ઈરાનનો અમેરિકી એમ્બેસી પર મોટો હુમલો: ઈરાકમાં મિસાઈલ વર્ષા, ખાડી દેશોમાં યુદ્ધની જ્વાળાઓ તેજ
મધ્ય પૂર્વમાં પરિસ્થિતિ પલપલ વણસી રહી છે. શનિવાર, 14 માર્ચના રોજ ઈરાકની રાજધાની બગદાદમાં સ્થિત અમેરિકી દૂતાવાસ (US Embassy) પરિસર પર મોટો હુમલો કરવામાં આવ્યો હતો. દૂતાવાસની અંદર આવેલા હેલીપેડ પર મિસાઈલ પડતા જોરદાર ધડાકો થયો હતો અને આખા પરિસરમાં ધુમાડાના ગોટા જોવા મળ્યા હતા. ઈરાન સમર્થિત જૂથો સતત ખાડી દેશોમાં આવેલા અમેરિકી સૈન્ય મથકોને નિશાન બનાવી રહ્યા છે.
ફુજૈરાહ બંદર પર ડ્રોન હુમલો
દૂતાવાસ પરના હુમલાની સાથે જ સંયુક્ત આરબ અમીરાત (UAE) ના ફુજૈરાહ બંદર પાસે પણ ખળભળાટ મચ્યો હતો. એક તેલ પ્રતિષ્ઠાન પાસે ડ્રોનનો કાટમાળ પડવાથી ભીષણ આગ લાગી હતી. સુરક્ષા દળોએ હવામાં જ આ ડ્રોનને તોડી પાડ્યું હતું, પરંતુ તેનો કાટમાળ તેલ ટર્મિનલ પાસે પડ્યો હતો. ફુજૈરાહ વિશ્વના મુખ્ય તેલ નિકાસ કેન્દ્રોમાંનું એક હોવાથી અહીં થતી કોઈ પણ સૈન્ય પ્રવૃત્તિ વૈશીવક તેલના ભાવ પર સીધી અસર કરી શકે છે.
ખાર્ગ આઈલેન્ડ પર અમેરિકાની મોટી કાર્યવાહી
આ હુમલાના એક દિવસ પહેલા જ અમેરિકી રાષ્ટ્રપતિ ડોનાલ્ડ ટ્રમ્પે જાહેરાત કરી હતી કે અમેરિકી સેનાએ ઈરાનના તેલ નેટવર્ક માટે કરોડરજ્જુ સમાન ખાર્ગ દ્વીપ (Kharg Island) પરના સૈન્ય ઠેકાણાઓને સંપૂર્ણપણે નષ્ટ કરી દીધા છે. ટ્રમ્પે ચેતવણી આપી છે કે જો ઈરાન ‘હોર્મુઝની સામુદ્રધુની’ માં જહાજોની અવરજવરમાં દખલ કરશે, તો અમેરિકા ઈરાનના સમગ્ર ઓઈલ નેટવર્કને ફૂંકી મારશે.
અમેરિકાએ વધારી સૈન્ય તાકાત
વધતા જતા જોખમને જોતા અમેરિકાએ મધ્ય પૂર્વમાં વધારાના 2500 મરીન સૈનિકો અને ઉભયચર હુમલાખોર જહાજ USS ત્રિપોલી મોકલવાનો નિર્ણય કર્યો છે. આ સૈનિકો ખાસ કરીને દૂતાવાસની સુરક્ષા અને કટોકટીના સમયે નાગરિકોને સુરક્ષિત બહાર કાઢવા માટે નિષ્ણાત માનવામાં આવે છે. જોકે, અમેરિકાએ સ્પષ્ટ કર્યું છે કે આ તૈનાતીનો અર્થ એ નથી કે જમીની યુદ્ધ શરૂ થવા જઈ રહ્યું છે.
ઈરાની સંસદની ચેતવણી અને લેબનાનમાં માનવીય સંકટ
બીજી તરફ, ઈરાની સંસદના અધ્યક્ષે ચેતવણી આપી છે કે અમેરિકી હુમલાઓનો બદલો નવા સ્તરે લેવામાં આવશે. ઈરાને હોર્મુઝની સામુદ્રધુનીને લગભગ બંધ કરી દીધી છે, જે વિશ્વના કુલ તેલ વેપારના પાંચમા ભાગનો માર્ગ છે.
દરમિયાન, લેબનાનમાં સ્થિતિ અત્યંત ગંભીર બની ગઈ છે. ઈઝરાયેલ દ્વારા હિઝબુલ્લાહના ઠેકાણાઓ પર કરવામાં આવેલા હુમલામાં અત્યાર સુધીમાં આશરે 800 લોકોના મોત થયા છે અને 8.5 લાખથી વધુ લોકો વિસ્થાપિત થયા છે. ઈઝરાયલે સ્પષ્ટ કર્યું છે કે જ્યાં સુધી ખતરો ટળશે નહીં ત્યાં સુધી હુમલાઓ ચાલુ રહેશે.
