માદક દ્રવ્યોના નેટવર્ક પર આકરી સર્જિકલ સ્ટ્રાઈક: ANTF ની રાષ્ટ્રીય સમિટમાં કેન્દ્રીય ગૃહમંત્રી અમિત શાહનું મોટું નિવેદન
દેશમાં માદક દ્રવ્યો અને નશીલા પદાર્થોના ગેરકાયદેસર વેપાર સામે વડાપ્રધાન નરેન્દ્ર મોદીના નેતૃત્વ હેઠળની કેન્દ્ર સરકારે હવે આરપારની લડાઈ શરૂ કરી દીધી છે. કેન્દ્રીય ગૃહમંત્રી અમિત શાહે દેશમાંથી ડ્રગ્સના દૂષણને સંપૂર્ણપણે નાબૂદ કરવા માટે એક અત્યંત મહત્વપૂર્ણ અને ઐતિહાસિક સમયમર્યાદા (Dead Line) ની જાહેરાત કરી છે. તેમણે મક્કમપણે જણાવ્યું હતું કે કેન્દ્ર સરકાર અને તમામ રાજ્યોના સંગઠિત પ્રયાસોથી આગામી ૩૧ ડિસેમ્બર, ૨૦૨૯ સુધીમાં ભારતમાંથી ડ્રગ્સના કાળા કારોબારને જડમૂળથી ઉખાડી ફેંકવામાં સફળતા મળશે.
કેન્દ્રીય ગૃહમંત્રીએ આ વાત એન્ટી-નાર્કોટિક્સ ટાસ્ક ફોર્સ (ANTF) ના વડાઓની ત્રીજી રાષ્ટ્રીય સમિટનું ઉદ્ઘાટન કરતી વખતે કહી હતી. તેમણે સ્પષ્ટ શબ્દોમાં ઉમેર્યું હતું કે માદક દ્રવ્યો આજે દેશની સુરક્ષા અને યુવાધન માટે સૌથી મોટો ખતરો બની ગયા છે, તેથી સરકારે હવે “લક્ષ્યો, સમયરેખા અને જવાબદારી” નક્કી કરીને આ મુશ્કેલ યુદ્ધને તેના અંતિમ તબક્કા સુધી પહોંચાડવાનો મક્કમ નિર્ધાર કર્યો છે.
ટીમ વર્ક અને મિશન મોડમાં કામગીરી કરવાની હાકલ
ANTF ની રાષ્ટ્રીય કોન્ફરન્સને સંબોધતા અમિત શાહે ભારપૂર્વક જણાવ્યું હતું કે ડ્રગ-મુક્ત ભારતનું આટલું મોટું લક્ષ્ય માત્ર કેન્દ્ર સરકાર એકલી હાથે હાંસલ કરી શકે નહીં. તેમણે સ્પષ્ટ કર્યું કે જ્યાં સુધી તમામ રાજ્ય સરકારો, તેમની સ્થાનિક પોલીસ એજન્સીઓ અને કેન્દ્રના તમામ સંબંધિત વિભાગો એક થઈને 31 ડિસેમ્બર, 2029 ની સમયમર્યાદા ધ્યાનમાં રાખીને કામ નહીં કરે, ત્યાં સુધી આપણે આ ક્ષેત્રમાં ઈચ્છિત પરિણામો મેળવી શકીશું નહીં. દેશના દરેક ખૂણેથી ડ્રગ્સના પુરવઠા અને વપરાશ બંનેને એકસાથે અટકાવવા જરૂરી છે.
દાયકાઓ જૂના જટિલ પડકારો પર વિજય મેળવવાનો દાવો
પોતાના સંબોધન દરમિયાન ગૃહમંત્રીએ છેલ્લા પાંચ વર્ષમાં ગૃહ મંત્રાલયની મુખ્ય સિદ્ધિઓનો ઉલ્લેખ કર્યો હતો. તેમણે જણાવ્યું હતું કે ભારતે દાયકાઓથી જે ગંભીર સુરક્ષા પડકારોનો સામનો કરવો પડ્યો હતો, તેમાં સકારાત્મક અને નિર્ણાયક સફળતા મેળવી છે. જમ્મુ-કાશ્મીરમાંથી આતંકવાદનો સફાયો, ઉત્તર-પૂર્વના રાજ્યોમાં બળવાખોરી પર અંકુશ અને દેશના વિવિધ ભાગોમાંથી નક્સલવાદને નબળો પાડવામાં બધા રાજ્યોના સહયોગથી સફળતા મળી છે. તેમણે ઉમેર્યું હતું કે જે રીતે આ દેશવ્યાપી પડકારોને પહોંચી વળવામાં આવ્યા છે, તે જ રીતે ડ્રગ્સના નેટવર્કને પણ નાબૂદ કરવામાં આવશે.
