23 વર્ષ જૂની જર્જરિત આંગણવાડી, નવી ઈમારત અધૂરી: વાલીઓની ચિંતા વધી
છોટાઉદેપુર જિલ્લાના ગ્રામ્ય વિસ્તારમાં અનેક આંગણવાડીઓ એવી સ્થિતીમાં પહોંચેલી છે કે જ્યાંથી બાળકોના ભવિષ્યનું ઘડતર થવું જોઈએ, ત્યાં તેમના જીવને જ ખતરો ઉભો થયો છે. આંતરિયાળ ગામોમાં યોગ્ય મકાન ન હોવાને કારણે ભૂલકાં અસુરક્ષિત પરિસ્થિતિમાં ભણવા મજબૂર છે. વાલીઓ વારંવાર પ્રશ્નો ઉઠાવે છે, પરંતુ પરિસ્થિતિમાં સુધારો જોવા મળતો નથી. આ સ્થળો શિક્ષણ કેન્દ્ર કરતાં જોખમી સ્થાનો બની રહ્યા છે.
કપાસ અને ગેસ સિલિન્ડરની વચ્ચે શિક્ષણ
નસવાડી તાલુકાના ગોયાવાંટ ગામમાં ભણતા બાળકોને જોખમ ભરેલી પરિસ્થિતિ વચ્ચે સમય પસાર કરવો પડે છે. ખાનગી મકાનમાં ચાલતી આંગણવાડીમાં બાળકો પતરાના શેડ નીચે બેઠા રહે છે, જ્યાં સાથે જ ઓરડામાં જ્વલનશીલ કપાસનો જથ્થો રાખવામાં આવ્યો છે. તેની બાજુમાં ગેસ સિલિન્ડર અને રસોડાનો સામાન મૂકાયેલ હોવાથી મોટી જાનહાનિ સર્જી શકે. ગ્રામજનો આ સ્થિતિ સામે વારંવાર અવાજ ઉઠાવે છે પરંતુ ઉકેલ હજુ સુધી મળ્યો નથી.
23 વર્ષ જૂની આંગણવાડી જર્જરિત થતા વિકલ્પના ભરોસે
ગામમાં આવેલી મૂળ આંગણવાડી લગભગ 23 વર્ષ પહેલાંનું બાંધકામ ધરાવે છે અને હવે સંપૂર્ણપણે નબળી થઈ ચૂકી છે. દિવાલો અને છત જોખમજનક હોવાથી બાળકોને ત્યાં બેસાડવા યોગ્ય પરિસ્થિતિ નથી. આથી વિકલ્પ તરીકે ખાનગી ઘર ભાડેથી લઈને આંગણવાડી ચલાવવામાં આવી રહી છે. ગામના સરપંચે જણાવ્યું હતું કે નવી ઈમારતનું નિર્માણ બે વર્ષ પહેલાં શરૂ થયું પણ નાણાં ચૂકવાયા ન હોવાથી કામ અટકી ગયું.
મંજૂર થયા છતાં 28 આંગણવાડી પ્રોજેક્ટ શરુ જ ન થયા
નસવાડી તાલુકામાં કુલ 112 આંગણવાડીઓ માટે બિલ્ડિંગ મંજૂર કરવામાં આવ્યા હતા, પરંતુ અત્યાર સુધી ફક્ત 50 જ પૂર્ણ થઈ શકી છે. જ્યારે 35 ઈમારતોનું નિર્માણ હજી પ્રગતિમાં છે અને સૌથી ચિંતાજનક 28 ઇમારતોનું કામ હજુ સુધી શરૂ પણ થયું નથી. ટેન્ડર પ્રક્રિયામાં વિલંબ અને તંત્રની નબળી કામગીરીને કારણે નાના બાળકોની સુરક્ષા જોખમે મૂકાઈ રહી છે.
તાત્કાલિક સુધારાની માંગ તેજ
વાલીઓ અને ગ્રામજનો તંત્રને અપીલ કરી રહ્યા છે કે નવી આંગણવાડીનું બાંધકામ પૂર્ણ કરવામાં આવે અને હાલની જોખમી ઈમારતોને નવેસરથી સુધારી આપવામાં આવે. નાના ભૂલકાં કોઈ દુર્ઘટનાનો ભોગ બને તે પહેલાં કાર્યવાહી જરૂરી છે. સમયસર પગલાં લેવામાં આવે તો ભવિષ્યની પેઢીને સલામત અને યોગ્ય શિક્ષણ પર્યાવરણ મળી શકે.
