ધરમપુરના ટાંકી ખાતે રૂ. 46.24 લાખના ખર્ચે નવનિર્મિત કન્યા આશ્રમશાળાનું મંત્રી કનુભાઈ દેસાઈના હસ્તે લોકાર્પણ

આશ્રમશાળાઓ આદિવાસી સમાજના વિકાસનું મજબૂત માધ્યમ: ધરમપુર કાર્યક્રમમાં મંત્રીઓનું માર્ગદર્શન

વલસાડ જિલ્લાના ધરમપુર તાલુકાના ટાંકી ગામે આદિજાતિ શિક્ષણના ઉત્કર્ષ માટે એક મહત્વનું સોપાન સર કરવામાં આવ્યું છે. રાજ્યના નાણાં અને શહેરી વિકાસ મંત્રી શ્રી કનુભાઈ દેસાઈ દ્વારા રૂ. ૪૬.૨૪ લાખના ખર્ચે નિર્મિત નવનિર્મિત ‘ટાંકી કન્યા આશ્રમશાળા’નું લોકાર્પણ કરવામાં આવ્યું હતું. આ પ્રસંગે આદિજાતિ વિકાસ મંત્રી અને જિલ્લા પ્રભારી શ્રી નરેશભાઈ પટેલ પણ વિશેષ ઉપસ્થિત રહ્યા હતા. મંત્રીશ્રીઓએ આધુનિક સુવિધાઓથી સજ્જ આશ્રમશાળા અને ભોજનાલયનું બારીકાઈથી નિરીક્ષણ કરી વિદ્યાર્થીનીઓ માટેની વ્યવસ્થાઓની સમીક્ષા કરી હતી.

આધુનિક સુવિધાઓ અને સીએસઆર (CSR) ફંડનો સહયોગ

નવી આશ્રમશાળાના મકાનની સાથે સાથે સામાજિક જવાબદારીના ભાગરૂપે ડીજીવીસીએલ, જેટકો અને ગુજરાત ગેસના સીએસઆર ફંડના સહયોગથી તૈયાર થયેલા ભોજનાલય, શેડ અને પ્રોટેક્શન વોલનું પણ લોકાર્પણ કરાયું હતું. આ તકે મંત્રી શ્રી કનુભાઈ દેસાઈએ સ્વ. મણિભાઈ આર. ચૌધરી વિદ્યાસંકુલમાં સંસ્થાના સ્થાપકની પ્રતિમાનું અનાવરણ કરી શ્રદ્ધાંજલિ અર્પણ કરી હતી. તેમણે જણાવ્યું હતું કે, વડાપ્રધાન શ્રી નરેન્દ્રભાઈ મોદીના નેતૃત્વમાં શરૂ થયેલી ‘વનબંધુ કલ્યાણ યોજના’ જેવી પહેલથી આજે અંતરિયાળ આદિવાસી વિસ્તારોમાં શિક્ષણ અને માળખાગત સુવિધાઓનો અભૂતપૂર્વ વિકાસ થયો છે.

આદિજાતિ શિક્ષણ અને ફૂડ બિલમાં વધારો

મંત્રી શ્રી નરેશભાઈ પટેલે આશ્રમશાળાના વિકાસની રૂપરેખા આપતા જણાવ્યું કે સમગ્ર ગુજરાતમાં આશ્રમશાળાઓના આધુનિકીકરણ માટે રૂ. ૩૦૦ કરોડથી વધુની જોગવાઈ કરવામાં આવી છે. રાજ્યમાં હાલ ૧.૨૪ લાખ વિદ્યાર્થીઓ આ સંસ્થાઓમાં રહીને શિક્ષણ મેળવી રહ્યા છે. વિદ્યાર્થીઓના પોષણની દરકાર લેતા સરકારે ફૂડ બિલની રકમ રૂ. ૧૫૦૦ થી વધારીને રૂ. ૨૧૬૦ કરી દીધી છે. તેમણે ઉમેર્યું હતું કે આદર્શ નિવાસી શાળાઓ અને આશ્રમશાળાઓના કારણે આજે આદિવાસી સમાજના યુવાનો વૈશ્વિક ફલક પર પોતાની પ્રતિભા દર્શાવી રહ્યા છે.

વલસાડ જિલ્લા કલેકટર ભવ્ય વર્માના અધ્યક્ષસ્થાને પ્રિ-મોન્સુનની તૈયારી અંગે બેઠક મળી

વલસાડ ચૂંટણીના શોરમાં દબાયો મૃતાત્માઓનો આક્રંદ: પીએમ મોદીએ શોક વ્યક્ત કર્યો, પણ ગુજરાત મુખ્યમંત્રી પાસે સંવેદના માટે સમય નથી?

સેવાભાવી સંસ્થાઓ અને લોકસહકાર

કાર્યક્રમ દરમિયાન ધારાસભ્ય શ્રી અરવિંદભાઈ પટેલ અને શ્રી જીતુભાઈ ચૌધરીએ પ્રાસંગિક ઉદબોધનો દ્વારા સંસ્થાની કામગીરીને બિરદાવી હતી. ગીતા કેળવણી મંડળના પ્રમુખ શ્રી મહેન્દ્રભાઈ ચૌધરીએ સંસ્થાના શૈક્ષણિક પ્રકલ્પો વિશે વિગતો પૂરી પાડી હતી. આ લોકાર્પણ કાર્યક્રમમાં વલસાડના ધારાસભ્ય શ્રી ભરતભાઈ પટેલ, જિલ્લા કલેક્ટર શ્રી ભવ્ય વર્મા અને ડી.ડી.ઓ. શ્રી અતિરાગ ચપલોત સહિત ઉદ્યોગ જગતના અગ્રણીઓ અને મોટી સંખ્યામાં ગ્રામજનો હાજર રહ્યા હતા. શૈક્ષણિક સુવિધાઓના આ વિસ્તરણથી સ્થાનિક કન્યા શિક્ષણને નવો વેગ મળશે.