તેજસ્વિન શંકરે રચ્યો નવો ઇતિહાસ: ગ્લાસગો કોમનવેલ્થ ગેમ્સમાં ડેકાથલોનમાં ભારતને અપાવ્યો પ્રથમ મેડલ
સ્કોટલેન્ડના ગ્લાસગો શહેરમાં રમાઈ રહેલી કોમનવેલ્થ ગેમ્સ ૨૦૨૬માં ૩૧ જુલાઈનો દિવસ ભારતીય ખેલજગત માટે સુવર્ણ અક્ષરે લખાઈ ગયો છે. આ દિવસે ભારતીય રમતવીરોએ અદ્ભુત પ્રદર્શન કરીને અનેક મેડલો દેશના નામે કર્યા હતા. આ ઐતિહાસિક સફળતામાં સૌથી વધુ ધ્યાન ખેંચનાર નામ રહ્યું ભારતના સ્ટાર એથ્લેટ તેજસ્વિન શંકરનું, જેમણે અત્યંત કઠિન ગણાતી ડેકાથલોન ઇવેન્ટમાં બ્રોન્ઝ મેડલ જીતીને નવો રેકોર્ડ કાયમ કર્યો છે.
તેજસ્વિન શંકર કોમનવેલ્થ ગેમ્સના ઇતિહાસમાં ડેકાથલોન ઇવેન્ટમાં મેડલ જીતનારા પ્રથમ ભારતીય ખેલાડી બની ગયા છે. તેમણે આ સ્પર્ધાની તમામ ૧૦ ઇવેન્ટ્સના અંતે કુલ ૭૯૭૬ પોઈન્ટ મેળવીને ત્રીજું સ્થાન પ્રાપ્ત કર્યું હતું. આ ઐતિહાસિક ક્ષણ ત્યારે આવી જ્યારે છેલ્લી અને સૌથી થકવી દેનારી ૧૫૦૦ મીટર દોડની રેસમાં તેમણે પોતાનું સર્વસ્વ ન્યોછાવર કરીને દેશ માટે બ્રોન્ઝ મેડલ પાકો કર્યો.
૧૦ કઠિન ઇવેન્ટ્સ અને ઈજા સામેનો વિજય
ડેકાથલોન એ એથ્લેટિક્સની સૌથી અઘરી અને શારીરિક તથા માનસિક રીતે કસોટી કરનારી સ્પર્ધા ગણાય છે. જેમાં ૧૦ અલગ-અલગ રમતો જેવી કે દોડ, કૂદક અને ફેંકવાની સ્પર્ધાનો સમાવેશ થાય છે. તેજસ્વિન માટે આ સફર બિલકુલ સરળ નહોતી. સ્પર્ધા દરમિયાન તેઓ પગની ઈજાથી પીડાતા હતા. આ જ કારણસર તેઓ પોતાની મુખ્ય અને પ્રિય ઇવેન્ટ ગણાતી હાઇ જમ્પમાં પણ પોતાનું નિયમિત શ્રેષ્ઠ પ્રદર્શન આપી શક્યા ન હતા.
આટલી ગંભીર ઈજા અને અસહ્ય દુખાવા છતાં તેજસ્વિને હિંમત હારી નહીં. તેમણે પોતાની શારીરિક ક્ષમતા અને માનસિક મજબૂતીનો પરિચય આપતાં દરેક ઇવેન્ટમાં પોઈન્ટ્સ ભેગા કરવાનું ચાલુ રાખ્યું અને અંતે ૭૯૭૬ પોઈન્ટ સાથે ભારતનો ઝંડો લહેરાવ્યો.
