મુકેશ અંબાણીએ ખરીદ્યું પ્રિયંકા ચોપરાનું ‘સામ્રાજ્ય’! જાણો કેટલા કરોડમાં થઈ આ ગ્લોબલ ડીલ?
ભારતના રિટેલ ક્ષેત્રના દિગ્ગજ ખેલાડી રિલાયન્સ રિટેલે બ્યુટી અને પર્સનલ કેયર માર્કેટમાં પોતાની પકડ મજબૂત કરવા માટે એક ખૂબ જ મોટું પગલું ભર્યું છે. કંપનીએ ગ્લોબલ આઈકોન અને અભિનેત્રી પ્રિયંકા ચોપરા જોનસની લોકપ્રિય હેરકેયર બ્રાન્ડ ‘Anomaly’ ને ખરીદી લીધી છે. આ ડીલ સાથે રિલાયન્સ હવે માત્ર દેશી જ નહીં પણ ગ્લોબલ બ્યુટી માર્કેટમાં પણ પોતાની મજબૂત હાજરી નોંધાવવા તૈયાર છે.
ડીલની વિગતો અને માલિકી હક
ગુરુવારે સત્તાવાર રીતે જાહેર કરવામાં આવ્યું હતું કે આ અધિગ્રહણ હેઠળ રિલાયન્સ રિટેલે Anomaly ના તમામ ટ્રેડમાર્ક, બ્રાન્ડ એસેટ્સ અને ડિજિટલ પ્રોપર્ટીઝ હસ્તગત કરી લીધી છે. આનો અર્થ એ થયો કે હવે આ બ્રાન્ડની ઈન્ટેલેક્ચ્યુઅલ પ્રોપર્ટી (IP) અને તેના સંપૂર્ણ ડિજિટલ ઈકોસિસ્ટમ પર રિલાયન્સનો માલિકી હક રહેશે. જોકે, આ ડીલ કેટલા કરોડમાં થઈ છે તેની નાણાકીય વિગતો હજુ ગુપ્ત રાખવામાં આવી છે.
Anomaly ની સફળતાની સફર
પ્રિયંકા ચોપરાએ વર્ષ ૨૦૨૧ માં ‘Anomaly’ બ્રાન્ડ લોન્ચ કરી હતી. આ બ્રાન્ડની ખાસિયત એ છે કે તે ‘ક્લીન, વીગન અને હાઈ-પરફોર્મન્સ’ પ્રોડક્ટ્સ બનાવે છે. પ્રિયંકાનો હેતુ એવો હતો કે લોકોને મોંઘી હેરકેયર પ્રોડક્ટ્સના બદલે પોસાય તેવી કિંમતે ગુણવત્તાયુક્ત વિકલ્પો મળે. લોન્ચ થયાના ટૂંકા ગાળામાં જ આ બ્રાન્ડે અમેરિકા અને ભારત સહિત વિશ્વના અનેક દેશોમાં પોતાની અલગ ઓળખ બનાવી લીધી હતી. તેના રિસાયકલ કરી શકાય તેવા પેકેજિંગે પણ પર્યાવરણ પ્રેમીઓનું ધ્યાન ખેંચ્યું હતું.
ઈશા અંબાણીની વ્યૂહરચના અને વિઝન
રિલાયન્સ રિટેલ વેન્ચર્સ લિમિટેડના ડાયરેક્ટર ઈશા અંબાણીએ આ ડીલ અંગે ઉત્સાહ વ્યક્ત કરતા જણાવ્યું હતું કે, “Anomaly ને અમારા પોર્ટફોલિયોમાં સામેલ કરવું એ આગામી પેઢીની જરૂરિયાતોને સમજતી બ્રાન્ડ્સ વિકસાવવાની દિશામાં અમારું વ્યૂહાત્મક કદમ છે. આ બ્રાન્ડની ગ્લોબલ પોઝિશનિંગ અને ક્લીન ફોર્મ્યુલેશનની ફિલસૂફી અમારા ઈકોસિસ્ટમમાં એક નવું જોમ ઉમેરશે.”
તેમણે વધુમાં ઉમેર્યું કે રિલાયન્સ હવે પ્રિયંકા સાથે મળીને તેના મોટા ઓફલાઈન નેટવર્ક અને ‘Tira’ જેવા ઓનલાઈન પ્લેટફોર્મ દ્વારા Anomaly ને ભારતના ખૂણે ખૂણે પહોંચાડશે.
પ્રિયંકા ચોપરાની ભૂમિકા: બ્રાન્ડ સાથે જોડાયેલા રહેશે
ઘણીવાર બિઝનેસ વેચાયા પછી સ્થાપકો અલગ થઈ જતા હોય છે, પરંતુ અહીં સ્થિતિ અલગ છે. પ્રિયંકા ચોપરા જોનસ હજુ પણ આ બ્રાન્ડ સાથે ‘ક્રિએટિવ ડાયરેક્ટર’ તરીકે જોડાયેલી રહેશે. તેઓ પ્રોડક્ટમાં નવા ઈનોવેશન, રિસર્ચ અને બ્રાન્ડ વિઝનનું કામ જોશે.
આ અંગે પ્રિયંકાએ ભાવુક થતા કહ્યું કે, “Anomaly ની શરૂઆત મારા માટે એક અંગત સફર હતી. હવે રિલાયન્સ જેવી મોટી કંપની સાથે જોડાણ એ આ બ્રાન્ડ માટે એક નવો અને રોમાંચક અધ્યાય છે. મને વિશ્વાસ છે કે રિલાયન્સના માધ્યમથી અમે ગ્રાહકોને વધુ સારી રીતે સેવા આપી શકીશું.”
ભારત અને આંતરરાષ્ટ્રીય બજાર પર ફોકસ
રિલાયન્સની યોજના મુજબ, હવે ભારત આ બ્રાન્ડ માટે પ્રાથમિકતા વાળું બજાર બનશે. ભારતીય વાતાવરણ, અહીના લોકોના વાળ અને સ્કેલ્પની સમસ્યાઓને ધ્યાનમાં રાખીને નવા ખાસ પ્રોડક્ટ્સ બનાવવામાં આવશે. આ ઉપરાંત, ઉત્તર અમેરિકા, યુનાઈટેડ કિંગડમ અને મિડલ ઈસ્ટ જેવા દેશોમાં પણ રિલાયન્સ આ બ્રાન્ડનો વિસ્તાર કરવાની યોજના ધરાવે છે.
રિલાયન્સ રિટેલનો વધતો પ્રભાવ
છેલ્લા કેટલાક સમયથી રિલાયન્સ રિટેલ ફેશન, બ્યુટી અને લાઈફસ્ટાઈલ સેગમેન્ટમાં આક્રમક રીતે આગળ વધી રહ્યું છે. તાજેતરમાં જ તેમણે ‘Tira’ બ્યુટી સ્ટોર્સ લોન્ચ કરીને નાયકા (Nykaa) અને ટાટા પાલેટ (Tata Palette) ને સીધી ટક્કર આપી છે. Anomaly જેવી ગ્લોબલ બ્રાન્ડના ઉમેરાથી રિલાયન્સ પાસે હવે પ્રીમિયમ અને સસ્તી એમ બંને કેટેગરીમાં મજબૂત વિકલ્પો ઉપલબ્ધ થયા છે.
