સ્ટીવ સ્મિથે બાબર આઝમને સિંગલ કેમ નકારી કાઢ્યો? BBL વિવાદ બાદ ઓસ્ટ્રેલિયન સ્ટારનું સંપૂર્ણ સ્પષ્ટીકરણ
બિગ બેશ લીગ (BBL) 2025–26 દરમિયાન સિડની સિક્સર્સ અને સિડની થંડર વચ્ચે રમાયેલી મેચમાં બનેલી એક ઘટનાએ વિશ્વ ક્રિકેટમાં ભારે ચર્ચા જગાવી છે. ઓસ્ટ્રેલિયાના અનુભવી બેટ્સમેન સ્ટીવ સ્મિથ અને પાકિસ્તાનના સ્ટાર ખેલાડી બાબર આઝમ વચ્ચેની ક્ષણિક અસહમતિ સોશિયલ મીડિયા અને ક્રિકેટ વિશ્લેષકો વચ્ચે ચર્ચાનો વિષય બની ગઈ. ખાસ કરીને સ્મિથે બાબર દ્વારા બોલાવવામાં આવેલી સિંગલને નકારી કાઢવાનો નિર્ણય કેમ લીધો, એ પ્રશ્ને સૌનું ધ્યાન ખેંચ્યું.
મેચનો સંદર્ભ: મોટું લક્ષ્ય અને મજબૂત શરૂઆત
16 જાન્યુઆરીએ રમાયેલી આ મેચમાં સિડની થંડરે પહેલા બેટિંગ કરતા 190 રનનો પડકારજનક લક્ષ્ય ઊભું કર્યું. તેના જવાબમાં સિડની સિક્સર્સે ઇનિંગની શરૂઆત માટે બાબર આઝમ અને સ્ટીવ સ્મિથને ઓપનિંગમાં મોકલ્યા.
બંને બેટ્સમેનોએ શરૂઆતમાં ટીમને સ્થિરતા આપી, પરંતુ જ્યાં સ્મિથ સંપૂર્ણ આક્રમક મૂડમાં હતો, ત્યાં બાબર સ્ટ્રાઈક રોટેશન અને ઇનિંગ બાંધવામાં વ્યસ્ત હતો.
11મી ઓવરનો ક્ષણ: જ્યાં વિવાદ શરૂ થયો
મેચનો સૌથી ચર્ચિત પળ 11મી ઓવરના છેલ્લાં બોલ પર આવ્યો.ક્રિસ ગ્રીન સામે બાબર આઝમે બોલને લોંગ-ઓન તરફ ધકેલીને સિંગલ માટે બોલાવ્યો, પરંતુ સ્ટીવ સ્મિથે તરત જ ઇનકાર કરી દીધો. એટલું જ નહીં, સ્મિથે હાથના ઇશારાથી પાવર સર્જ લેવાનો સંકેત આપ્યો.
આ સમયે બાબર આઝમ સ્પષ્ટપણે અસંતોષમાં દેખાયા. તેમનો ચહેરો અને શરીરભાષા બતાવતી હતી કે તેઓ સ્મિથના નિર્ણયથી સંમત નહોતા. આ દૃશ્ય કેમેરામાં કેદ થયું અને થોડા જ મિનિટોમાં સોશિયલ મીડિયા પર વાયરલ થઈ ગયું.
પાવર સર્જમાં સ્મિથનો તોફાન: ઇતિહાસ રચાયો
જે બાદમાં થયું, તે સ્ટીવ સ્મિથની વ્યૂહાત્મક વિચારસરણીને સમર્થન આપતું હતું.પાવર સર્જની પ્રથમ જ ઓવરમાં સ્મિથે સતત ચાર છગ્ગા ફટકારી કુલ 32 રન બનાવ્યા, જે બિગ બેશ લીગના ઇતિહાસમાં સૌથી મોંઘું ઓવર સાબિત થયું.આ વિસ્ફોટક બેટિંગથી મેચનો પલડો સંપૂર્ણપણે સિડની સિક્સર્સ તરફ વળી ગયો. જોકે, દુર્ભાગ્યવશ, આ જ તબક્કામાં 13મી ઓવરના પહેલા બોલ પર બાબર આઝમ આઉટ થઈ ગયા, અને તેઓ નિરાશાભરી હાલતમાં પેવેલિયન પરત ફર્યા.
સ્ટીવ સ્મિથની ઐતિહાસિક ઇનિંગ
સ્ટીવ સ્મિથે આ મેચમાં ક્રિકેટપ્રેમીઓને મંત્રમુગ્ધ કરી દીધા.તેમણે માત્ર 42 બોલમાં 100 રનની શાનદાર ઇનિંગ રમી, જેમાં 5 ચોગ્ગા અને 9 છગ્ગાનો સમાવેશ થાય છે. આ ઇનિંગને કારણે સિડની સિક્સર્સે લક્ષ્ય સહેલાઈથી હાંસલ કર્યું અને સ્મિથને પ્લેયર ઓફ ધ મેચનો ખિતાબ મળ્યો.
મેચ પછી સ્મિથનો ખુલાસો: વ્યૂહરચનાનું પરિણામ
મેચ બાદ પ્રેઝન્ટેશન દરમિયાન જ્યારે સ્મિથને સિંગલ ન લેવાના નિર્ણય વિશે પૂછવામાં આવ્યું, ત્યારે તેમણે સમગ્ર પરિસ્થિતિ પર પ્રકાશ પાડ્યો:
“10 ઓવર પૂરી થયા પછી મેં કેપ્ટન અને કોચ સાથે ચર્ચા કરી હતી. તેઓ તરત જ પાવર સર્જ લેવા માંગતા હતા, પરંતુ મેં એક ઓવર રાહ જોવાની વિનંતી કરી, જેથી હું ટૂંકી બાઉન્ડ્રીને લક્ષ્ય બનાવી શકું. હું પાવર સર્જની પહેલી ઓવર બગાડવા માંગતો ન હતો. પરિણામે અમે 32 રન બનાવ્યા. બાબર આ નિર્ણયથી નાખુશ હતો કે નહીં, એ અંગે મને ખાતરી નથી.”
સ્મિથના શબ્દોથી સ્પષ્ટ થયું કે આ નિર્ણય સંપૂર્ણપણે ટીમની રણનીતિ પર આધારિત હતો, કોઈપણ પ્રકારના વ્યક્તિગત અહંકાર કે અણગમાનો મુદ્દો નહોતો.
“Wasn’t happy, Babar.” 😳
Drama in the middle of the SCG after Steve Smith knocked back a run from Babar Azam, so he could take strike during the Power Surge. #BBL15 pic.twitter.com/rTh0RXE0A5
— KFC Big Bash League (@BBL) January 16, 2026
પાવર સર્જ શું છે? BBLનો અનોખો નિયમ
બિગ બેશ લીગમાં લાગુ પડતો પાવર સર્જ નિયમ અન્ય T20 લીગ્સથી અલગ છે:
- T20 ઇનિંગ્સની શરૂઆતની 4 ઓવર ફરજિયાત પાવરપ્લે હોય છે
- બાકી રહેલી 2 પાવરપ્લે ઓવર 10 ઓવર બાદ કોઈ પણ સમયે લઈ શકાય છે
- પાવર સર્જ દરમિયાન માત્ર 2 ફિલ્ડરોને જ વર્તુળની બહાર રહેવાની મંજૂરી હોય છે
- આ નિયમ બેટ્સમેનને વધુ આક્રમક રમત રમવાની તક આપે છે