૨૦૪૭ ના ‘વિકસિત ભારત’ માટે સૌથી મુશ્કેલ લડાઈ
નશીલા પદાર્થો સામેના આ જંગને તમામ સુરક્ષા લડાઈઓમાં “સૌથી મુશ્કેલ લડાઈ” ગણાવતા અમિત શાહે કહ્યું હતું કે આપણે આ લડાઈ વચ્ચેથી છોડી શકીએ તેમ નથી. વર્ષ ૨૦૪૭ સુધીમાં ભારતને એક સંપૂર્ણ ‘વિકસિત ભારત’ બનાવવા માટે, દેશના કરોડો યુવાનોની ઊર્જાને રાષ્ટ્રનિર્માણ સાથે જોડવી અનિવાર્ય છે. ભાવિ પેઢીઓને બરબાદીથી બચાવવા માટે આપણી પાસે ભારતને સંપૂર્ણપણે ડ્રગ-મુક્ત બનાવવા સિવાય બીજો કોઈ વિકલ્પ નથી. પીએમ મોદીના નેતૃત્વમાં આ દિશામાં પહેલાથી જ અનેક કડક કાયદાકીય અને વ્યવસ્થાપકીય પગલાં લેવામાં આવ્યા છે.
માત્ર જપ્તી નહીં, આખા નેટવર્કને તોડી પાડવા પર ભાર
વ્યૂહાત્મક ફેરફારો અંગે વાત કરતા કેન્દ્રીય ગૃહમંત્રીએ નવો મંત્ર આપ્યો હતો. તેમણે કહ્યું કે, “આપણે હવે માત્ર મીટિંગ્સ કરવાને બદલે મિશન મોડમાં કામ કરવું પડશે. માત્ર રિપોર્ટિંગ કરવાથી કામ નહીં ચાલે પણ પરિણામો આપવા પડશે. માત્ર ડ્રગ્સ જપ્ત કરવાથી સંતોષ માનવાને બદલે તેના આખા સપ્લાય નેટવર્ક અને સિન્ડિકેટને તોડી પાડવું પડશે, અને માત્ર કેસ નોંધવાને બદલે આરોપીઓને કોર્ટ દ્વારા સજા અપાવવા સુધી કેસનો પીછો કરવો પડશે.”
તેમણે ANTF ની ત્રણેય પરિષદોનો ક્રમિક વિકાસ રેખાંકિત કરતા કહ્યું કે પ્રથમ સમિટમાં સંસ્થાકીય માળખું ઊભું કરવામાં આવ્યું હતું, બીજી સમિટમાં તે માળખાને કાર્યાન્વિત કરવા માટે ક્ષમતા અને સંસાધનો વધારવા પર ચર્ચા થઈ હતી, અને આ ત્રીજી પરિષદ આ આખા રોડમેપને એક નિર્ણાયક અને આક્રમક યુદ્ધમાં પરિવર્તિત કરી રહી છે.
ઉલ્લેખનીય છે કે આ અગાઉ મુંબઈ ખાતે એશિયાટિક સોસાયટીના ‘ગણેશ જ્ઞાનાર્થી’ વિશેષ હસ્તપ્રત પ્રદર્શનના ઉદ્ઘાટન પ્રસંગે અમિત શાહે જણાવ્યું હતું કે ભૂતકાળમાં ભારતના સમૃદ્ધ જ્ઞાન અને વિરાસતને નષ્ટ કરવાના અનેક પ્રયાસો કરવામાં આવ્યા હતા, પરંતુ ભારતીય સંસ્કૃતિ હંમેશા અમર રહી છે.
