંતરડામાંથી ઇવિંગેલા અમેરિકાના નામના બેક્ટેરિયા મળી આવ્યા છે. જ્યારે વૈજ્ઞાનિકોએ ઉંદરો પર આ બેક્ટેરિયાનું પરીક્ષણ કર્યું ત્યારે પરિણામો આશ્ચર્યજનક હતા. ઉંદરના મોડેલ પર કરવામાં આવેલા પરીક્ષણમાં જાણવા મળ્યું કે આ બેક્ટેરિયાના માત્ર એક ઇન્જેક્શનથી કેન્સરની ગાંઠ સંપૂર્ણપણે ખતમ થઈ ગઈ.
કેવી રીતે કામ કરે છે આ બેક્ટેરિયા?
પરંપરાગત સારવાર જેવી કે કીમોથેરાપી અથવા રેડિયેશન ઘણીવાર શરીરના તંદુરસ્ત કોષોને પણ નુકસાન પહોંચાડે છે. પરંતુ આ નવા શોધાયેલા બેક્ટેરિયાની કાર્યપદ્ધતિ અલગ છે:
- ટાર્ગેટ એટેક: આ બેક્ટેરિયા સીધા કેન્સરગ્રસ્ત કોષો પર હુમલો કરે છે.
- રોગપ્રતિકારક શક્તિમાં વધારો: તે શરીરની ઈમ્યુન સિસ્ટમને જાગૃત કરે છે, જેથી શરીર પોતે જ કેન્સરના કોષો સામે લડવા સક્ષમ બને છે.
- ઓછી આડઅસર: કુદરતી સ્ત્રોત હોવાને કારણે, તે કીમોથેરાપીની સરખામણીએ ઘણી ઓછી આડઅસર કરે તેવી શક્યતા છે.
યુવાનોમાં વધતા કોલોરેક્ટલ કેન્સર માટે આશાનું કિરણ
આજના સમયમાં બદલાતી જીવનશૈલી અને જંક ફૂડના કારણે યુવાનોમાં કોલોરેક્ટલ કેન્સર (મોટા આંતરડા અને મળાશયનું કેન્સર) ખૂબ ઝડપથી વધી રહ્યું છે. આ કેન્સરના ઘણા કિસ્સાઓમાં કીમોથેરાપી કે ઈમ્યુનોથેરાપી પણ નિષ્ફળ જાય છે. આવા ગંભીર સંજોગોમાં જાપાની વૈજ્ઞાનિકોની આ શોધ આશીર્વાદરૂપ સાબિત થઈ શકે છે.
શું કહે છે નિષ્ણાતો?
જાપાની સંશોધકોના મતે, આ બેક્ટેરિયા અન્ય પ્રકારના કેન્સરની સારવારમાં પણ મદદરૂપ થઈ શકે છે કે કેમ તે અંગે વધુ તપાસ ચાલુ છે. જોકે, માનવીઓ પર ક્લિનિકલ ટ્રાયલ શરૂ થતા હજુ થોડો સમય લાગશે, પરંતુ પ્રારંભિક સફળતાએ મેડિકલ સાયન્સમાં નવી આશા જન્માવી છે.
વૈજ્ઞાનિકો માને છે કે જો આ સારવાર સફળ રહી, તો ભવિષ્યમાં કેન્સરની સારવાર અત્યંત સસ્તી અને સરળ બની જશે. કીમોથેરાપીની લાંબી અને પીડાદાયક પ્રક્રિયામાંથી દર્દીઓને મુક્તિ મળી શકે છે.
