ખેતી અને સિંચાઈ માટે પંજાબનો મોટો માસ્ટર પ્લાન: પાઇપલાઇન નેટવર્ક પાછળ સરકાર કરોડો રૂપિયાનો ધુઆંધાર ખર્ચ કરશે
પંજાબના મુખ્યમંત્રી ભગવંત માને ખેડૂતોના હિતમાં એક બહુ મોટી જાહેરાત કરી છે. મોગાના ભલ્લુરમાં આયોજિત ‘લોક મિલની’ (જાહેર વાર્તાલાપ) કાર્યક્રમ દરમિયાન જનમેદનીને સંબોધતા તેમણે જણાવ્યું કે, આ વર્ષના અંત સુધીમાં રાજ્યના દરેક ખેતર સુધી નહેરનું પાણી પહોંચાડવા માટે સરકાર વધારાની ૭,૦૦0 કિલોમીટર લાંબી નવી પાઇપલાઇન નાખશે. મુખ્યમંત્રીએ દાવો કર્યો કે તેમની સરકારે અત્યાર સુધીમાં રાજ્યની લગભગ ૮૦ ટકા ખેતીલાયક જમીન સુધી નહેરનું પાણી પહોંચાડવાની ગેરંટી પૂરી કરી છે, જ્યારે અગાઉની સરકારોએ હંમેશા ખેડૂતોની અવગણના કરી હતી.
૨૧,૦૦૦ ક્યુસેક પાણી છોડાયું અને જળસ્તરમાં સુધારો
મુખ્યમંત્રી ભગવંત માને પોતાના વહીવટીતંત્રની સિદ્ધિઓ ગણાવતા કહ્યું કે, છેલ્લા ચાર વર્ષમાં જ રાજ્યભરમાં ૧૪,૦૦૦ કિલોમીટર લાંબી પાઇપલાઇન અને પાણીની ચેનલોનું નેટવર્ક તૈયાર કરી દેવામાં આવ્યું છે.
મુખ્ય આંકડો: ખેડૂતોની સિંચાઈની જરૂરિયાતોને પહોંચી વળવા માટે આ નહેરો અને પાઇપલાઇનોમાં અત્યાર સુધીમાં ૨૧,૦૦૦ ક્યુસેક પાણી છોડવામાં આવ્યું છે. આ ઉપરાંત, ભૂગર્ભ જળના સ્તરને ઊંચું લાવવા માટે નહેરો અને નદીઓમાં ખાસ રિચાર્જ પોઇન્ટ બનાવવામાં આવ્યા છે, જેના કારણે રાજ્યમાં પાણીનું સ્તર બે થી ચાર મીટર જેટલું ઉપર આવ્યું છે.
વિપક્ષી એકતા અને સુખબીર બાદલ પર આકરા પ્રહારો
રાજકીય મોરચે પ્રહારો કરતા સીએમ માને કહ્યું કે, ૨૦૨૨ની વિધાનસભા ચૂંટણીમાં જનતા દ્વારા નકારી કાઢવામાં આવેલા તમામ પક્ષો હવે તેમની સરકાર વિરુદ્ધ એક થઈ ગયા છે, કારણ કે તેઓ આમ આદમી પાર્ટી (AAP) સરકારના કામોની બરાબરી કરી શકતા નથી.
અકાલી દળના નેતા સુખબીર સિંહ બાદલ પર કટાક્ષ કરતા તેમણે કહ્યું, “સુખબીર બાદલ હજુ પણ ૨૦૨૨ની હારના આઘાતમાંથી બહાર આવ્યા નથી અને કાલ્પનિક દુનિયામાં જીવી રહ્યા છે. તેમણે તાજેતરમાં દાવો કર્યો હતો કે તેમણે પોતાના બધા ધારાસભ્યોને વિધાનસભાનો બહિષ્કાર કરવાનો આદેશ આપ્યો છે, પણ તેઓ એ ભૂલી ગયા કે હવે અકાલી દળ પાસે વિધાનસભામાં માત્ર એક જ ધારાસભ્ય બચ્યો છે, જે તેમના સગા છે.” તેમણે આરોપ લગાવ્યો કે અકાલીઓના કુશાસન દરમિયાન ડ્રગ માફિયાઓને પ્રોત્સાહન મળ્યું, જેના કારણે પંજાબની અનેક પેઢીઓ બરબાદ થઈ ગઈ.
ડ્રગ્સ માફિયાઓ પર કડક કાર્યવાહી અને જનકલ્યાણના કાર્યો
પોતાના શાસનકાળના રિપોર્ટ કાર્ડ અંગે વાત કરતા મુખ્યમંત્રીએ જણાવ્યું કે પંજાબ સરકાર ખરેખર આમ જનતા માટે કામ કરી રહી છે.
મફત વીજળી અને નોકરીઓ: રાજ્યના ઘરોમાં મફત વીજળી પૂરી પાડવામાં આવી રહી છે અને કોઈ પણ જાતના ભ્રષ્ટાચાર વગર ૬૮,૦૦૦ થી વધુ યુવાનોને સરકારી નોકરીઓ આપવામાં આવી છે.
આર્થિક બચત: રાજ્યભરમાં બિનજરૂરી ટોલ પ્લાઝા બંધ કરીને જનતાના દરરોજના ₹૭૦ લાખ બચાવવામાં આવી રહ્યા છે.
