LPG, FD અને ITR સહિત ૧ સપ્ટેમ્બરથી બદલાઈ જશે આ ૭ મહત્વપૂર્ણ નિયમો: જાણો તમારા ખિસ્સા અને દૈનિક જીવન પર શું થશે અસર
ઓગસ્ટ મહિનો પૂરો થવાની સાથે જ ૧ સપ્ટેમ્બર ૨૦૨૬થી દેશમાં વહીવટી, નાણાકીય અને પ્રવાસ ક્ષેત્રે જોડાયેલા વિભિન્ન ક્ષેત્રોમાં ઘણા મોટા ફેરફારો થવા જઈ રહ્યા છે. બેંકિંગ, ઈન્કમ ટેક્સ, એરપોર્ટ ઈમિગ્રેશન, ગેસ સિલિન્ડર અને ક્રેડિટ કાર્ડ જેવા દૈનિક જીવન સાથે સીધા જોડાયેલા ક્ષેત્રોમાં લાગુ થઈ રહેલા આ નવા નિયમોની અસર દરેક સામાન્ય અને ખાસ નાગરિકના બજેટ પર જોવા મળશે.
ઘણા મહત્વના વહીવટી અને નાણાકીય કામો પૂર્ણ કરવા માટે ૩૧ ઓગસ્ટ આખરી સમયમર્યાદા નક્કી કરવામાં આવી છે. જો સમયસર આ કામગીરી પૂરી કરવામાં નહીં આવે તો દંડ કે સેવાઓમાં અસુવિધાનો સામનો કરવો પડી શકે છે. સપ્ટેમ્બરની શરૂઆત થાય તે પહેલાં આ ૭ મોટા બદલાવો વિશે વિગતવાર જાણવું અત્યંત જરૂરી છે:
૧. બોર્ડિંગ પાસ પર ઈમિગ્રેશન સ્ટેમ્પની જરૂર રહેશે નહીં
વિદેશ પ્રવાસ કરતા ભારતીય મુસાફરો માટે હવાઈ સફર હવે વધુ સુગમ બનશે. બ્યુરો ઓફ ઈમિગ્રેશનના નવા દિશાનિર્દેશો મુજબ ૧ સપ્ટેમ્બરથી એરપોર્ટના ઈમિગ્રેશન કાઉન્ટર પર બોર્ડિંગ પાસ પર ભૌતિક (Physical) સ્ટેમ્પ લગાવવાની પ્રક્રિયા નાબૂદ કરવામાં આવી રહી છે.
હવે મુસાફરો પોતાના સ્માર્ટફોનમાં ઈલેક્ટ્રોનિક બોર્ડિંગ પાસ (e-Boarding Pass) અથવા તેની પ્રિન્ટેડ કોપી દર્શાવીને ઈમિગ્રેશન ક્લિયરન્સ મેળવી શકશે. આનાથી બોર્ડિંગ પાસ પર સ્ટેમ્પ ઝાંખો પડવા કે પેપર ખોવાઈ જવાની વિટંબણાઓમાંથી મુક્તિ મળશે અને ઈમિગ્રેશન લાઈનોમાં સમયનો બચાવ થશે.
૨. LPG ઈ-કેવાયસી (e-KYC) ની આખરી તારીખ
ઘરેલુ એલપીજી ગેસનો ઉપયોગ કરતા ગ્રાહકો માટે ૩૧ ઓગસ્ટ સુધીમાં આધાર બાયોમેટ્રિક વેરિફિકેશન કરાવવું અનિવાર્ય છે. ઈન્ડિયન ઓઈલ, બીપીસીએલ અને એચપીસીએલ જેવી સરકારી ઓઈલ વિતરણ કંપનીઓએ ઈ-કેવાયસી પ્રક્રિયા પૂર્ણ કરવા માટે ૩૧ ઓગસ્ટ છેલ્લી તારીખ નક્કી કરી છે.
જો ગ્રાહકો સમયસર ચકાસણી નહીં કરાવે, તો ૧ સપ્ટેમ્બરથી તેમને મળતી ઘરેલુ ગેસ સબસિડી અટકી શકે છે અથવા સિલિન્ડરના સપ્લાયમાં મુશ્કેલી આવી શકે છે.
