અશોક વાસવાનીની વિદાય! હવે કોટક મહિન્દ્રા બેંકની કમાન સંભાળશે આ દિગ્ગજ દિગ્ગજ લીડર!
કોટક મહિન્દ્રા બેંકના વડપણમાં મોટો ફેરફાર થવા જઈ રહ્યો છે. બેંકના વર્તમાન મેનેજિંગ ડિરેક્ટર અને ચીફ એક્ઝિક્યુટિવ ઓફિસર (MD અને CEO) અશોક વાસવાણીનો કાર્યકાળ પૂરો થતાં હવે આગામી વર્ષ એટલે કે 1 જાન્યુઆરી 2027થી અનૂપ કુમાર સાહા બેંકની કમાન સંભાળશે. રિઝર્વ બેંક ઓફ ઇન્ડિયા (RBI) દ્વારા અનૂપ કુમાર સાહાની આ મહત્વપૂર્ણ પદ પર ત્રણ વર્ષ માટે નિમણૂકને મંજૂરી આપવામાં આવી છે. આ જાહેરાત બાદ બેંકના શેરોમાં પણ ઉત્સાહ જોવા મળ્યો છે.
અશોક વાસવાનીની વિદાય અને નવું નેતૃત્વ
આ પદ એટલા માટે ખાલી થયું કારણ કે વર્તમાન MD અને CEO અશોક વાસવાનીએ જૂન 2026માં જ બોર્ડને સ્પષ્ટ કરી દીધું હતું કે અંગત કારણોસર તેઓ 31 ડિસેમ્બરે પોતાનો કાર્યકાળ પૂરો થયા બાદ આગળ જવાબદારી સંભાળવા માંગતા નથી. વાસવાનીએ જાન્યુઆરી 2024માં આ જવાબદારી સ્વીકારી હતી. હવે તેમની જગ્યા લેવા માટે અનૂપ કુમાર સાઆનું નામ ફાઇનલ થયું છે, જેઓ હાલમાં બેંકમાં હોલ-ટાઇમ ડિરેક્ટર તરીકે સેવા આપી રહ્યા છે.
કોણ છે અનૂપ કુમાર સાહા? (શિક્ષણ અને બેકગ્રાઉન્ડ)
અનૂપ કુમાર સાહાએ દેશની પ્રતિષ્ઠિત સંસ્થાઓમાંથી ઉચ્ચ શિક્ષણ મેળવ્યું છે. તેમણે IIT ખડગપુરમાંથી એન્જિનિયરિંગમાં B.Tech અને ત્યારબાદ IIM લખનૌમાંથી MBAની ડિગ્રી પ્રાપ્ત કરી છે. પોતાની કરિયરની શરૂઆતમાં તેમણે ભારત હેવી ઇલેક્ટ્રિકલ્સ અને GE કેપિટલ જેવી કંપનીઓમાં પણ કામ કર્યું છે. તેમની આ શૈક્ષણિક પૃષ્ઠભૂમિ અને ક્ષમતા તેમને બેંકિંગ ક્ષેત્રના શીર્ષ સ્થાને પહોંચાડવા માટે સક્ષમ બનાવે છે.
ત્રણ દાયકાથી વધુનો સમૃદ્ધ અનુભવ
સાહા પાસે બેંકિંગ અને નોન-બેંકિંગ ફાઇનાન્શિયલ સર્વિસ સેક્ટરમાં 25 વર્ષ સહિત કુલ ત્રણ દાયકાથી વધુનો બહોળો અનુભવ છે. કોટક બેંકમાં જોડાતા પહેલા તેઓ ઓક્ટોબર 2017થી જાન્યુઆરી 2026 સુધી ‘બજાજ ફાઇનાન્સ’ સાથે સંકળાયેલા હતા. ત્યાં તેમણે પ્રેસિડેન્ટ, ડેપ્યુટી CEO, એક્ઝિક્યુટિવ ડિરેક્ટર અને થોડા સમય માટે MD અને CEO જેવા ઉચ્ચ પદોની જવાબદારી સંભાળી હતી. આ ઉપરાંત, તેઓ અગાઉ આઈસીઆઈસીઆઈ બેંક (ICICI Bank) સાથે પણ 14 વર્ષ સુધી અલગ-અલગ ભૂમિકાઓમાં કામ કરી ચૂક્યા છે.
બેંકની સામે રહી છે કેટલીક પડકારોભરી સ્થિતિ
છેલ્લા કેટલાક વર્ષોમાં કોટક મહિન્દ્રા બેંકને કેટલીક નિયમનકારી (Regulatory) મુશ્કેલીઓનો સામનો કરવો પડ્યો છે. RBI દ્વારા વર્ષ 2024માં નવા ક્રેડિટ કાર્ડ જારી કરવા પર અને ઓનલાઈન ચેનલો દ્વારા નવા ગ્રાહકો જોડવા પર પ્રતિબંધ મૂકવામાં આવ્યો હતો, જે જોકે બાદમાં 2025માં હટાવી લેવામાં આવ્યો હતો. આઈટી સિસ્ટમમાં ખામીઓ અને અન્ય નિયમોના પાલનને લઈને અગાઉ બેંક પર દંડ પણ ફટકારવામાં આવ્યા છે. આવા પડકારો વચ્ચે નવા નેતૃત્વ પાસેથી બેંકને વધુ મજબૂત બનાવવાની મોટી અપેક્ષાઓ છે.
ગ્રાહકો અને હિસ્સેદારો માટે પ્રતિબદ્ધતા
નિમણૂકની જાહેરાત બાદ અનૂપ કુમાર સાહાએ જણાવ્યું હતું કે તેઓ પોતાના સાથીદારો સાથે મળીને ગ્રાહકો સાથેના સંબંધોને વધુ ગાઢ બનાવવા, અથાક પરિશ્રમ કરવા અને બેંકના શેરહોલ્ડરો તથા હિસ્સેદારો માટે મોટી વેલ્યુ ક્રિએટ કરવા માટે કામ કરશે. બેંકના ચેરમેન સી. એસ. રાજન અને વર્તમાન વડા અશોક વાસવાનીએ પણ વિશ્વાસ વ્યક્ત કર્યો છે કે સાહાના અનુભવથી બેંકની વૃદ્ધિ વધુ ઝડપી બનશે.
શેરબજારમાં જોવા મળ્યો સારો ઉછાળો
આ મોટા કોર્પોરેટ વિકાસની સીધી અસર બેંકના શેર પર જોવા મળી. ગુરુવારે કારોબારની શરૂઆતમાં જ કોટક મહિન્દ્રા બેંકના શેરમાં સારો એવો ઉછાળો નોંધાયો હતો. બજારના રોકાણકારોએ આ લીડરશીપ પરિવર્તનને હકારાત્મક રીતે સ્વીકાર્યું છે, જેનાથી બેંકના ભવિષ્યને લઈને સકારાત્મક માહોલ ઊભો થયો છે.
