પરિવારમાં હાઈ કોલેસ્ટ્રોલની સમસ્યા છે? નવી સ્ટડીમાં તમારા માટે આવી રાહતના સમાચાર
આજના સમયમાં આપણી જીવનશૈલી અને ખાનપાનની ખોટી આદતોને કારણે સ્વાસ્થ્ય સંબંધી અનેક ગંભીર સમસ્યાઓ વધી રહી છે. જો પરિવારમાં અગાઉ ક્યારેય હાઇ કોલેસ્ટ્રોલ કે અન્ય મેટાબોલિક બીમારીઓનો ઇતિહાસ રહ્યો હોય, તો તેનો અર્થ એવો બિલકુલ નથી કે આગળ ચાલીને તમને પણ કોલેસ્ટ્રોલની સમસ્યા થશે જ.
ભારતીય વયસ્કો પર કરવામાં આવેલી એક નવી રિસર્ચ સ્ટડીમાં અત્યંત મહત્વની બાબત સામે આવી છે. આ અભ્યાસ મુજબ, કેટલાક ખાસ જિનેટિક વેરિઅન્ટ્સ (Genetic Variants) ધરાવતા લોકોમાં જો ખોરાક કે ડાયેટ ખરાબ હોય, તો કોલેસ્ટ્રોલ વધવાનું જોખમ અનેકગણું વધી જાય છે. પરંતુ, જો આપણી ડાયેટ સારી અને સંતુલિત હોય, તો આ જિનેટિક જોખમોની અસરને ઘણી હદે ઘટાડી કે કાબૂમાં રાખી શકાય છે.
આ મહત્વપૂર્ણ સ્ટડી ચેન્નાઈની ‘મદ્રાસ ડાયાબિટીસ રિસર્ચ ફાઉન્ડેશન‘ (MDRF) અને બ્રિટનની ‘યુનિવર્સિટી ઓફ રીડિંગ’ના સંશોધકો દ્વારા સંયુક્ત રીતે કરવામાં આવી છે અને આ જ મહિનામાં તે પ્રકાશિત થઈ છે. આ રિસર્ચ એવા સમયે સામે આવ્યું છે જ્યારે ભારતમાં ડાયાબિટીસ, ડિસ્લિપિડેમિયા (લોહીમાં ચરબીનું પ્રમાણ અસામાન્ય રીતે વધવું) અને હૃદયરોગ જેવી બીમારીઓનો બોજ સતત વધી રહ્યો છે. આજે લોકોના ભોજનમાં રિફાઇન્ડ કાર્બોહાઇડ્રેટ, ફેટ, ખાંડ અને મીઠાનું પ્રમાણ ખૂબ વધી ગયું છે, જ્યારે ફળો, શાકભાજી અને અન્ય પૌષ્ટિક આહારની માત્રા ઘટી રહી છે.
9 માંથી 8 ભારતીયો ડિસ્લિપિડેમિયાનો શિકાર
થોડા મહિના અગાઉ, ‘ઇન્ડિયન કાઉન્સિલ ઓફ મેડિકલ રિસર્ચ’ (ICMR) અને MDRF ની ‘ઇન્ડિયાબ’ સીરીઝ અંતર્ગત એક વ્યાપક રાષ્ટ્રીય અભ્યાસ હાથ ધરવામાં આવ્યો હતો. આ સ્ટડીમાં ચોંકાવનારો ખુલાસો થયો હતો કે આશરે 87.3 ટકા ભારતીય વયસ્કો ડિસ્લિપિડેમિયાથી પીડિત છે. આ શારીરિક સ્થિતિ હાર્ડ ડિસીઝ, હાર્ડ અટેક અને સ્ટ્રોક જેવી જીવલેણ સમસ્યાઓનું જોખમ નોંધપાત્ર રીતે વધારી દે છે.
દેશમાં આંકડાઓ પર નજર કરીએ તો, લગભગ 10.1 કરોડ લોકો ડાયાબિટીસથી ઝઝૂમી રહ્યા છે, જ્યારે આશરે 13.6 કરોડ લોકો પ્રી-ડાયાબિટીસ અને 35.6 કરોડ લોકો હાઇ બ્લડ પ્રેશર (હાઈપરટેન્શન)ની સમસ્યાથી પ્રભાવિત છે. ICMR અને MDRFના અગાઉના એક રિપોર્ટ અનુસાર, સામાન્ય ભારતીય ડાયેટમાંથી મળતી દૈનિક કેલરીનો 62.3 ટકા હિસ્સો માત્ર કાર્બોહાઇડ્રેટમાંથી આવે છે, જેમાં મોટાભાગનો ભાગ સાધારણ કે નિમ્ન ગુણવત્તાવાળા (રફ કે રિફાઇન્ડ) કાર્બોહાઇડ્રેટ્સનો હોય છે.