૩. LPG, ATF, CNG અને PNG ના દરોની સમીક્ષા
દર મહિનાની પહેલી તારીખે ઓઈલ માર્કેટિંગ કંપનીઓ દ્વારા ઈંધણના ભાવોની સમીક્ષા કરવામાં આવે છે. ૧ સપ્ટેમ્બરે પણ ૧૪.૨ કિલોના ઘરેલુ સિલિન્ડર, ૧૯ કિલોના કોમર્શિયલ સિલિન્ડર તેમજ સીએનજી-પીએનજીના નવા ભાવ જાહેર થશે.
આ ઉપરાંત વિમાન બળતણ (ATF) ના નવા દરો પણ નક્કી થશે. ઓગસ્ટમાં કોમર્શિયલ સિલિન્ડરમાં દરો ઘટ્યા હતા. હવે સપ્ટેમ્બરમાં એટીએફના ભાવમાં જે ફેરફાર થશે તેની સીધી અસર હવાઈ મુસાફરીના ભાડા પર પડશે.
૪. ITR દાખલ કરવાની અંતિમ તારીખ
વેપાર કે વ્યવસાય સાથે સંકળાયેલા એવા તમામ ટેક્સપેયર્સ જેમને ખાતાઓના ઓડિટની જરૂર નથી, તેમના માટે મૂલ્યાંકન વર્ષ ૨૦૨૬-૨૭ નું ઈન્કમ ટેક્સ રિટર્ન (ITR) ભરવાની છેલ્લી તારીખ ૩૧ ઓગસ્ટ ૨૦૨૬ છે.
કરદાતાઓ ફોર્મ ૩ અને ૪ દ્વારા રિટર્ન સબમિટ કરી શકે છે. સમયમર્યાદા ચૂક્યા બાદ રિટર્ન ફાઈલ કરવા પર દંડ અને વ્યાજ ચૂકવવું પડી શકે છે.
૫. ક્રેડિટ કાર્ડ રિવોર્ડ્સ અને નિયમોમાં સુધારો
૧ સપ્ટેમ્બર ૨૦૨૬ થી અમેરિકન એક્સપ્રેસ ભારતમાં પોતાના પ્લેટિનમ ટ્રાવેલ ક્રેડિટ કાર્ડ પર મળતા માઈલસ્ટોન રિવોર્ડ્સમાં કાપ મૂકવા જઈ રહ્યું છે. ૧.૯ લાખ રૂપિયાના ખર્ચ પર મળતા ૭,૫૦૦ વધારાના પોઈન્ટ્સ બંધ થશે. બીજી તરફ, એક્સિસ બેંકે પણ ઓગસ્ટના અંતમાં પોતાના ક્રેડિટ કાર્ડના નિયમો અને શરતોમાં સુધારો લાગુ કરી દીધો છે.
૬. ખાંડના બલ્ક સ્ટોક પર પ્રતિબંધ
ખાદ્ય અને સાર્વજનિક વિતરણ મંત્રાલયે ખાંડના ભાવ નિયંત્રણમાં રાખવા ૧ સપ્ટેમ્બરથી ૩૦ નવેમ્બર ૨૦૨૬ સુધી જથ્થાબંધ ખરીદદારો માટે સ્ટોક લિમિટ નક્કી કરી છે. દર મહિને ૧૦ મેટ્રિક ટનથી વધુ વપરાશ કરતા એકમો માત્ર ૧૫ દિવસની જરૂરિયાત જેટલો જ સ્ટોક રાખી શકશે.
૭. બેંક FD માં પારદર્શિતાના નવા નિયમો
આરબીઆઈ (RBI) ની નવી માર્ગદર્શિકા મુજબ બેંકિંગ સિસ્ટમમાં સુધાર લાવવા ૧ સપ્ટેમ્બરથી ૩ કરોડ રૂપિયા કે તેથી વધુની બલ્ક એફડી પર બેંકોએ રોજ સવારે ૧૦:૧૦ વાગ્યા સુધી પોતાની વેબસાઈટ પર વ્યાજ દરો સત્તાવાર જાહેર કરવા પડશે.
