ઉત્તરાખંડના ચમોલીમાં મોટો અકસ્માત: નિર્માણાધીન ટનલમાં પાણી ભરાતા ૭ મજૂરોના મોત, બચાવ કામગીરી ચાલુ
ઉત્તરાખંડના ચમોલી જિલ્લાના પીપલકોટી વિસ્તારમાં એક અત્યંત દર્દનાક અકસ્માત સામે આવ્યો છે. ટિહરી હાઇડ્રો ડેવલપમેન્ટ કોર્પોરેશન લિમિટેડ (THDC) ના નિર્માણાધીન પ્રોજેક્ટની એક ટનલમાં અચાનક મોટા પ્રમાણમાં પાણી અને કાટમાળ ઘૂસી જતાં ભારે અફરાતફરી મચી ગઈ હતી. અકસ્માત સમયે ટનલની અંદર કામ કરી રહેલા અનેક મજૂરો ફસાયા હતા. આ દુર્ઘટનામાં અત્યાર સુધીમાં સાત કામદારોના મોત થયા છે, જ્યારે અન્ય ઘણા મજૂરો હજુ પણ અંદર ફસાયેલા હોવાની આશંકા છે. ઘટનાની જાણ થતાં જ NDRF અને SDRFની ટીમોએ સ્થળ પર પહોંચીને યુદ્ધના ધોરણે રાહત અને બચાવ કામગીરી શરૂ કરી દીધી છે.
૧૯ લોકોને બહાર કઢાયા, ૭ ને મૃત જાહેર કરાયા
અધિકારીઓએ આપેલી માહિતી મુજબ, દુર્ઘટના બન્યા બાદ તુરંત જ બચાવ ટીમોએ ઝડપી કાર્યવાહી કરીને અત્યાર સુધીમાં ૧૯ કામદારોને ટનલમાંથી બહાર કાઢ્યા હતા. આ તમામ લોકોને તાત્કાલિક સારવાર અર્થે નજીકની ગોપેશ્વર જિલ્લા હોસ્પિટલમાં ખસેડવામાં આવ્યા હતા. હોસ્પિટલના તબીબોએ ચકાસણી બાદ ૧૯ માંથી સાત કામદારોને મૃત જાહેર કર્યા હતા.
બાકીના મજૂરો પૈકી ૧૩ લોકોની હાલત સ્થિર હોવાનું જાણવા મળ્યું છે, જેમાંથી ૧૦ દર્દીઓને હોસ્પિટલમાં દાખલ કરીને સારવાર આપવામાં આવી રહી છે. દરમિયાન, એક યુવાન મજૂરની ગંભીર પરિસ્થિતિને ધ્યાનમાં રાખીને વધુ સારવાર માટે શ્રીનગરની બેઝ હોસ્પિટલમાં રિફર કરવામાં આવ્યો છે.
જળબંબાકાર અને સતત ટપકતા પાણી વચ્ચે મુશ્કેલ ઓપરેશન
એનડીઆરએફ (NDRF) ટીમના કમાન્ડર અમૃત લાલ મીણાએ ઘટનાસ્થળની પરિસ્થિતિ અંગે જણાવતાં કહ્યું કે, જ્યારે બચાવ ટીમ ઘટનાસ્થળે પહોંચી ત્યારે આખી ટનલ પાણીથી ભરેલી હતી. ટનલની બંને બાજુઓ અને છત પરથી પણ સતત પાણી ટપકી રહ્યું હતું, જેના કારણે કામગીરીમાં ભારે અવરોધ ઊભો થયો હતો.
તેમણે ઉમેર્યું હતું કે બચાવ ટીમોએ ખાસ પ્રકારના પમ્પિંગ સાધનો અને કટીંગ ટૂલ્સનો ઉપયોગ કરીને ટનલમાં પ્રવેશ કર્યો હતો. ઓપરેશન દરમિયાન ચાર મૃતદેહોને ઊંડા પાણીમાંથી બહાર કાઢવામાં આવ્યા હતા. ટીમના જણાવ્યા મુજબ, જ્યાં સુધી ટનલની અંદર રહેલા તમામ લોકોને સુરક્ષિત રીતે બહાર ન કાઢી લેવાય ત્યાં સુધી બચાવ કામગીરી અવિરતપણે ચાલુ રહેશે.
અકસ્માત સમયે ૨૦ થી ૨૨ કામદારો હાજર હોવાનો અંદાજ
ટીએચડીસી (THDC) ના એક્ઝિક્યુટિવ ડિરેક્ટર (પ્રોજેક્ટ્સ) કુમાર શરદે જણાવ્યું હતું કે, પ્રાથમિક અહેવાલો મુજબ જે સમયે આ અકસ્માત સર્જાયો ત્યારે ટનલની અંદર આશરે ૨૦ થી ૨૨ કામદારો ફરજ પર હાજર હતા. ઘટના બનતાની સાથે જ વહીવટી તંત્રને જાણ કરવામાં આવી હતી અને બચાવ દળો તૈનાત કરવામાં આવ્યા હતા.
પ્રારંભિક તબક્કે ૧૮ જેટલા કામદારોને બહાર કાઢીને હોસ્પિટલ ભેગા કરાયા હતા, જેમાં ૩ થી ૪ મજૂરોની સ્થિતિ અત્યંત નાજુક હતી. હાલમાં ટનલની અંદર ફસાયેલા અન્ય શક્ય કામદારોને શોધવા માટે થર્મો-કેમેરા અને લાઇફ સપોર્ટ સાધનોની મદદ લેવામાં આવી રહી છે. સ્થાનિક વહીવટી તંત્ર અને બચાવ દળો માટે પ્રાથમિકતા એ જ છે કે ફસાયેલા તમામ લોકોને શક્ય તેટલી વહેલી તકે સલામત બહાર લાવવામાં આવે.
