IND vs AFG: જીત કરતાં મોટી રમતગમતની ભાવના, અફઘાન કેપ્ટન સાથે ટ્રોફી શેર કરી શ્રેયસ ઐયરે જીતી લીધાં દિલ
ભારત અને અફઘાનિસ્તાન વચ્ચેની ત્રણ મેચની T20 શ્રેણી ભારતે 3-0થી જીતી લીધી, પરંતુ દિલ્હીમાં રમાયેલી અંતિમ મેચ બાદ મેદાન પર જોવા મળેલી એક તસવીરે ક્રિકેટપ્રેમીઓનું ધ્યાન ખાસ ખેંચ્યું. મેચમાં ભારતનું વર્ચસ્વ રહ્યું હતું, પરંતુ મેચ પૂરી થયા બાદ ભારતીય કેપ્ટન શ્રેયસ ઐયરે જે કર્યું તે જીતની ઉજવણી કરતાં પણ વધુ ચર્ચામાં રહ્યું. ટીમ ઈન્ડિયાને ટ્રોફી મળ્યા બાદ ઐયરે અફઘાનિસ્તાનના કેપ્ટન ઇબ્રાહિમ ઝદરાનને પણ ઉજવણીમાં સામેલ કર્યા.
પ્રેઝન્ટેશન સમારોહ દરમિયાન ઝદરાન ભારતીય ખેલાડીઓની વચ્ચે ઊભા રહીને ટ્રોફી સાથે ફોટોગ્રાફમાં જોવા મળ્યા. મેદાન પર બંને ટીમો વચ્ચે સખત સ્પર્ધા જોવા મળી હતી, પરંતુ મેચ પૂરી થયા બાદનો આ પ્રસંગ રમતગમતની ભાવના અને પરસ્પર સન્માનનું ઉદાહરણ બની ગયો. ભારતે શ્રેણીમાં 3-0થી ક્લીન સ્વીપ કર્યું હોવા છતાં વિજેતા ટીમની ઉજવણીમાં વિરોધી ટીમના કેપ્ટનને સામેલ કરવાનો ઐયરનો નિર્ણય ખાસ બન્યો.
ટ્રોફી સેરેમનીમાં ઇબ્રાહિમ ઝદરાન પણ બન્યા ટીમ ઈન્ડિયાની ઉજવણીનો ભાગ
દિલ્હીમાં રમાયેલી શ્રેણીની અંતિમ T20 મેચમાં ભારતે અફઘાનિસ્તાન સામે શાનદાર જીત મેળવી હતી. ત્રણેય મેચમાં ભારતીય ટીમે શ્રેણી પર પોતાનું વર્ચસ્વ જાળવી રાખ્યું અને અંતે 3-0થી શ્રેણી પોતાના નામે કરી.મેચ બાદ જ્યારે ભારતીય ટીમને ટ્રોફી સોંપવામાં આવી ત્યારે શ્રેયસ ઐયરે અફઘાનિસ્તાનના કેપ્ટન ઇબ્રાહિમ ઝદરાનને પોતાની સાથે આવવા માટે આમંત્રણ આપ્યું. ઝદરાન ભારતીય ટીમના ખેલાડીઓ સાથે ઊભા રહ્યા અને ટ્રોફી સાથે ફોટો પડાવ્યો.
આ ક્ષણમાં કોઈ સ્કોર, વિકેટ કે રેકોર્ડ કરતાં વધુ મહત્વ રમતના મેદાન બહારના સંબંધોનું હતું. ક્રિકેટમાં પરિણામ હંમેશા મહત્વનું હોય છે, પરંતુ આંતરરાષ્ટ્રીય સ્તરે રમાતી મેચોમાં એકબીજા પ્રત્યેનું સન્માન પણ એટલું જ મહત્વ ધરાવે છે. ઐયરના આ પગલામાં એ જ ભાવના જોવા મળી.આ ઘટનાની કોમેન્ટ્રી બોક્સમાં પણ ચર્ચા થઈ. ભારતના ભૂતપૂર્વ કેપ્ટન અને દિગ્ગજ ક્રિકેટર સુનીલ ગાવસ્કરે ઐયરના આ નિર્ણયની પ્રશંસા કરી. તેમણે વિરોધી કેપ્ટનને ટીમના ફોટોગ્રાફમાં સામેલ કરવાના નિર્ણયને સરાહનીય ગણાવ્યો અને કહ્યું કે આવો ચેમ્પિયન ફોટોગ્રાફ રમતની સાચી ભાવનાને વ્યક્ત કરે છે.
