જૂનાગઢની જેબુનબેનના અંગદાનથી માનવતાનો સંદેશ, સિવિલ હોસ્પિટલમાં ટૂંકા ગાળામાં બે અંગદાનથી અનેક જીવ બચ્યા
૧૫ માર્ચના રોજ અમદાવાદ સિવિલ હોસ્પિટલના કોરિડોરમાં માનવતાનું એક અદ્ભુત દ્રશ્ય જોવા મળ્યું, જેણે ધર્મ અને જ્ઞાતિના વાડાઓને ઓગાળી દીધા. જૂનાગઢના કેશોદ પાસે માર્ગ અકસ્માતનો ભોગ બનેલા ૫૧ વર્ષીય જેબુનબેનને બ્રેઈનડેડ જાહેર કરવામાં આવતા તેમના પરિવારે અત્યંત કપરી ઘડીએ અંગદાનનો નિર્ણય લીધો હતો. પવિત્ર રમજાન માસ દરમિયાન જ્યારે મુસ્લિમ બિરાદરો ઇબાદતમાં લીન હોય છે, ત્યારે ચાવડા પરિવારે ‘માનવતાની સેવા’ને જ સાચી બંદગી માનીને જેબુનબેનના અંગોનું દાન કરી સમાજ માટે પ્રેરણારૂપ ઉદાહરણ પૂરું પાડ્યું છે.
પ્રાર્થના અને કલમાના ગુંજારવ વચ્ચે અંગદાનનો સેતુ
જેબુનબેનના પરિવારને અંગદાનનું મહત્વ સમજાવવામાં સામાજિક આગેવાન યાસ્મીનબેન વોરા અને સ્થાનિક મોલાનાશ્રીએ મહત્વની ભૂમિકા ભજવી હતી. જ્યારે જેબુનબેનને ઓર્ગન રીટ્રીવલ માટે લઈ જવામાં આવ્યા, ત્યારે હોસ્પિટલનો સ્ટાફ મૌન પ્રાર્થના કરી રહ્યો હતો અને સ્વજનો ભીની આંખે ‘કલમા’ પઢી રહ્યા હતા. આ હૃદયસ્પર્શી દ્રશ્યએ સાબિત કરી દીધું કે પીડા અને પુણ્યનો કોઈ અલગ ધર્મ હોતો નથી. જેબુનબેન દ્વારા દાનમાં મળેલી બે કિડની અને એક લીવર દ્વારા ત્રણ જરૂરિયાતમંદ દર્દીઓને નવું જીવન મળશે.
૧૪ કલાકમાં બે અંગદાનથી ૬ વ્યક્તિઓને નવજીવન
સિવિલ હોસ્પિટલમાં માત્ર ૧૪ કલાકના ટૂંકા ગાળામાં બે અંગદાનની પ્રક્રિયા સફળતાપૂર્વક પૂર્ણ થઈ હતી. જેબુનબેન ઉપરાંત, ૨૫ વર્ષીય એક યુવતી બ્રેઈનડેડ જાહેર થતા તેના પરિવારે પણ માનવતાવાદી અભિગમ અપનાવી અંગોનું ગુપ્તદાન કર્યું હતું. આમ, એક જ દિવસમાં થયેલા આ બે અંગદાનથી કુલ ૬ વ્યક્તિઓના જીવ બચાવવામાં સફળતા મળી છે. અત્યાર સુધીમાં મુસ્લિમ સમાજ તરફથી મળેલું આ નવમું અંગદાન છે, જે બદલાતી સામાજિક વિચારધારા અને વધતી જતી જાગૃતિની પ્રતીતિ કરાવે છે.
સિવિલ હોસ્પિટલની અંગદાન ક્ષેત્રે ઐતિહાસિક સિદ્ધિ
સિવિલ સુપ્રિટેન્ડન્ટ ડૉ. રાકેશ જોશીએ આ ઘટનાને ‘સામાજિક ક્રાંતિ’ ગણાવતા ધર્મગુરુઓ અને સામાજિક આગેવાનોના સહયોગને બિરદાવ્યો હતો. સિવિલ હોસ્પિટલમાં અત્યાર સુધીમાં ૨૩૧ દાતાઓ દ્વારા કુલ ૯૯૫ અંગો અને પેશીઓનું દાન પ્રાપ્ત થયું છે, જેના થકી ૭૪૨ જરૂરિયાતમંદોના જીવનમાં ફરીથી ખુશીઓ પાછી ફરી છે. રમજાનનો મહિમા ત્યાગ અને સમર્પણનો છે, અને જેબુનબેનનો આ મહાન ત્યાગ ત્રણ અજાણ્યા વ્યક્તિઓના શરીરમાં ધબકતો રહીને આ પવિત્ર માસની સાર્થકતા વધારતો રહેશે.
