અમેરિકાની કડક ચેતવણી: વિઝા મેળવવો કોઈનો હક નથી, નવો નિયમ જાણીને ચોંકી જશો!
યુનાઇટેડ સ્ટેટ્સ (US) સરકારે ‘બર્થ ટૂરિઝમ’ (Birth Tourism) વિરુદ્ધ અત્યંત કડક વલણ અપનાવ્યું છે. અમેરિકાએ એક નવો વિઝા પ્રતિબંધ પ્રસ્તાવ અમલમાં મૂક્યો છે, જે સીધો જ એવા લોકો પર નિશાન સાધે છે જેઓ જાણી જોઈને બર્થ ટૂરિઝમમાં ભાગ લે છે, તેને પ્રોત્સાહન આપે છે અથવા તેનાથી આર્થિક નફો કમાય છે. આ નવો નિયમ ખાસ કરીને એવા લોકો માટે ખૂબ જ મહત્વપૂર્ણ છે જેઓ ગર્ભાવસ્થા અથવા બાળકના જન્મ સંબંધિત મુસાફરી માટે યુ.એસ.ના વિઝિટર વિઝા મેળવવાનું વિચારી રહ્યા છે.
યુ.એસ.ના સેક્રેટરી ઓફ સ્ટેટ માર્કો રુબિયોના જણાવ્યા અનુસાર, આ નવી નીતિનો મુખ્ય હેતુ એવા વાણિજ્યિક નેટવર્ક્સ અને વ્યક્તિઓને ડામવાનો છે, જેઓ માત્ર બાળકને અમેરિકન નાગરિકતા અપાવવાના હેતુથી અમેરિકન ઇમિગ્રેશન સિસ્ટમનો દુરુપયોગ કરે છે.
કાયદાકીય જોગવાઈ અને કડક વલણ
આ નવી નીતિ યુ.એસ.ના ઇમિગ્રેશન એન્ડ નેશનાલિટી એક્ટની કલમ 212(a)(3)(C) હેઠળ લાગુ કરવામાં આવી છે. માર્કો રુબિયોએ સ્પષ્ટ કર્યું છે કે વિદેશી વ્યાપારી બર્થ ટૂરિઝમ નેટવર્ક્સ દ્વારા નફા માટે અમેરિકન નાગરિકતા વેચવાના વ્યવસાયિક પ્રયાસો કરવામાં આવી રહ્યા છે.
તેમણે કહ્યું કે, “જે લોકો આ છેતરપિંડીમાં સામેલ છે અને તેનાથી નફો કમાય છે તેમના વિઝા પર પ્રતિબંધ મૂકીને અમે સ્પષ્ટ સંદેશ આપી રહ્યા છીએ: યુનાઇટેડ સ્ટેટ્સ વિદેશીઓને અમારી ઇમિગ્રેશન સિસ્ટમનો દુરુપયોગ કરવા અને અમેરિકન નાગરિકતાની પવિત્રતા સાથે ચેડાં કરવા નહીં દે.”
ભારતીય પ્રવાસીઓએ શું ધ્યાનમાં રાખવું?
જો તમે યુ.એસ. જવાનું આયોજન કરી રહ્યા છો, તો તમારે એ વાતની સ્પષ્ટ જાણ હોવી જોઈએ કે વિઝિટર વિઝા માટે બર્થ ટૂરિઝમ એ ક્યારેય માન્ય કારણ ગણાતું નથી.