2018ની યાદો થઈ તાજી, રહાણેએ પણ અપનાવી હતી આવી જ પરંપરા
શ્રેયસ ઐયર અને ઇબ્રાહિમ ઝદરાન સાથેની આ તસવીરે ભારતીય ક્રિકેટની એક જૂની યાદને પણ તાજી કરી દીધી. વર્ષ 2018માં અફઘાનિસ્તાને ભારત સામે પોતાની ઐતિહાસિક ટેસ્ટ ડેબ્યૂ મેચ રમી હતી. બેંગલુરુના એમ. ચિન્નાસ્વામી સ્ટેડિયમમાં રમાયેલી આ ટેસ્ટ અફઘાનિસ્તાન માટે ટેસ્ટ ક્રિકેટમાં પ્રવેશની ઐતિહાસિક ક્ષણ હતી.ભારતે તે મેચમાં શાનદાર પ્રદર્શન કરતાં અફઘાનિસ્તાનને એક ઇનિંગ્સ અને 262 રનથી હરાવ્યું હતું. મેચ માત્ર બે દિવસમાં પૂરી થઈ હતી. ભારતના તત્કાલીન કેપ્ટન અજિંક્ય રહાણેએ મેચ બાદ જે પગલું ભર્યું હતું તે આજે પણ રમતગમતની ભાવનાના ઉદાહરણ તરીકે યાદ કરવામાં આવે છે.
ટેસ્ટ જીત્યા બાદ રહાણેએ અફઘાનિસ્તાનના કેપ્ટન અસગર અફઘાન અને તેમની ટીમને ભારતીય ટીમ સાથે ટ્રોફી ઉજવણીમાં સામેલ થવા માટે આમંત્રણ આપ્યું હતું. અફઘાનિસ્તાનની ટીમ સાથે ભારતીય ખેલાડીઓએ ફોટોગ્રાફ પડાવ્યો હતો. તે સમયે પણ પરિણામ ભારતની તરફેણમાં એકતરફી રહ્યું હતું, પરંતુ ઉજવણીમાં વિરોધી ટીમને સામેલ કરીને ભારતીય ટીમે મિત્રતા અને સન્માનનો સંદેશ આપ્યો હતો.
𝗙𝗿𝗶𝗲𝗻𝗱𝘀𝗵𝗶𝗽, indeed! 🤝😊
Afghanistan Captain Ibrahim Zadran joins #TeamIndia and Captain Shreyas Iyer during the victory celebrations 🙌
#AFGvIND | @ACBofficials https://t.co/TniITU33z0
— BCCI (@BCCI) September 17, 2026
લગભગ આઠ વર્ષ બાદ શ્રેયસ ઐયરે ઇબ્રાહિમ ઝદરાનને ટ્રોફી સાથેના ફોટોગ્રાફમાં સામેલ કરીને આ જ ભાવનાને ફરી એકવાર જીવંત કરી. બંને ઘટનાઓ વચ્ચેની સમાનતા એ છે કે ભારતે મેદાન પર જીત મેળવ્યા બાદ વિરોધી ટીમને ઉજવણીથી અલગ રાખવાને બદલે તેને પણ આ ખાસ ક્ષણનો ભાગ બનાવ્યો.
ક્રિકેટથી આગળનો સંદેશ
ભારત-અફઘાનિસ્તાન શ્રેણીનું પરિણામ સંપૂર્ણપણે ટીમ ઈન્ડિયાની તરફેણમાં રહ્યું. ભારતે ત્રણેય T20 મેચ જીતીને 3-0થી શ્રેણી પોતાના નામે કરી. જોકે અંતિમ મેચ બાદની આ તસવીરે બતાવ્યું કે ક્રિકેટની હરીફાઈ માત્ર મેદાન પૂરતી મર્યાદિત રહી શકે છે.શ્રેયસ ઐયર દ્વારા ઇબ્રાહિમ ઝદરાનને ટ્રોફી ઉજવણીમાં સામેલ કરવાથી વિરોધી ટીમ પ્રત્યે સન્માનનો સંદેશ ગયો. એક ટીમ જીતે અને બીજી હારે, પરંતુ મેચ બાદ બંને ટીમો વચ્ચેનું સન્માન જળવાઈ રહે તે રમતની સુંદરતા છે.
