સોશિયલ મીડિયા એપ બનશે બેંક! ઝીરો ટ્રાન્સફર ફી, ૬% વ્યાજ અને વિઝા ડેબિટ કાર્ડના ફાયદા
ટેકનોલોજીની દુનિયામાં પોતાના સાહસિક નિર્ણયો માટે જાણીતા એલોન મસ્કે પોતાના સોશિયલ મીડિયા પ્લેટફોર્મ ‘X’ ને માત્ર વિચારો વ્યક્ત કરવા સુધી સીમિત ન રાખતા, તેને ડિજિટલ ફાઇનાન્સનું મોટું કેન્દ્ર બનાવી દીધું છે. કંપનીએ ‘X Money’ નામથી પોતાની નવી ડિજિટલ પેમેન્ટ અને બેન્કિંગ સેવા સત્તાવાર રીતે શરૂ કરી દીધી છે.
આ સુવિધા શરૂ થવાથી હવે X એપના યુઝર્સ અલગ-અલગ બેંકિંગ એપ્સ વાપરવાને બદલે એક જ પ્લેટફોર્મ પરથી પૈસાની આપ-લે, બિલ ચુકવણી અને વિઝા ડેબિટ કાર્ડ જેવી સુવિધાઓનો સીધો લાભ લઈ શકશે. હાલના તબક્કે આ સેવા અમેરિકામાં X Premium અને Premium Plus સબસ્ક્રાઇબર્સ માટે ઉપલબ્ધ કરાવવામાં આવી છે.
શું છે X Money અને તેમાં કઈ સુવિધાઓ મળશે?
‘X Money’ એ અલગથી ડાઉનલોડ કરવાની કોઈ નવી એપ નથી, પરંતુ સોશિયલ મીડિયા પ્લેટફોર્મ X ની અંદર જ ઈન્ટિગ્રેટ કરવામાં આવેલી એક આધુનિક ડિજિટલ બૅન્કિંગ અને પેમેન્ટ સિસ્ટમ છે. તેનો મુખ્ય ઉદ્દેશ્ય સોશિયલ નેટવર્કિંગ, ચેટિંગ અને રોજિંદી નાણાકીય સેવાઓને એક જ જગ્યાએ ઉપલબ્ધ કરાવવાનો છે.
આ પ્લેટફોર્મ પર યુઝર્સને ડાયરેક્ટ ડિપોઝિટ એકાઉન્ટ, પીઅર-ટુ-પીઅર (P2P) મની ટ્રાન્સફર અને વાયર ટ્રાન્સફર જેવી સુવિધાઓ મળશે. સૌથી મોટી રાહતની વાત એ છે કે X ના યુઝર્સ કોઈપણ ટ્રાન્સફર ફી આપ્યા વગર એકબીજાને સરળતાથી પૈસા મોકલી શકશે.
આ ઉપરાંત, બિલ પેમેન્ટ અને ફિઝિકલ ચેક મોકલવાના વિકલ્પો પણ આમાં ઉમેરવામાં આવ્યા છે. ગ્રાહકોને એક પ્રીમિયમ લુક આપવા માટે કંપની મેટલ ફિનિશવાળું વિઝા ડેબિટ કાર્ડ પણ આપશે, જેના પર યુઝરનું X પ્રોફાઇલ હેન્ડલ છપાયેલું હશે. આ કાર્ડ પર ૩ ટકા કેશબેક અને યુઝર્સની જમા રકમ પર વાર્ષિક ૬.૦૦ ટકા સુધી વ્યાજ (APY) આપવાનો મોટો દાવો કંપની દ્વારા કરવામાં આવ્યો છે.
સુરક્ષાનું માળખું અને ક્રોસ રિવર બેંક સાથે ભાગીદારી
ઘણા યુઝર્સના મનમાં સવાલ થાય કે શું X એક બેંક બની ગઈ છે? પરંતુ ટેકનિકલ રીતે X Money પોતે કોઈ બેંક તરીકે કામ કરતી નથી. કંપનીએ ગ્રાહકોની સુરક્ષા માટે ન્યૂ જર્સી સ્થિત પ્રખ્યાત રેગ્યુલેટેડ ‘ક્રોસ રિવર બેંક’ (Cross River Bank) સાથે હાથ મિલાવ્યા છે.
યુઝર્સની જમા રકમ આ બેંકમાં સુરક્ષિત રાખવામાં આવશે, જે ફેડરલ ડિપોઝિટ ઇન્સ્યોરન્સ કોર્પોરેશન (FDIC) હેઠળ આવે છે. આથી દરેક ડિપોઝિટરને પાત્ર જમા રકમ પર ૨,૫૦,૦૦૦ ડોલર સુધીનું વીમા કવચ આપમેળે પ્રાપ્ત થશે.
Your money, on the world’s most powerful network
𝕏 Money is rolling out to U.S. Premium and Premium+ subscribers starting today pic.twitter.com/2c1UMkB4Kn
— X Money (@XMoney) July 27, 2026
ઝડપી ટ્રાન્ઝેક્શન માટે તેમાં ‘વિઝા ડાયરેક્ટ ટેકનોલોજી’ નો ઉપયોગ કરાયો છે, જેથી યુઝર્સના બેંક એકાઉન્ટ અને ડેબિટ કાર્ડ વચ્ચે ત્વરિત નાણાકીય વ્યવહારો થઈ શકે. ડિજિટલ હેકિંગથી બચવા માટે પાસવર્ડના બદલે અત્યાધુનિક ‘પાસકી’ (Passkey) નો સપોર્ટ આપવામાં આવ્યો છે, જેથી ગ્રાહકો પોતાના ફિંગરપ્રિન્ટ, ફેસ રિકગ્નિશન કે ડિવાઇસ પીન દ્વારા જ લોગિન કરી શકશે.
ભારતીય બજારમાં ક્યારે થશે એન્ટ્રી?
હાલમાં X Money માત્ર અમેરિકાના યુઝર્સ માટે જ રોલઆઉટ કરવામાં આવ્યું છે. એલોન મસ્કે સ્પષ્ટ કર્યું છે કે તેમની યોજના આ સેવાને તબક્કાવાર રીતે સમગ્ર વિશ્વના અન્ય મોટા બજારોમાં પણ વિસ્તારવાની છે.
જોકે, ભારતમાં લોન્ચિંગ અંગે હજુ સુધી કંપની દ્વારા કોઈ સત્તાવાર તારીખ કે જાહેરાત કરવામાં આવી નથી. જો ભવિષ્યમાં રિઝર્વ બેંક ઓફ ઇન્ડિયા (RBI) ની મંજૂરી મેળવીને આ સેવા ભારતીય બજારમાં પ્રવેશ કરશે, તો તેની સીધી સ્પર્ધા ભારતની સ્થાપિત ડિજિટલ પેમેન્ટ સેવાઓ જેવી કે ગુગલ પે (Google Pay), ફોનપે (PhonePe), પેટીએમ (Paytm) અને વોટ્સએપ પેમેન્ટ્સ સાથે થશે.