આ રિસર્ચ કેવી રીતે કરવામાં આવ્યું?
આ નવી સ્ટડી માટે સંશોધકોએ 25 થી 80 વર્ષની વય જૂથના કુલ 1,020 લોકોને સામેલ કર્યા હતા. જેમાં 452 પુરુષો અને 568 મહિલાઓનો સમાવેશ થાય છે. આ તમામ સહભાગીઓ ‘ચેન્નાઈ ગ્રામીણ એપિડેમિયોલોજી સ્ટડી’ સાથે જોડાયેલા હતા.
સંશોધકોએ ખાસ કરીને TCF7L2 અને FTO નામના બે મુખ્ય જિનમાં રહેલા ત્રણ જિનેટિક વેરિઅન્ટ્સ પર ધ્યાન કેન્દ્રિત કર્યું હતું. આ બંને જિનનો સંબંધ અગાઉ પણ ડાયાબિટીસ અને મેટાબોલિક સમસ્યાઓ સાથે જોડાયેલો હોવાનું સાબિત થઈ ચૂક્યું છે. આ સાથે જ, અભ્યાસમાં સામેલ લોકોના આહાર (ડાયેટ)ની ગુણવત્તાની પણ ઊંડાણપૂર્વક ચકાસણી કરવામાં આવી હતી.
આ માટે ‘ઇન્ડિયન ડાયેટ ક્વોલિટી સ્કોર’નો ઉપયોગ કરવામાં આવ્યો હતો. જેમાં આઠ મુખ્ય ખાદ્ય સમૂહોનું નિરીક્ષણ કરવામાં આવ્યું, જેમાં કઠોળ, ફળો અને શાકભાજી, ડેરી ઉત્પાદનો, સફેદ ચોખા, ખાદ્ય તેલ અને ફેટ, ઉમેરેલી ખાંડ (Added Sugar), ઉમેરેલું મીઠું તેમજ ચિકન અને ઈંડાનો સમાવેશ થતો હતો.
ખરાબ ડાયેટમાં જિનેટિક જોખમ વધુ અસર કરે છે
આ સમગ્ર રિસર્ચનું સૌથી મોટું અને મહત્ત્વપૂર્ણ તારણ એ બહાર આવ્યું છે કે, જે લોકોની ડાયેટ નબળી કે ખરાબ હતી, તેમાં વધુ જિનેટિક જોખમ ધરાવતા લોકોનું ‘ટોટલ કોલેસ્ટ્રોલ’ અને ‘એલડીએલ’ (ખરાબ કોલેસ્ટ્રોલ)નું પ્રમાણ, ઓછા જિનેટિક જોખમ ધરાવતા લોકોની સરખામણીમાં ઘણું વધારે જોવા મળ્યું હતું.
પરંતુ, જે લોકોની ડાયેટ મધ્યમ અથવા સારી ગુણવત્તાવાળી હતી, તેમાં આ તફાવત બિલકુલ નાબૂદ થઈ ગયો હતો. સરળ શબ્દોમાં કહીએ તો, જે લોકોમાં હાઇ કોલેસ્ટ્રોલનું જિનેટિક (વારસાગત) જોખમ પહેલેથી જ મોજૂદ હોય, તેઓ પણ જો પૌષ્ટિક અને સંતુલિત આહાર લે તો આ જિનેટિક જોખમની ખરાબ અસરોને મોટા પ્રમાણમાં ટાળી શકે છે.
સંશોધકોના મતે, આહાર અને જિન વચ્ચેનો આ સંબંધ ટોટલ કોલેસ્ટ્રોલ અને એલડીએલના મામલામાં વૈજ્ઞાનિક રીતે અત્યંત મહત્વપૂર્ણ સાબિત થયો છે. વધુ પડતા જિનેટિક જોખમનો સીધો સંબંધ ફાસ્ટિંગ બ્લડ ગ્લુકોઝ અને એચબીએવનસી (HbA1c) ના ઉચ્ચ સ્તર સાથે પણ જોવા મળ્યો છે.
