આત્મનિર્ભર ભારતની દિશામાં આરોગ્ય ક્રાંતિ, મફત HPV રસી સાથે 5.50 લાખ કિશોરીઓને સુરક્ષિત કરવાનો સંકલ્પ
વડાપ્રધાન નરેન્દ્ર મોદીએ અજમેરથી દેશવ્યાપી HPV રસીકરણ અભિયાનની શરૂઆત કરાવી છે, જેના ભાગરૂપે ગુજરાતમાં સોલા સિવિલ હોસ્પિટલ ખાતે મુખ્યમંત્રી ભૂપેન્દ્ર પટેલ અને આરોગ્ય મંત્રી પ્રફુલભાઈ પાનસેરિયાની હાજરીમાં આ મહાઅભિયાનનો પ્રારંભ થયો હતો. ભારત હવે ‘આત્મનિર્ભર’ બનીને પોતાની સ્વદેશી રસી બનાવી રહ્યું છે, જે પોલિયો બાદ હવે સર્વાઇકલ કેન્સર જેવી ગંભીર બીમારી સામે લડવા માટેનું મોટું કદમ છે.
૫.૫૦ લાખ કિશોરીઓને અપાશે ૩૦૦૦ રૂપિયાની રસી તદ્દન વિનામૂલ્યે
ભારતમાં મહિલાઓમાં સર્વાઇકલ કેન્સર (ગર્ભાશયના મુખનું કેન્સર) બીજા ક્રમનું સૌથી વધુ નોંધાતું કેન્સર છે. આ ગંભીર જોખમ સામે રક્ષણ આપવા માટે ગુજરાત સરકારે ૧૪ વર્ષ પૂર્ણ કરી ચૂકેલી રાજ્યની અંદાજે ૫.૫૦ લાખ કિશોરીઓને આવરી લેવાનું લક્ષ્ય રાખ્યું છે. બજારમાં આ રસીના એક ડોઝની કિંમત આશરે ૩૦૦૦ રૂપિયા છે, પરંતુ રાજ્ય સરકારે ૧૫૦ કરોડ રૂપિયા ફાળવીને આ રસી તમામ કિશોરીઓને વિનામૂલ્યે આપવાનો ઐતિહાસિક નિર્ણય લીધો છે.
હાઈટેક ટ્રેકિંગ અને કોલ્ડ ચેઈન દ્વારા રસીની સુરક્ષા
રસીની ગુણવત્તા જળવાઈ રહે તે માટે રાજ્યભરમાં ૨૨૯૭ તાલીમબદ્ધ ટીમો અને કોલ્ડ ચેઈન પોઈન્ટ્સ કાર્યરત કરવામાં આવ્યા છે. રસીને +૨°C થી +૮°C તાપમાનમાં સાચવવા માટે અત્યાધુનિક વ્યવસ્થા કરાઈ છે. ખાસ વાત એ છે કે, આ રસીકરણનું ‘TeCHO+’ અને ‘SAFE-VAC’ જેવા ડિજિટલ પોર્ટલ દ્વારા રિયલ-ટાઇમ ટ્રેકિંગ પણ કરવામાં આવશે, જેથી દરેક દીકરી સુધી આ રક્ષણ પહોંચે તે સુનિશ્ચિત કરી શકાય.
અંધશ્રદ્ધા ત્યજી રસીકરણમાં જોડાવા વાલીઓને અપીલ
આરોગ્ય મંત્રીએ વાલીઓને અપીલ કરી હતી કે કોઈપણ અફવા કે અંધશ્રદ્ધામાં આવ્યા વગર પોતાની દીકરીઓને આ સુરક્ષિત રસી અપાવવી જોઈએ. “સર્વાઇકલ કેન્સરથી દીકરીને બચાવીએ, સમયસર HPV રસી મુકાવીએ” ના મંત્ર સાથે સરકારે દીકરીઓના ઉજ્જવળ અને સ્વસ્થ ભવિષ્યની ગેરંટી આપી છે. આ કાર્યક્રમમાં મેયર પ્રતિભાબેન જૈન અને આરોગ્ય વિભાગના ઉચ્ચ અધિકારીઓ સહિત મોટી સંખ્યામાં દીકરીઓ ઉપસ્થિત રહી હતી.
