બેંકિંગમાં મોટી ક્રાંતિ: એક્સિસ બેંકે લોન્ચ કર્યું AI ટૂલ, હવે મિનિટોમાં થશે કરન્ટ એકાઉન્ટનું કામ
બેંકિંગ દુનિયામાં અત્યારે આર્ટિફિશિયલ ઇન્ટેલિજન્સનો દબદબો વધી રહ્યો છે. ગ્રાહકોને બેંકના ધક્કા ન ખાવા પડે અને ઘરે બેઠા જ તમામ કાયદાકીય પ્રક્રિયાઓ પૂર્ણ થાય તે હેતુથી એક્સિસ બેંકે બે મુખ્ય સેવાઓ રજૂ કરી છે: AI આધારિત રી-કેવાયસી સોલ્યુશન અને ડિજિટલ બિઝનેસ પ્રોફાઇલ અપડેટ. આ બંને સેવાઓનો ઉદ્દેશ્ય જટિલ પ્રક્રિયાઓને સરળ બનાવીને ગ્રાહકોનો કિંમતી સમય બચાવવાનો છે.
ડિજિટલ બિઝનેસ પ્રોફાઇલ અપડેટ: હવે ડેટા એન્ટ્રીમાંથી મળશે મુક્તિ
કરન્ટ એકાઉન્ટ ધરાવતા ઉદ્યોગપતિઓ કે વેપારીઓ માટે પોતાના વ્યવસાયની વિગતો અપડેટ કરવી એ અત્યાર સુધી એક કંટાળાજનક પ્રક્રિયા હતી. પરંતુ નવી સેવા હેઠળ, ગ્રાહકો હવે તેમના વ્યવસાયની પ્રકૃતિ અને અન્ય વિગતો સંપૂર્ણપણે ઓનલાઈન અપડેટ કરી શકશે.
આ સિસ્ટમની ખાસિયત એ છે કે તે જનરેટિવ AI અને રિયલ-ટાઇમ GST ફાઇલિંગ ડેટાનો ઉપયોગ કરે છે. સિસ્ટમ પાસે 3,000 થી વધુ બિઝનેસ કોડના વિકલ્પો છે, જેમાંથી તે ગ્રાહકના જીએસટી ડેટાના આધારે યોગ્ય કોડ આપોઆપ પસંદ કરી લે છે. આનાથી મેન્યુઅલ એન્ટ્રીમાં થતી ભૂલો ઘટી જશે અને ગ્રાહકોને બ્રાન્ચમાં જવાની જરૂર નહીં પડે.
AI આધારિત રી-કેવાયસી: દસ્તાવેજોની ચકાસણી હવે સેકન્ડોમાં
એક્સિસ બેંકે તેના બિન-વ્યક્તિગત (Non-individual) કરન્ટ એકાઉન્ટ ગ્રાહકો માટે જે રી-કેવાયસી સોલ્યુશન લોન્ચ કર્યું છે, તે ખરેખર પ્રશંસનીય છે. અગાઉ આ પ્રક્રિયા મેન્યુઅલ હતી, જેમાં ઢગલાબંધ કાગળો જમા કરાવવા પડતા હતા અને તેમાં ભૂલોની શક્યતા પણ વધુ રહેતી હતી.
હવે નવી AI સિસ્ટમ એક જ પીડીએફ ફાઈલમાં રહેલા વિવિધ કેવાયસી દસ્તાવેજોને ઓળખી શકે છે, તેને આપોઆપ અલગ પાડે છે અને તેની સત્યતા તપાસે છે. જો કોઈ દસ્તાવેજ અધૂરો હોય કે ડેટા મેચ ન થતો હોય, તો સિસ્ટમ તુરંત એલર્ટ આપે છે. આનાથી ભવિષ્યમાં થનારી તપાસ કે વારંવારના ફોલો-અપની જરૂરિયાત ઘટી જાય છે.
બેંક કર્મચારીઓ માટે પણ રાહત
આ ટેકનોલોજી માત્ર ગ્રાહકો માટે જ નહીં, પણ બેંકની ઓપરેશન ટીમ માટે પણ આશીર્વાદરૂપ સાબિત થશે. જીએસટી ડેટા સાથે લાર્જ લેંગ્વેજ મોડલ (LLM) ના આ સમન્વયથી ડેટા પ્રોસેસિંગની ઝડપ વધી છે. બેંકના જણાવ્યા મુજબ, આ નવી પ્રણાલીથી ‘ફર્સ્ટ ટાઈમ રાઈટ’ (પહેલીવારમાં જ સાચું કામ) નું પ્રમાણ વધ્યું છે, જેના કારણે બેંક કર્મચારીઓની ઉત્પાદકતામાં મોટો સુધારો જોવા મળ્યો છે.
શું કહે છે બેંકના વરિષ્ઠ અધિકારીઓ?
બેંકના ડિજિટલ બિઝનેસ અને ટ્રાન્સફોર્મેશન વિભાગના વડા સમીર શેટ્ટીએ જણાવ્યું હતું કે, “એક્સિસ બેંક લાંબા સમયથી ઇન્ટેલિજન્ટ ઓટોમેશન દ્વારા બેંકિંગ પ્રક્રિયાઓને સરળ બનાવવા પર કામ કરી રહી છે. જનરેટિવ AI, ડોક્યુમેન્ટ ઇન્ટેલિજન્સ અને રિયલ-ટાઇમ જીએસટી ડેટાના મેલથી અમે જટિલ પ્રક્રિયાઓને મોટા પાયે સરળ બનાવી શકીએ છીએ. આનાથી ગ્રાહકોને પેપરલેસ અને સુવિધાજનક અનુભવ મળશે, જ્યારે બેંક માટે કમ્પ્લાયન્સ અને કાર્યક્ષમતા વધુ મજબૂત બનશે.”