ક્રિકેટર બનવાના સ્વપ્નથી લઈને રાષ્ટ્રીય રેકોર્ડ સુધી
૨૧ ડિસેમ્બર, ૧૯૯૮ના રોજ દિલ્હીમાં જન્મેલા તેજસ્વિન શંકરનું બાળપણથી જ ક્રિકેટર બનવાનું સ્વપ્ન હતું. તેમના ઘરનું વાતાવરણ પણ રમતગમત પ્રત્યે સકારાત્મક હતું. પરંતુ નાની ઉંમરે પિતાનું છત્ર ગુમાવ્યા બાદ તેમની જિંદગીમાં મોટો આઘાત આવ્યો હતો અને આગળનો રસ્તો મુશ્કેલ બની ગયો હતો.
દિલ્હીની સરદાર પટેલ વિદ્યાલયમાં અભ્યાસ કરતી વખતે તેમની શારીરિક ક્ષમતા જોઈને શાળાના શારીરિક શિક્ષણ શિક્ષકે (પીટી ટીચર) તેમને ક્રિકેટ છોડીને એથ્લેટિક્સ અપનાવવાની સલાહ આપી. આ એક સલાહે તેજસ્વિનની જિંદગીનો વળાંક બદલી નાખ્યો. માત્ર ૧૬ વર્ષની ઉંમરે તેમણે ૨.૧૮ મીટરનો ઊંચો કૂદકો લગાવીને ૧૨ વર્ષ જૂનો રાષ્ટ્રીય રેકોર્ડ તોડી નાખ્યો હતો.
History created in the Men's Decathlon! 🥉🇮🇳
Congratulations to TOPS athlete Tejaswin Shankar for winning Bronze and securing India's first-ever CWG medal in the Decathlon. The entire country is proud of you.#CWG2026 #Cheer4Bharat pic.twitter.com/rgtIpWG1Jy
— Dr Mansukh Mandaviya (@mansukhmandviya) July 31, 2026
આ સફળતાના જોરે તેમને યુનાઇટેડ સ્ટેટ્સની કેન્સાસ સ્ટેટ યુનિવર્સિટીમાં સ્પોર્ટ્સ સ્કોલરશિપ મળી, જ્યાં તેમણે પોતાની રમતમાં વધુ નિખાર આણ્યો. વર્ષ ૨૦૧૮માં તેમણે ૨.૨૯ મીટરનો હાઇ જમ્પ લગાવીને નવો નેશનલ રેકોર્ડ બનાવ્યો હતો, જે આજે પણ તેમના નામે જ છે.
બર્મિંગહામ ૨૦૨૨થી ગ્લાસગો ૨૦૨૬ સુધીનો મેડલ પ્રોગ્રામ
તેજસ્વિન શંકરે આ પહેલાં બર્મિંગહામમાં યોજાયેલી ૨૦૨૨ કોમનવેલ્થ ગેમ્સમાં પણ હાઇ જમ્પ સ્પર્ધામાં ૨.૨૨ મીટરનો કૂદકો લગાવીને બ્રોન્ઝ મેડલ જીત્યો હતો. તે સમયે પણ તેઓ હાઇ જમ્પમાં મેડલ જીતનારા પ્રથમ ભારતીય બન્યા હતા. હવે ૨૦૨૬માં તેમણે પોતાની રમતનો વ્યાપ વધારીને ડેકાથલોન જેવી મલ્ટી-ડિસિપ્લિન ઇવેન્ટમાં બ્રોન્ઝ જીતીને પોતાની અસાધારણ ક્ષમતા સાબિત કરી છે.
ગ્લાસગોમાં જુડોમાં મળેલા બે ગોલ્ડ મેડલ અને તેજસ્વિનના આ ઐતિહાસિક બ્રોન્ઝ સાથે ભારતની કુલ મેડલ સંખ્યા ૨૩ પર પહોંચી ગઈ હતી. તેજસ્વિન શંકરની આ જીત દેશના કરોડો યુવાનો માટે એક પ્રેરણાસ્રોત બની છે કે ગમે તેવી મુશ્કેલી કે ઈજા આવે, જો સંકલ્પ મજબૂત હોય તો ઇતિહાસ રચી શકાય છે.
