યુરોપમાં અમેરિકન પર્યટકો ઘટ્યા: હવે ભારત અને ચીનના પ્રવાસીઓ જાળવશે યુરોપનું અર્થતંત્ર, નવો સર્વે આવ્યો સામે
વૈશ્વિક પ્રવાસન ક્ષેત્રે એક મોટો બદલાવ જોવા મળી રહ્યો છે. અત્યાર સુધી યુરોપિયન દેશો માટે અમેરિકન પ્રવાસીઓ આવકનો મુખ્ય સ્ત્રોત ગણાતા હતા, પરંતુ હવે આ ટ્રેન્ડ બદલાઈ રહ્યો છે. યુરોપિયન ટ્રાવેલ કમિશન (ETC) ના તાજેતરના રિપોર્ટ અનુસાર, વર્ષ 2026 માં યુરોપમાં આંતરરાષ્ટ્રીય પ્રવાસીઓના આગમનમાં 6.2% નો વધારો થવાનો અંદાજ છે. રસપ્રદ વાત એ છે કે, આ વૃદ્ધિ અમેરિકાને કારણે નહીં, પરંતુ ભારત અને ચીનથી આવતા પ્રવાસીઓના દમ પર જોવા મળશે.
અમેરિકન પ્રવાસીઓમાં ઘટાડો, એશિયાનો દબદબો
છેલ્લા કેટલાક વર્ષોમાં મજબૂત ડોલરને કારણે અમેરિકનો મોટા પાયે યુરોપની મુસાફરી કરી રહ્યા હતા. જોકે, હવે આર્થિક ચિંતાઓ અને ભૌગોલિક-રાજકીય અસ્થિરતાને કારણે અમેરિકન પ્રવાસીઓની સંખ્યામાં સુસ્તી જોવા મળી રહી છે. ડેટા દર્શાવે છે કે અમેરિકાથી યુરોપ આવતા પ્રવાસીઓમાં માત્ર 4.2% નો સામાન્ય વધારો થવાની ધારણા છે.
તેની સામે એશિયાઈ દેશોમાંથી યુરોપ જનારા લોકોની સંખ્યામાં તોતિંગ ઉછાળો જોવા મળી રહ્યો છે. વર્ષ 2025 ની સરખામણીએ વર્ષ 2026 માં ચીનથી આવતા પ્રવાસીઓમાં 28% અને ભારતથી આવતા પ્રવાસીઓમાં 9% નો વધારો થવાનો અંદાજ છે. એવિએશન પ્લેટફોર્મ ‘Cirium’ ના આંકડા પણ આ વાતની પુષ્ટિ કરે છે કે અમેરિકા-યુરોપ વચ્ચેની ફ્લાઈટ બુકિંગમાં ઘટાડો થયો છે.
સસ્તી મુસાફરીને બદલે ‘હાઈ-વેલ્યુ એક્સપિરિયન્સ’ પર ભાર
અમેરિકન પ્રવાસીઓ ઘટવા છતાં યુરોપમાં પ્રવાસીઓ દ્વારા કરવામાં આવતા ખર્ચમાં કોઈ ઘટાડો થયો નથી. ઉલટાનું, 2025 માં ટ્રાવેલ સ્પેન્ડિંગ (મુસાફરી પાછળનો ખર્ચ) માં 9.7% વૃદ્ધિ થવાનો અંદાજ છે. આનો અર્થ એ છે કે હવે યુરોપ આવતા પ્રવાસીઓ, ખાસ કરીને ભારતીયો અને ચીનીઓ, સસ્તી ટુરને બદલે પ્રીમિયમ અનુભવો અને લક્ઝરી ટ્રાવેલ પર વધુ ધ્યાન આપી રહ્યા છે.
ETC ના વડા મિગેલ સાન્ઝના જણાવ્યા અનુસાર, “યુરોપ હવે એક ભરોસાપાત્ર ડેસ્ટિનેશન તરીકે ઉભરી રહ્યું છે, જે અનુભવ-આધારિત યાત્રા (Experience-based travel) ની વધતી માંગને પૂર્ણ કરવા તૈયાર છે.”
એરલાઇન્સના પ્રીમિયમ સેગમેન્ટમાં તેજી
આ બદલાતા ટ્રેન્ડની અસર એરલાઇન્સ પર પણ સ્પષ્ટ દેખાય છે. Lufthansa અને Air France-KLM જેવી મોટી એરલાઇન્સે નોંધ્યું છે કે ઇકોનોમી ક્લાસની સરખામણીએ પ્રીમિયમ અને બિઝનેસ ક્લાસની બુકિંગમાં નોંધપાત્ર વધારો થયો છે. ભારત અને ચીન જેવા ઉભરતા બજારો હવે યુરોપના પ્રવાસન બજારને માત્ર સ્થિરતા જ નથી આપી રહ્યા, પરંતુ તેને નવી ઊંચાઈઓ પર લઈ જઈ રહ્યા છે.