યુ.એસ. સ્ટેટ ડિપાર્ટમેન્ટના વ્યાખ્યા મુજબ, બર્થ ટૂરિઝમ એટલે માત્ર અમેરિકામાં બાળકને જન્મ આપવાના હેતુથી જ મુસાફરી કરવી, જેથી બાળકને જન્મજાત અમેરિકન નાગરિકતા મળી શકે. વર્તમાન વિઝા માર્ગદર્શિકા સ્પષ્ટપણે જણાવે છે કે આ આધાર પર વિઝિટર વિઝા આપી શકાતા નથી. અગાઉ ભારતમાં આવેલા યુ.એસ. એમ્બેસીએ પણ ડિસેમ્બર 2025માં આ જ બાબતને પુનરાવર્તિત કરી હતી. એમ્બેસીએ સ્પષ્ટ કહ્યું હતું કે જો કોન્સ્યુલર અધિકારીઓને લાગશે કે મુસાફરીનો મુખ્ય ઉદ્દેશ્ય અમેરિકામાં બાળકને જન્મ આપીને નાગરિકતા મેળવવાનો છે, તો વિઝા અરજી ફગાવી દેવામાં આવશે.
નવા વિઝા પ્રતિબંધોની ઝપેટમાં કોણ આવશે?
આ નવો પ્રતિબંધ માત્ર પ્રવાસીઓ પૂરતો મર્યાદિત નથી, પરંતુ તે આ આખી સિસ્ટમ ચલાવનારાઓ સામે છે.
કોમર્શિયલ બર્થ ટૂરિઝમ નેટવર્કના માલિકો, સંચાલકો અને મેનેજરો.
વિઝા ‘ફિક્સર્સ’ જે અરજદારોને છેતરપિંડી આચરવા માટે તાલીમ કે માર્ગદર્શન આપે છે.
વિદેશી તબીબી સેવા પ્રદાતાઓ જેઓ આવી મુસાફરીમાં મદદ કરે છે અને યુ.એસ.ની મેડિકઈડ સિસ્ટમનો દુરુપયોગ કરે છે.
આ વ્યવસાયને સક્ષમ બનાવનાર અન્ય તમામ સહાયકો અને પરિવારના અમુક સભ્યો પણ આના ક્ષેત્રમાં આવી શકે છે.
“વિઝા મેળવવાનો કોઈ જન્મસિદ્ધ અધિકાર નથી”
માર્કો રુબિયોએ વિઝા પ્રક્રિયા વિશે સ્પષ્ટ વાત કરતા જણાવ્યું છે કે દુનિયામાં કોઈની પાસે પણ વિઝા મેળવવાનો અધિકાર નથી. વિઝા એ માત્ર એક પરવાનગી છે જે તમને મહેમાન તરીકે યુ.એસ.માં પ્રવેશવા દે છે. જો કોઈ વ્યક્તિ મુસાફરીના વિઝિટર તરીકે પ્રવેશ કરે અને રાષ્ટ્રીય હિત વિરુદ્ધની પ્રવૃત્તિઓમાં સંડોવાય, તો સરકાર તેનો વિઝા રદ કરવાનો સંપૂર્ણ અધિકાર ધરાવે છે.
યુ.એસ. દ્વારા ભૂતકાળમાં લેવાયેલા પગલાં
અમેરિકાએ આ મામલે અગાઉથી જ કડકાઈ શરૂ કરી દીધી હતી. ઓગસ્ટ 2026માં સ્ટેટ ડિપાર્ટમેન્ટે ‘બર્થ ટૂરિઝમ પ્રિવેન્શન ટાસ્ક ફોર્સ’ની રચના કરી હતી. આ ટાસ્ક ફોર્સે વૈશ્વિક સ્તરે વિઝા ધારકોની પ્રવૃત્તિઓની સમીક્ષા કરીને અત્યાર સુધીમાં 600 થી વધુ વિઝા રદ કરી દીધા છે. આ ઉપરાંત, ઓગસ્ટ મહિનામાં જ રાષ્ટ્રપતિ ડોનાલ્ડ ટ્રમ્પે બર્થરાઇટ સિટિઝનશિપ અને બર્થ ટૂરિઝમ સંબંધિત બે એક્ઝિક્યુટિવ ઓર્ડર પર સહી કરી હતી, જેમાં પ્રવેશ અટકાવવા, વિઝા રદ કરવા અને છેતરપિંડી કરનારાઓ સામે કડક કાનૂની પગલાં લેવાની જોગવાઈઓ છે.
