ટ્રમ્પ, પુતિન અને જિનપિંગની એક તસવીરે મચાવ્યો રાજકીય ગરમાવો! રાહુલ ગાંધીએ PM મોદીને ઘેર્યા, કહ્યું – ‘સમજૂતી કરનારા PM આ ટેબલ પર ન બેસી શકે’
અમેરિકાના રાષ્ટ્રપતિ ડોનાલ્ડ ટ્રમ્પ, રશિયાના રાષ્ટ્રપતિ વ્લાદિમીર પુતિન અને ચીનના રાષ્ટ્રપતિ શી જિનપિંગની એક તસવીરને લઈને ભારતમાં રાજકીય ચર્ચા શરૂ થઈ છે. લોકસભામાં વિપક્ષના નેતા અને કોંગ્રેસના વરિષ્ઠ નેતા રાહુલ ગાંધીએ આ ત્રણેય વૈશ્વિક નેતાઓની એકસાથે બેઠેલી તસવીર સોશિયલ મીડિયા પર શેર કરીને વડાપ્રધાન નરેન્દ્ર મોદી પર નિશાન સાધ્યું છે. રાહુલ ગાંધીની આ ટિપ્પણી બાદ ભાજપ અને કોંગ્રેસ વચ્ચે રાજકીય નિવેદનબાજી તેજ થવાની શક્યતા છે.
રાહુલ ગાંધીએ PM મોદી પર શું કહ્યું?
રાહુલ ગાંધીએ 20 નવેમ્બર, 2026ના રોજ સોશિયલ મીડિયા પ્લેટફોર્મ X પર ટ્રમ્પ, પુતિન અને જિનપિંગની તસવીર શેર કરી હતી. આ તસવીર સાથે તેમણે લખ્યું હતું કે, જો દેશમાં કોંગ્રેસની સરકાર હોત તો ભારતના વડાપ્રધાન પણ આ ટેબલ પર બેઠા હોત. તેમણે વધુમાં કટાક્ષ કરતાં કહ્યું કે, ‘સમજૂતી કરનારા વડાપ્રધાન ક્યારેય આ ટેબલ પર બેસી શકતા નથી.’
રાહુલ ગાંધીના આ નિવેદનનો સીધો નિશાન વડાપ્રધાન નરેન્દ્ર મોદી પર હતો. તેમના આ નિવેદનથી ફરી એકવાર ભારતની વિદેશનીતિ અને આંતરરાષ્ટ્રીય મંચ પર દેશની ભૂમિકાને લઈને રાજકીય ચર્ચા શરૂ થઈ છે.

શું છે ટ્રમ્પ, પુતિન અને જિનપિંગની બેઠક?
અમેરિકા, ચીન અને રશિયા વિશ્વની સૌથી શક્તિશાળી રાજકીય અને સૈન્ય શક્તિઓમાં ગણાય છે. આ ત્રણેય દેશોના રાષ્ટ્રાધ્યક્ષોની શેનઝેનમાં થયેલી ત્રિપક્ષીય બેઠકને આંતરરાષ્ટ્રીય સ્તરે ખાસ મહત્વ આપવામાં આવી રહ્યું છે.
19 નવેમ્બરે એશિયા-પેસિફિક ઇકોનોમિક કોઓપરેશન (APEC) સમિટ દરમિયાન આ ત્રણેય નેતાઓ વચ્ચે બેઠક યોજાઈ હતી. આ બેઠકમાં વૈશ્વિક સુરક્ષા, આંતરરાષ્ટ્રીય સંઘર્ષો, પરમાણુ જોખમો અને વૈશ્વિક સ્થિરતા જેવા મહત્વપૂર્ણ મુદ્દાઓ પર ચર્ચા થઈ હતી.
બેઠક બાદ ત્રણેય દેશોએ ‘The Russia-China-US Heads of State Declaration Toward Peace’ નામનું સંયુક્ત નિવેદન પણ જાહેર કર્યું હતું. તેમાં સંયુક્ત રાષ્ટ્રસંઘ (UN)માં સુધારા, ઊર્જા પુરવઠો વધારવા અને પરમાણુ જોખમ ઘટાડવા માટે ચર્ચા ચાલુ રાખવા જેવા મુદ્દાઓનો સમાવેશ કરવામાં આવ્યો હતો.
ભારતની વૈશ્વિક ભૂમિકાને લઈને સવાલ
રાહુલ ગાંધીના નિવેદન પાછળનો મુખ્ય રાજકીય મુદ્દો આંતરરાષ્ટ્રીય સ્તરે ભારતનું સ્થાન છે. કોંગ્રેસ નેતાનું કહેવું છે કે ભારત જેવો મોટો દેશ વૈશ્વિક રાજકીય ચર્ચાઓમાં વધુ સક્રિય ભૂમિકા ભજવવો જોઈએ.
રાહુલ ગાંધીએ અગાઉ પણ વિદેશનીતિને લઈને કેન્દ્ર સરકારની ટીકા કરી હતી. તેમના મતે ભારતે વૈશ્વિક મુદ્દાઓ પર માત્ર પ્રતિક્રિયા આપવાને બદલે નિર્ણય લેવાની પ્રક્રિયામાં પણ સક્રિય ભાગ લેવો જોઈએ.
If Congress were in power, India’s Prime Minister would be sitting at this table.
A compromised PM can never sit at this table. https://t.co/EpGZVnJPYq
— Rahul Gandhi (@RahulGandhi) November 20, 2026
ભાજપ તરફથી પણ વળતો પ્રહાર
રાહુલ ગાંધીની આ ટિપ્પણી એવા સમયે આવી છે જ્યારે તેમની વિદેશનીતિ સંબંધિત અગાઉની ટિપ્પણીઓ પર ભાજપના નેતાઓએ પણ સવાલો ઉઠાવ્યા હતા. ભાજપના પ્રવક્તા પ્રદીપ ભંડારીએ રાહુલ ગાંધીની પાકિસ્તાન સંબંધિત ટિપ્પણીઓની ટીકા કરી હતી અને તેમના પર રાજકીય પ્રહાર કર્યા હતા.
આમ, ટ્રમ્પ, પુતિન અને જિનપિંગની એક બેઠકની તસવીર હવે ભારતના રાજકારણમાં પણ ચર્ચાનો વિષય બની ગઈ છે. એક તરફ કોંગ્રેસ સરકારની વિદેશનીતિ પર સવાલો ઉઠાવી રહી છે, તો બીજી તરફ ભાજપ કોંગ્રેસના નેતાઓનાં નિવેદનો સામે વળતો જવાબ આપી રહ્યું છે.
આ સમગ્ર ઘટનાએ ફરી એકવાર એ ચર્ચા શરૂ કરી છે કે બદલાતા વૈશ્વિક રાજકીય સમીકરણોમાં ભારતની ભૂમિકા કેટલી મહત્વપૂર્ણ છે અને દેશે આંતરરાષ્ટ્રીય મંચ પર પોતાનું સ્થાન કેવી રીતે વધુ મજબૂત બનાવવું જોઈએ.
