“મહિલા અનામત એ કોઈ ઉપકાર નથી, તેમનો હક છે”: સંસદમાં પીએમ મોદીનો હુંકાર, વિપક્ષને આપી ‘ક્રેડિટ’ની ખુલ્લી ઓફર
ભારતીય સંસદના ઇતિહાસમાં ‘નારી શક્તિ વંદન અધિનિયમ’ એક સુવર્ણ પ્રકરણ તરીકે આલેખાયું છે. લોકસભામાં આ ઐતિહાસિક બિલ પર બોલતા વડાપ્રધાન નરેન્દ્ર મોદીએ સ્પષ્ટ કર્યું હતું કે વિકસિત ભારતનો સંકલ્પ માત્ર આધુનિક ઈન્ફ્રાસ્ટ્રક્ચર કે આર્થિક આંકડાઓ પૂરતો મર્યાદિત નથી, પરંતુ તેમાં દેશની અડધી વસ્તી એટલે કે મહિલાઓની સક્રિય ભાગીદારી અનિવાર્ય છે. પીએમ મોદીએ આ બિલને રાજકીય ત્રાજવે ન તોલવા અને રાષ્ટ્રહિતમાં સર્વસંમતિથી આગળ વધવા તમામ પક્ષોને અપીલ કરી હતી.
વિકસિત ભારત અને નારી શક્તિનો સહયોગ
પીએમ મોદીએ પોતાના સંબોધનમાં જણાવ્યું હતું કે, ૨૧મી સદીમાં ભારત એક નવા આત્મવિશ્વાસ સાથે આગળ વધી રહ્યું છે. તેમણે ભારપૂર્વક કહ્યું કે, “વિકસિત ભારત એટલે માત્ર ઉમદા પ્રકારના રેલવે માર્ગો કે આર્થિક પ્રગતિના ડેટા નથી. અમે એવું વિકસિત ભારત ઇચ્છીએ છીએ જેના નીતિ નિર્ધારણમાં ‘સબકા સાથ, સબકા વિકાસ’નો મંત્ર સમાયેલો હોય.” વડાપ્રધાને ઉમેર્યું કે દેશની ૫૦ ટકા વસ્તી જ્યારે દેશના ભવિષ્યના નિર્ણયો લેવામાં ભાગીદાર બનશે, ત્યારે જ ભારત સાચા અર્થમાં શક્તિશાળી બનશે.
“ક્રેડિટ તમારે જોઈએ તો લઈ લો, મને વાંધો નથી”
મહિલા અનામતના મુદ્દે શ્રેય (Credit) લેવાની ચાલી રહેલી રાજનીતિ પર વડાપ્રધાને ખૂબ જ રસપ્રદ અને ઉદાર વલણ અપનાવ્યું હતું. તેમણે વિપક્ષી સભ્યોને ઉદ્દેશીને કહ્યું કે, “જો તમે વિરોધ કરશો તો રાજકીય લાભ મને થશે, પણ જો વિરોધ નહીં કરો તો કોઈને નુકસાન નહીં થાય. અમને ક્રેડિટની જરૂર નથી. તમારે ક્રેડિટ જોઈતી હોય તો લઈ લો, કાલે અમે તમારી ફોટા પણ છપાવી દઈશું. હું તમને સામેથી ક્રેડિટનો ‘બ્લેન્ક ચેક’ આપવા તૈયાર છું.” તેમણે સ્પષ્ટ કર્યું કે આ બિલનો હેતુ રાજકીય લાભ મેળવવાનો નથી પણ વર્ષોથી રોકાયેલા મહિલાઓના અધિકારને તેમને સોંપવાનો છે.
ત્રણ દાયકાની પ્રતીક્ષા અને પશ્ચાતાપનો અવસર
વડાપ્રધાને યાદ અપાવ્યું કે મહિલા અનામતની ચર્ચા છેલ્લા ૨૫-૩૦ વર્ષથી ચાલી રહી છે. તેમણે કહ્યું કે જો આ બિલ દાયકાઓ પહેલા અમલમાં આવ્યું હોત, તો અત્યાર સુધીમાં તેમાં અનેક સુધારાઓ પણ થઈ ગયા હોત અને પરિપક્વતા આવી હોત. ભૂતકાળમાં જેમણે આ બિલનો વિરોધ કર્યો હતો, તેમને દેશની મહિલાઓએ ક્યારેય માફ કર્યા નથી.
તેમણે વધુમાં જણાવ્યું કે, “આપણે એવા ભ્રમમાં ન રહેવું જોઈએ કે આપણે નારી શક્તિને કંઈક આપી રહ્યા છીએ. આ તેમનો હક છે જે દાયકાઓ સુધી રોકી રાખવામાં આવ્યો હતો. આજે એ વિલંબનો પશ્ચાતાપ કરવાનો અવસર છે.”
પંચાયતથી સંસદ સુધીની રાજકીય ચેતના
પીએમ મોદીએ નોંધ્યું હતું કે છેલ્લા ૩૦ વર્ષમાં પંચાયતી રાજ વ્યવસ્થાને કારણે પાયાના સ્તરે મહિલાઓમાં જબરદસ્ત રાજકીય ચેતના આવી છે. પહેલાની સરખામણીએ આજે ગામડાની બહેનો વધુ મુખર બની છે અને લોકોના સુખ-દુઃખને સમજે છે. આજે દેશના ૯૦૦થી વધુ શહેરોમાં મહિલાઓ મ્યુનિસિપલ પ્રમુખ તરીકે સેવા આપી રહી છે. આ બહેનોનો અનુભવ જ્યારે સંસદ અને વિધાનસભાઓમાં જોડાશે, ત્યારે દેશની પ્રગતિની તાકાત અનેકગણી વધી જશે.
“કાલા ટીકા” અને સર્વસંમતિનો આગ્રહ
પોતાના ભાષણના અંતે વડાપ્રધાને વિપક્ષ દ્વારા કરવામાં આવેલી કેટલીક ટીકાઓ પર હળવી શૈલીમાં કટાક્ષ પણ કર્યો હતો. તેમણે કહ્યું કે, જ્યારે આપણે કોઈ શુભ કામ કરીએ છીએ ત્યારે તેને નજર ન લાગી જાય તે માટે ‘કાળું ટીકું’ લગાવવામાં આવે છે. વિપક્ષે જે ટીકાઓ કરી છે તે આ શુભ કાર્ય માટે ‘કાળા ટીકા’ સમાન છે, તે બદલ તેમણે વિપક્ષનો આભાર માન્યો હતો.
પીએમ મોદીએ અંતમાં અપીલ કરી કે જો આ બિલ સર્વસંમતિથી પસાર થાય છે, તો તેનાથી સામૂહિક શક્તિ પ્રગટ થશે અને તેના પરિણામો ખૂબ જ સારા આવશે. આ કોઈ પક્ષનો નહીં પણ સમગ્ર રાષ્ટ્રનો નિર્ણય છે અને ૨૦૨૪ના પરિણામો સાક્ષી પૂરે છે કે જનતા હવે કામ કરનારાઓની સાથે છે.
