કાશ્મીરમાં ખમેનીના નિધન બાદ પ્રદર્શનો પર કડકાઈ: લાલ ચોક સીલ, સ્કૂલ-કોલેજો બંધ અને સુરક્ષા દળોનો ચુસ્ત બંદોબસ્ત
ઈરાનના સર્વોચ્ચ નેતા ખમેનીના નિધન બાદ ભારતના જમ્મુ-કાશ્મીરમાંથી મોટા સમાચાર સામે આવી રહ્યા છે. શિયા સમુદાય દ્વારા કરવામાં આવી રહેલા વ્યાપક વિરોધ પ્રદર્શનોને ધ્યાનમાં રાખીને વહીવટીતંત્રે રસ્તાઓ પર મોટા પાયે સુરક્ષા દળોની તૈનાતી કરી છે. સાવચેતીના પગલે ઘાટીમાં શૈક્ષણિક સંસ્થાઓ બંધ રાખવાનો અને પરીક્ષાઓ સ્થગિત કરવાનો નિર્ણય લેવામાં આવ્યો છે. આ સાથે જ શ્રીનગરના પ્રખ્યાત લાલ ચોક વિસ્તારને સંપૂર્ણપણે સીલ કરી દેવામાં આવ્યો છે.
સુરક્ષાના અનેક સ્તરો અને ઈન્ટરનેટ પર નિયંત્રણ
શિયા સમુદાયના વિરોધ પ્રદર્શનને જોતા કોઈ પણ અનિચ્છનીય ઘટનાને રોકવા માટે સુરક્ષાના મલ્ટિ-લેયર લેયર ગોઠવવામાં આવ્યા છે. લાલ ચોક તરફ જતા તમામ રસ્તાઓ પર બેરિકેડ્સ અને તાર લગાવી દેવામાં આવ્યા છે. ખાસ કરીને શિયા બહુલ વિસ્તારોમાં વધારાની પોલીસ ફોર્સ તૈનાત કરવામાં આવી છે. અફવાઓને ફેલાતી રોકવા માટે મોબાઈલ ઈન્ટરનેટની સ્પીડ પણ હાલમાં ઘટાડી દેવામાં આવી હોવાના અહેવાલ છે.
રસ્તાઓ પર પોલીસની સાથે સેના પણ તૈનાત
રવિવારે ઈરાનમાં થયેલા ઈઝરાયેલી હુમલામાં શિયા નેતા ખમેનીના મૃત્યુ બાદ કાશ્મીરના વિવિધ ભાગોમાં અમેરિકા અને ઈઝરાયેલ વિરુદ્ધ ભારે વિરોધ પ્રદર્શનો થઈ રહ્યા છે. રવિવારથી શરૂ થયેલો આ સિલસિલો સોમવારે પણ ચાલુ રહેતા વહીવટીતંત્રે પોલીસની સાથે સેનાને પણ મેદાનમાં ઉતારી છે. શહેરના મહત્વના ચાર રસ્તાઓ પર કડક ચેકિંગ હાથ ધરવામાં આવી રહ્યું છે અને પ્રદર્શનકારીઓને એકઠા થતા રોકવા માટે પ્રતિબંધાત્મક આદેશો લાગુ કરવામાં આવ્યા છે.
રાજકીય સમર્થન અને શૈક્ષણિક સંસ્થાઓમાં રજા
અયાતુલ્લા ખમેનીના મોતના વિરોધમાં કાશ્મીરના અનેક નેતાઓએ ઈઝરાયેલની ટીકા કરી છે. અલગતાવાદી નેતા મીરવાઈઝ ઉમર ફારૂકે હડતાળનું એલાન આપ્યું છે, જેને જમ્મુ-કાશ્મીરના પૂર્વ મુખ્યમંત્રી મહેબૂબા મુફ્તીએ પણ સમર્થન આપ્યું છે. વર્તમાન પરિસ્થિતિને જોતા શિક્ષણ મંત્રીએ તમામ શિક્ષણ કેન્દ્રોમાં બે દિવસની રજા જાહેર કરી છે અને તમામ ચાલુ પરીક્ષાઓ સ્થગિત કરી દીધી છે. વહીવટીતંત્રના જણાવ્યા મુજબ, સ્થિતિ સામાન્ય થયા બાદ જ શાળાઓ ખોલવામાં આવશે અને પરીક્ષાઓનું આયોજન થશે.
મુખ્યમંત્રી ઉમર અબ્દુલ્લાની શાંતિની અપીલ
મુખ્યમંત્રી ઉમર અબ્દુલ્લાએ ઈરાનની ઘટનાઓ પર ઊંડી ચિંતા વ્યક્ત કરી છે. તેમણે તમામ સમુદાયોને શાંતિ જાળવવા અને એવા કોઈ પણ કાર્યથી બચવા અપીલ કરી છે જેનાથી તણાવ વધે. મુખ્યમંત્રીએ વધુમાં જણાવ્યું હતું કે, ઈરાનમાં રહેતા જમ્મુ-કાશ્મીરના રહેવાસીઓ અને ખાસ કરીને વિદ્યાર્થીઓની સુરક્ષા સુનિશ્ચિત કરવા માટે રાજ્ય સરકાર કેન્દ્રીય વિદેશ મંત્રાલય સાથે સતત સંપર્કમાં છે.
