ઇઝરાયલથી પીએમ મોદીની પાકિસ્તાનને ગર્જના: “આતંકવાદને દુનિયામાં કોઈ સ્થાન નથી, અમે સાથે મળીને તેને મૂળમાંથી ઉખાડીશું.”
વડાપ્રધાન નરેન્દ્ર મોદીએ તેમની ઇઝરાયલની મુલાકાત દરમિયાન આતંકવાદના મુદ્દે વૈશ્વિક મંચ પરથી આકરો પક્ષ રજૂ કર્યો છે. ઇઝરાયલના પ્રધાનમંત્રી બેન્જામિન નેતન્યાહૂ સાથેની ઉચ્ચ સ્તરીય બેઠક બાદ પીએમ મોદીએ સ્પષ્ટ શબ્દોમાં જણાવ્યું હતું કે, “આતંકવાદનું વિશ્વમાં કોઈ સ્થાન નથી અને ભારત-ઇઝરાયલ આતંકવાદના સમર્થકો સામે ખભે ખભો મિલાવીને લડશે.” પીએમ મોદીના આ નિવેદનને સીધી રીતે પાકિસ્તાન માટે એક મજબૂત ચેતવણી તરીકે જોવામાં આવી રહ્યું છે.
આતંકવાદ સામે ‘ઝીરો ટોલરન્સ’ની નીતિ
પીએમ મોદીએ આતંકવાદના મુદ્દે પુનરોચ્ચાર કર્યો કે ભારત હંમેશા વાતચીત અને શાંતિનો પક્ષધર રહ્યું છે, પરંતુ નિર્દોષ લોકોનો ભોગ લેતા આતંકવાદને ક્યારેય સહન કરી શકાય નહીં. તેમણે પશ્ચિમ એશિયામાં શાંતિ અને સ્થિરતા પર ભાર મૂકતા કહ્યું કે, આ ક્ષેત્રમાં ભારતનો સીધો રસ છે અને ગાઝા શાંતિ યોજના એ દિશામાં એક મહત્વનું પગલું છે.
‘વિશેષ વ્યૂહાત્મક ભાગીદારી’નો નવો યુગ
ભારત અને ઇઝરાયલ વચ્ચેના સંબંધો હવે માત્ર ખરીદ-વેચાણ પૂરતા મર્યાદિત નથી રહ્યા. પીએમ મોદીએ જાહેરાત કરી કે બંને દેશોએ તેમના સંબંધોને “વિશેષ વ્યૂહાત્મક ભાગીદારી” (Special Strategic Partnership) સુધી વધારવાનો નિર્ણય લીધો છે.
સંરક્ષણ ક્ષેત્ર: દાયકાઓ જૂનો સહયોગ હવે ટેકનોલોજી ટ્રાન્સફર અને સંયુક્ત ઉત્પાદન (Joint Production) માં ફેરવાશે. હવે ભારત અને ઇઝરાયલ મળીને અત્યાધુનિક સંરક્ષણ સાધનો બનાવશે.
ડિજિટલ ક્રાંતિ: ભારતીય પેમેન્ટ સિસ્ટમ ‘UPI’ હવે ઇઝરાયલમાં પણ માન્ય ગણાશે. આ માટે બંને દેશો વચ્ચે ઐતિહાસિક કરાર થયા છે, જે પ્રવાસન અને વેપારને વેગ આપશે.
કૃષિ અને નવીનતા: ગામડાઓ બનશે હાઇ-ટેક
પીએમ મોદીએ ભારતીય ખેડૂતો માટે ઇઝરાયેલી ટેકનોલોજીના મહત્વ પર ભાર મૂક્યો હતો. ૧. ઉત્કૃષ્ટતા કેન્દ્રો: ભારતમાં હાલમાં કાર્યરત ઇઝરાયલી સહયોગના કેન્દ્રોની સંખ્યા વધારીને ૧૦૦ સુધી લઈ જવાનો લક્ષ્યાંક છે. ૨. વિલેજ ઓફ એક્સેલન્સ: ઇઝરાયેલની પાણી બચાવવાની અને વધુ પાક મેળવવાની ટેકનોલોજી હવે ભારતીય ગામડાઓ સુધી પહોંચાડવા માટે ખાસ પ્રોજેક્ટ પર કામ ચાલી રહ્યું છે. ૩. એકેડેમિક ફોરમ: શિક્ષણ અને નવી શોધખોળ માટે ‘ભારત-ઇઝરાયલ એકેડેમિક ફોરમ’ની સ્થાપના કરવામાં આવશે.
વ્યાપારમાં તેજી: FTA ની તૈયારી
ગયા વર્ષે થયેલા BTA કરાર બાદ હવે બંને દેશો મુક્ત વ્યાપાર કરાર (FTA) ને અંતિમ ઓપ આપવા જઈ રહ્યા છે. આનાથી ભારતીય કંપનીઓ માટે ઇઝરાયલનું બજાર અને ઇઝરાયેલી રોકાણકારો માટે ભારતની તકો ખુલશે.
પીએમ મોદીએ તેમની મુલાકાતને ‘ગર્વ અને ભાવનાત્મક અનુભવ’ ગણાવ્યો હતો. ઇઝરાયલી સંસદમાં તેમને મળેલું સન્માન એ સાબિત કરે છે કે ૨૦૨૬માં ભારતની વિદેશ નીતિ અને ઇઝરાયલ સાથેની મિત્રતા સર્વોચ્ચ શિખર પર છે. આતંકવાદ સામેનો આ સંગઠિત અવાજ દુશ્મન દેશો માટે ચોક્કસપણે ચિંતાનો વિષય છે.
