આંબાના મોરના સંવેદનશીલ તબક્કે વરસાદથી બચાવ માટે ફૂગનાશક અને પોષક તત્વોની ભલામણ
હવામાન ખાતાની આગાહી મુજબ, આગામી ૨૧ થી ૨૫ જાન્યુઆરી ૨૦૨૬ દરમિયાન દક્ષિણ ગુજરાતમાં વાદળછાયું વાતાવરણ અને હળવા કમોસમી વરસાદની શક્યતા છે. આ સમયગાળો આંબાના પાકમાં ‘મોર’ આવવાનો હોવાથી ખેડૂતો માટે અત્યંત નાજુક છે. વધુ ભેજ અને વરસાદને કારણે પરાગનયનની પ્રક્રિયા ખોરવાઈ શકે છે અને કેરીના બેસાણ પર માઠી અસર પડી શકે છે.
સંભવિત રોગો અને નુકસાન
કમોસમી વરસાદને કારણે આંબાવાડીઓમાં નીચે મુજબની સમસ્યાઓ સર્જાઈ શકે છે:
-
રોગનો ફેલાવો: પાઉડરી મિલ્ડ્યુ (ભૂકી છારો) અને એન્થ્રાક્નોઝ (કાળવણ) જેવા ફૂગજન્ય રોગોનું પ્રમાણ વધી શકે છે.
-
ફૂલ ખરવા: મોર લાંબો સમય ભીનો રહેવાથી ફૂલ અને નાની કણીઓ ખરી જવાની શક્યતા રહે છે.
-
ગુણવત્તા પર અસર: વધુ પડતા ભેજથી મોર કાળો પડી જઈ શકે છે.
બાગાયત વિભાગની ખેડૂતોને સલાહ
નુકસાન અટકાવવા માટે નાયબ બાગાયત નિયામક, વલસાડ દ્વારા નીચે મુજબના ઉપાયો સૂચવવામાં આવ્યા છે:
-
ફૂગનાશકનો છંટકાવ: વરસાદ પહેલા અથવા બંધ થયાના ૨૪ કલાકમાં કાર્બેંડેઝિમ (૧ ગ્રામ/લીટર) અથવા હેક્સાકોનાઝોલ (૧ મિલી/લીટર) અથવા વેટેબલ સલ્ફર (૨ ગ્રામ/લીટર) નો છંટકાવ કરવો.
-
સ્ટિકરનો ઉપયોગ: દવાની અસરકારકતા વધારવા માટે સ્પ્રેમાં સ્ટિકર અચૂક ભેળવવું.
-
પોષક તત્વો: મોરને મજબૂત બનાવવા માટે બોરોન (૦.૫%) અને ઝીંક (૦.૫%) નો છંટકાવ કરવો.
-
જળ નિકાસ: ખેતરમાં પાણી ભરાઈ ન રહે તે માટે નિકાલની યોગ્ય વ્યવસ્થા રાખવી.
ખેડૂતોને બપોરની ગરમીમાં છંટકાવ ટાળવા અને દવાનો યોગ્ય માત્રામાં જ ઉપયોગ કરવા અપીલ કરવામાં આવી છે.
