નવો આવકવેરા કાયદો 2026: જાણો કંપની તરફથી મળતા ઘર, કાર અને ભેટ પર હવે કેટલો ટેક્સ લાગશે?
ભારતીય કર પ્રણાલીમાં એક ઐતિહાસિક પરિવર્તન આવવા જઈ રહ્યું છે. 1 એપ્રિલ, 2026 થી નવા ‘આવકવેરા નિયમો 2026’ લાગુ થવા જઈ રહ્યા છે, જે દાયકાઓ જૂના આવકવેરા અધિનિયમ 1961નું સ્થાન લેશે. આ ફેરફાર માત્ર કાગળ પર જ નહીં, પરંતુ દરેક નોકરિયાત વ્યક્તિની સેલેરી સ્લિપ, ફોર્મ-16 અને ટેક્સ કેલ્ક્યુલેશનની રીતને સંપૂર્ણપણે બદલી નાખશે. સરકારનો ઉદ્દેશ્ય ટેક્સ પ્રક્રિયાને વધુ સરળ અને આધુનિક બનાવવાનો છે, પરંતુ કેટલીક નવી જોગવાઈઓ મધ્યમ વર્ગ અને ઉચ્ચ પગાર ધરાવતા કર્મચારીઓ માટે નવી ગણતરીઓ લાવશે.
આ નવા નિયમો નાણાકીય વર્ષ 2026-27 અને આકારણી વર્ષ 2027-28 માટે સુસંગત રહેશે. નવા ડ્રાફ્ટમાં સ્પષ્ટ કરવામાં આવ્યું છે કે કંપની તરફથી મળતા વિવિધ લાભો જેવા કે રહેઠાણ, કાર, ભેટ અને લોન પર કેવી રીતે ટેક્સ વસૂલવામાં આવશે. જે કર્મચારીઓ અત્યાર સુધી ટેક્સ પ્લાનિંગના જૂના રસ્તાઓ અપનાવતા હતા, તેમણે હવે નવા નિયમો મુજબ પોતાની તૈયારી અત્યારથી જ શરૂ કરી દેવી જોઈએ.
નિવૃત્તિ ફંડમાં કંપનીના ફાળા પર ટેક્સ: ₹7.5 લાખની મર્યાદા બાદ સાવધાન
નવા ટેક્સ નિયમોમાં એક મહત્વનો બદલાવ રિટાયરમેન્ટ ફંડ સાથે જોડાયેલો છે. ઘણી કંપનીઓ તેમના કર્મચારીઓના ભવિષ્ય માટે પ્રોવિડન્ટ ફંડ (PF), નેશનલ પેન્શન સિસ્ટમ (NPS) અને સુપરએન્યુએશન ફંડમાં યોગદાન આપે છે. અત્યાર સુધી આમાં ઘણી છૂટછાટો મળતી હતી, પરંતુ હવે જો કોઈ નાણાકીય વર્ષમાં એમ્પ્લોયર (કંપની) નું કુલ યોગદાન ₹7.5 લાખથી વધી જાય, તો વધારાની રકમને કર્મચારીની આવક (Perquisite) ગણવામાં આવશે અને તેના પર ટેક્સ લાગશે.
આટલું જ નહીં, આ ₹7.5 લાખની મર્યાદાથી વધુના યોગદાન પર જે વ્યાજ અથવા વળતર મળશે, તેને પણ કરપાત્ર આવક ગણવામાં આવશે. આ નિયમ ખાસ કરીને ઉચ્ચ હોદ્દા પર કામ કરતા અને મોટો પગાર મેળવતા કર્મચારીઓને અસર કરશે. સરકારે આ માટે એક ચોક્કસ ફોર્મ્યુલા તૈયાર કરી છે જેથી ટેક્સની ગણતરીમાં પારદર્શિતા જળવાઈ રહે.
કંપની દ્વારા મળતા મકાન (Accommodation) ના મૂલ્યાંકનમાં ફેરફાર
પગારદાર કર્મચારીઓને કંપની તરફથી રહેવા માટે ઘર મળે ત્યારે તેના પર ‘પરક્વિઝિટ ટેક્સ’ લાગે છે. નવા નિયમોમાં શહેરની વસ્તીના આધારે આ ટેક્સની ગણતરી નક્કી કરવામાં આવી છે. પ્રાઇવેટ સેક્ટરના કર્મચારીઓ માટે જો કંપની ઘર આપે છે, તો તેની ટેક્સેબલ વેલ્યુ નીચે મુજબ હશે:
-
40 લાખથી વધુ વસ્તી ધરાવતા શહેરો: પગારના 10 ટકા રકમને ટેક્સેબલ ગણવામાં આવશે.
-
15 લાખથી 40 લાખની વસ્તી ધરાવતા શહેરો: પગારના 7.5 ટકા રકમ.
-
અન્ય નાના શહેરો કે વિસ્તારો: પગારના 5 ટકા રકમ.
જો કર્મચારી પોતે તે ઘર માટે કોઈ ભાડું ચૂકવતો હોય, તો તે રકમને આ મૂલ્યાંકનમાંથી બાદ કરી દેવામાં આવશે. આ ઉપરાંત, જો કંપની પોતે ઘર ભાડે લઈને કર્મચારીને આપે છે, તો કંપની દ્વારા ચૂકવવામાં આવતું વાસ્તવિક ભાડું અથવા પગારના 10 ટકા — આ બેમાંથી જે ઓછું હશે તેને ટેક્સ માટે ગણતરીમાં લેવાશે. મેટ્રો શહેરોમાં કામ કરતા લોકો માટે આ નિયમ ખૂબ જ મહત્વનો સાબિત થશે.
કંપનીની કાર અને ડ્રાઈવરની સુવિધા પર ફિક્સ્ડ ટેક્સ
ઘણી કંપનીઓ તેમના કર્મચારીઓને ઓફિસ અને અંગત કામ માટે કારની સુવિધા આપે છે. નવા ડ્રાફ્ટ નિયમોમાં આ સુવિધા પર લાગતા ટેક્સને ફિક્સ કરી દેવામાં આવ્યો છે. જે કારનો ઉપયોગ ઓફિસ અને ઘર બંને કામ માટે થતો હોય, તેના પર ટેક્સની ગણતરી એન્જિનની ક્ષમતા મુજબ થશે:
-
1.6 લિટર સુધીની કાર: દર મહિને ₹5,000 ની રકમને પગારમાં ઉમેરી તેના પર ટેક્સ લેવાશે.
-
1.6 લિટરથી વધુની કાર: દર મહિને ₹7,000 ની રકમ.
-
ડ્રાઈવરની સુવિધા: જો કંપની ડ્રાઈવર પણ આપે છે, તો વધારાના ₹3,000 પ્રતિ માસ ટેક્સેબલ ગણાશે.
આ ફેરફારો દર્શાવે છે કે સરકાર હવે ટેક્સના માળખાને વધુ ચોક્કસ બનાવી રહી છે. આ ઉપરાંત ડિજિટલ ઈકોનોમી, ફ્રી મીલ (મફત જમવાનું) અને કંપની તરફથી મળતી લોન કે ભેટ પર પણ નવા નિયમો કડક થવા જઈ રહ્યા છે. ટેક્સપેયર્સે હવે તેમના રોકાણ અને ખર્ચની ગણતરી 1 એપ્રિલ 2026 પહેલા ફરીથી કરી લેવી જોઈએ જેથી વર્ષના અંતે કોઈ મોટી ટેક્સ લાયબિલિટી ઉભી ન થાય.
