‘બીબી’ નેતન્યાહૂના સમર્થનમાં આવ્યા ટ્રમ્પ; કહ્યું- ઈઝરાયેલમાં ખોટો નેતા હોત તો અમેરિકાએ પોતે પગલાં ભરવા પડ્યા હોત!
ઈઝરાયેલમાં 27 ઓક્ટોબરે યોજાનારી સંસદીય ચૂંટણીઓ (Knesset Elections) પહેલાં અમેરિકી રાષ્ટ્રપતિ ડોનાલ્ડ ટ્રમ્પે ઈઝરાયેલી વડાપ્રધાન બેન્જામિન નેતન્યાહૂના સમર્થનમાં એક મોટું અને વિસ્ફોટક નિવેદન આપ્યું છે. ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ’ (Truth Social) પર એક પોસ્ટ શેર કરીને નેતન્યાહૂના મુક્તકંઠે વખાણ કર્યા છે અને તેમને એક “મજબૂત, બહાદુર અને બુદ્ધિમાન” જનનાયક ગણાવ્યા છે.
ટ્રમ્પના આ ખુલ્લા સમર્થનને ઈઝરાયેલી રાજકારણમાં ચૂંટણી પહેલાં નેતન્યાહૂ માટે એક અત્યંત મજબૂત ચૂંટણી દાવ માનવામાં આવી રહ્યો છે.
નેતન્યાહૂને ગણાવ્યા ‘વોરિયર પ્રાઇમ મિનિસ્ટર’
પોતાની સત્તાવાર પોસ્ટમાં અમેરિકી રાષ્ટ્રપતિ ડોનાલ્ડ ટ્રમ્પે લખ્યું કે ‘બીબી’ (બેન્જામિન નેતન્યાહૂનું લોકપ્રિય ઉપનામ) એક સાચા યોદ્ધા વડાપ્રધાન (Warrior Prime Minister) છે. ટ્રમ્પે ઈઝરાયેલને વ્હાઇટ હાઉસનો સૌથી વિશ્વસનીય મિત્ર ગણાવતા કહ્યું કે ઈરાન સામે ચાલતા સંઘર્ષ અને આ વિસ્તારમાં શાંતિ સ્થાપિત કરવાના પ્રયાસોમાં નેતન્યાહૂથી મોટો કોઈ ભાગીદાર હોઈ શકે નહીં.
ટ્રમ્પે ઈરાનના 51 વર્ષ જૂના ચર્ચિત નારા ‘ડેથ ટુ ઈઝરાયેલ, ડેથ ટુ અમેરિકા’ (ઈઝરાયેલનો નાશ થાઓ, અમેરિકાનો નાશ થાઓ) નો ઉલ્લેખ કરતા કહ્યું કે કોઈ પણ દેશ આવા ભયાનક માહોલમાં કેવી રીતે સુરક્ષિત રહી શકે.
“ઈઝરાયેલમાં ખોટો નેતા હોત તો અમેરિકાએ પોતે પગલાં ભરવા પડ્યા હોત”
ઈરાન તરફથી ઉદ્ભવતા સુરક્ષા પડકારો અંગે વાત કરતા ટ્રમ્પે આક્રમક વલણ દાખવ્યું હતું. તેમણે કહ્યું:
“ઈરાન આ ભયાનક અને હિંસક નારાને હકીકતમાં બદલવા માંગતું હતું, પરંતુ સૈન્ય અને આર્થિક મોરચે તેને સંપૂર્ણપણે બરબાદ કરી દેવામાં આવ્યું છે. જો ઈરાને હજુ પણ પોતાનું વલણ ન બદલ્યું, તો તેનો સંપૂર્ણપણે સફાયો કરવો પડશે. જો ઈઝરાયેલ પાસે આ સમયે કોઈ નબળો કે ખોટો નેતા હોત, તો અમેરિકાએ પોતે આગળ આવીને આ પગલું ભરવું પડ્યું હોત—અને સાચું કહું તો મારી એવું કરવાની કોઈ ઈચ્છા નહોતી.”
ભારે વિરોધ છતાં વધુ મજબૂત થયા નેતન્યાહૂ: ટ્રમ્પ
ડોનાલ્ડ ટ્રમ્પે નેતન્યાહૂની રાજકીય ધીરજ અને નેતૃત્વની પ્રશંસા કરતા કહ્યું કે તેમણે સૌથી વિપરીત અને કઠિન પરિસ્થિતિઓમાં પણ કામ કર્યું છે.
ટ્રમ્પે લખ્યું, “બીબી નેતન્યાહૂ વિરૂદ્ધ ખુદ ઈઝરાયેલની અંદરથી જ ભારે વિરોધ પ્રદર્શનો અને રાજકીય દબાણ જોવા મળ્યું. છતાં પણ તેઓ પોતાના નિર્ણયો પર અડીખમ, બહાદુર અને બુદ્ધિમાન બની રહ્યા. આ તમામ રાજકીય તોફાનો છતાં તેઓ માત્ર સત્તા પર ટકી ન રહ્યા, પરંતુ પહેલા કરતાં પણ વધુ સશક્ત અને મજબૂત બનીને ઉભર્યા છે! મેં પોતે સૌથી કઠિન અને પડકારજનક સમયમાં પણ બીબીની નેતૃત્વ ક્ષમતા જોઈ છે.”
ચૂંટણી માહોલમાં બદલાયું સમીકરણ
ઈઝરાયેલમાં 27 ઓક્ટોબરે યોજાનારી ચૂંટણી અત્યંત નિર્ણાયક મોડ પર છે. આવા સમયે કોઈ અમેરિકી રાષ્ટ્રપતિ વિદેશી ચૂંટણીમાં ઉતરીને ઉમેદવારનું આ રીતે ખુલ્લેઆમ પૂર્ણ સમર્થન (Complete and Total Endorsement) કરે તે એક દુર્લભ ઘટના માનવામાં આવે છે.
ટ્રમ્પના આ નિવેદન પર પ્રતિક્રિયા આપતા વડાપ્રધાન બેન્જામિન નેતન્યાહૂએ પણ સોશિયલ મીડિયા પ્લેટફોર્મ ‘X’ પર ટ્રમ્પનો આભાર માન્યો અને કહ્યું, “રાષ્ટ્રપતિ ટ્રમ્પ, આપના આ અભૂતપૂર્વ સમર્થન અને આપણે સાથે મળીને કરેલા કામ માટે આભાર. સાથે મળીને આપણે આ મિશન પૂરું કરીશું!”
