વન અને પર્યાવરણ મંત્રી પ્રવીણભાઈ માળીના માર્ગદર્શન હેઠળ ગુજરાતમાં ગ્રીન કવર વધારવા મહત્વપૂર્ણ હાઇટેક નર્સરી પ્રોજેક્ટ
વન અને પર્યાવરણ મંત્રી પ્રવીણભાઈ માળીના માર્ગદર્શન હેઠળ બનાસકાંઠાના ડીસા તાલુકાના ડાવસ ગામમાં પર્યાવરણ સંરક્ષણ માટે એક મોટો પ્રોજેક્ટ આકાર લઈ રહ્યો છે. આશરે ૧૩ એકર વિસ્તારમાં ૩.૫ કરોડ રૂપિયાના ખર્ચે એક અત્યાધુનિક ‘હાઇટેક નર્સરી’ બનાવવામાં આવશે. આ નર્સરીમાં વૈજ્ઞાનિક પદ્ધતિઓ અને આધુનિક ટેકનોલોજીનો ઉપયોગ કરીને ઉચ્ચ ગુણવત્તાવાળા અને રોગમુક્ત છોડ તૈયાર કરવામાં આવશે. આ પ્રોજેક્ટ ગુજરાતમાં વનીકરણના પ્રયાસોને નવી ઊંચાઈ પર લઈ જશે અને રાજ્ય માટે એક મોડેલ સાબિત થશે.
દર વર્ષે ૧૦ લાખ રોપાઓનું ઉત્પાદન અને આધુનિક સુવિધાઓ
આ હાઇટેક નર્સરીમાં દર વર્ષે ૧૦ લાખથી વધુ રોપાઓ તૈયાર કરવાનું લક્ષ્ય રાખવામાં આવ્યું છે. છોડના ઝડપી અને સુરક્ષિત વિકાસ માટે અહીં મીસ્ટ ચેમ્બર, જર્મિનેશન ચેમ્બર, પોલી હાઉસ અને નેટ હાઉસ જેવી અદ્યતન સુવિધાઓ ઊભી કરાશે. ખાસ વાત એ છે કે અહીં લુપ્ત થતી વનસ્પતિઓના સંવર્ધન માટે ‘સોઇલ-લેસ મીડિયા’ એટલે કે માટી વગરના માધ્યમનો ઉપયોગ થશે, જેનાથી છોડ વધુ મજબૂત અને સ્વસ્થ બનશે. આ સુવિધાઓને કારણે ગમે તેવી પ્રતિકૂળ આબોહવામાં પણ છોડનો ઉછેર શક્ય બનશે.
સીડ બેંક અને પર્યાવરણ જાગૃતિ માટે ખાસ સેન્ટર
નર્સરીમાં માત્ર છોડ જ નહીં, પરંતુ દુર્લભ બીજના સંગ્રહ માટે એક સુસજ્જ સીડ બેંક અને સીડ પ્રોસેસિંગ એરિયા પણ બનાવવામાં આવશે. આ ઉપરાંત, લોકોમાં પર્યાવરણ પ્રત્યે જાગૃતિ લાવવા માટે એક ‘નર્સરી ઇન્ફોર્મેશન સેન્ટર’ શરૂ કરાશે, જ્યાં વિદ્યાર્થીઓ અને ખેડૂતોને વનીકરણ વિશે માર્ગદર્શન આપવામાં આવશે. અહીં વર્મી કમ્પોસ્ટિંગ યુનિટ દ્વારા ઓર્ગેનિક ખાતર પણ તૈયાર કરાશે, જેનો ઉપયોગ છોડના ઉછેરમાં કરવામાં આવશે.
ઊંચા વૃક્ષો અને ગ્રીન કવર વધારવાનો મજબૂત નિર્ધાર
આ પ્રોજેક્ટની એક મુખ્ય વિશેષતા એ છે કે અહીં ‘ઊંચી હાઇટ વાળા વૃક્ષો’ તૈયાર કરવાની પદ્ધતિ અપનાવવામાં આવશે. લાંબા અને મજબૂત રોપા તૈયાર થવાથી મોટા પાયે થતા વૃક્ષારોપણ કાર્યક્રમો વધુ સફળ અને અસરકારક બનશે. આ હાઇટેક નર્સરી ગુજરાતના ગ્રીન કવરને વધારવા અને પર્યાવરણીય સંતુલન જાળવવા માટે પાયાનો પથ્થર સાબિત થશે. આ પહેલથી દુર્લભ વનસ્પતિઓનું જતન થશે અને આવનારી પેઢીને હરિયાળું વાતાવરણ મળશે.
