PoKમાં હિંસા અને અત્યાચાર પર ભારતની કડક ચેતવણી, આંતરરાષ્ટ્રીય સમુદાયને હસ્તક્ષેપ કરવા અપીલ
પાકિસ્તાન અધિકૃત જમ્મુ અને કાશ્મીર (PoK) ની સ્થિતિ પર ભારતે ફરી એકવાર અત્યંત કડક વલણ અપનાવ્યું છે. ભારતે આંતરરાષ્ટ્રીય મંચો પરથી પાકિસ્તાનને સ્પષ્ટ શબ્દોમાં ચેતવણી આપી છે અને ત્યાંની સ્થિતિ પર ગંભીર ચિંતા વ્યક્ત કરી છે. વિદેશ મંત્રાલય (MEA) એ સ્પષ્ટ કર્યું છે કે પાકિસ્તાન કેવી રીતે પોતાની દમનકારી નીતિઓ દ્વારા ત્યાંના નાગરિકોનો અવાજ દબાવવાનો પ્રયાસ કરી રહ્યો છે.
જૂનથી અત્યાર સુધી 90 નિર્દોષોના મોત
રાજધાની દિલ્હીમાં દર બે અઠવાડિયે યોજાતી નિયમિત પ્રેસ કોન્ફરન્સ દરમિયાન વિદેશ મંત્રાલયના પ્રવક્તા રણધીર જયસ્વાલે પાકિસ્તાન અધિકૃત કાશ્મીરમાં થઈ રહેલી બર્બરતાના આંકડા રજૂ કર્યા હતા. તેમણે જણાવ્યું કે આ વર્ષના જૂન મહિનાથી અત્યાર સુધીમાં પાકિસ્તાની સેના અને સુરક્ષા દળોની હિંસક કાર્યવાહીમાં ઓછામાં ઓછા 90 સામાન્ય નાગરિકોના જીવ ગયા છે.
પ્રવક્તાએ કડક શબ્દોમાં કહ્યું કે પાકિસ્તાની સરકાર સ્થાનિક જનતાના રોષ અને વિરોધનો સામનો કરવાના બદલે તેમના પર ગોળીઓ વરસાવી રહી છે. વિરોધને કચડી નાખવા માટે સમગ્ર વિસ્તારમાં બ્લેકઆઉટ કરવામાં આવી રહ્યું છે, લોકોને ડરાવવામાં-ધમકાવવામાં આવી રહ્યા છે અને ક્રૂરતાની તમામ હદો પાર કરવામાં આવી રહી છે.
‘કથિત ચૂંટણીઓ સંપૂર્ણપણે એક મજાક છે’
PoKમાં તાજેતરમાં સંપન્ન થયેલી સ્થાનિક ચૂંટણીઓ પર તીખો પ્રહાર કરતા વિદેશ મંત્રાલયે તેને સંપૂર્ણપણે એક ઢોંગ ગણાવ્યો છે. પ્રવક્તાએ કહ્યું કે આ પ્રકારની દેખાડાવાળી ચૂંટણીઓ ત્યાંની વાસ્તવિક અને ભયાનક જમીની હકીકતને ક્યારેય છુપાવી શકે નહીં.
રણધીર જયસ્વાલે સ્પષ્ટપણે કહ્યું, “PoKમાં આ કથિત સ્થાનિક ચૂંટણીઓ સંપૂર્ણપણે એક મજાક છે. સત્ય એ છે કે પાકિસ્તાની સેના સામાન્ય લોકોના શાંતિપૂર્ણ વિરોધ પ્રદર્શનો પર ગોળીઓ ચલાવી રહી છે અને તેમની નિર્દયતાથી હત્યા કરી રહી છે. આવી પોકળ ચૂંટણી પ્રક્રિયાથી પાકિસ્તાન પોતાની ગેરકાયદેસર માન્યતા સાબિત કરી શકતું નથી.”
આંતરરાષ્ટ્રીય સમુદાયને જવાબદાર ઠેરવવાની અપીલ
ભારતે વૈશ્વિક સમુદાય અને આંતરરાષ્ટ્રીય માનવાધિકાર સંસ્થાઓને આ મામલે મૂક દર્શક ન બનવાની અપીલ કરી છે. ભારતનું કહેવું છે કે PoKમાં થઈ રહેલી આ નિર્દય હત્યાઓ અને માનવાધિકારના ભંગ માટે સીધી રીતે ઇસ્લામાબાદની સરકાર જવાબદાર છે.
પ્રવક્તાએ દુનિયાને અરીસો બતાવતા કહ્યું કે માનવાધિકારના જૂઠા અને પાખંડી ઉપદેશો આપનાર પાકિસ્તાનનો અસલી ચહેરો હવે દુનિયા સામે બેનકાબ થવો જોઈએ. આંતરરાષ્ટ્રીય સમુદાયે આગળ આવીને PoKના લોકો પર થઈ રહેલા અત્યાચારો માટે પાકિસ્તાનને જવાબદાર ઠેરવવું જોઈએ.
શા માટે થઈ રહ્યો છે આટલો વિરોધ?
નોંધનીય છે કે પીઓકેમાં ‘જોઈન્ટ આવામી એક્શન કમિટી’ (JAAC) ના નેતૃત્વમાં મોટા પાયે વિરોધ પ્રદર્શનો ચાલી રહ્યા છે. ગયા મહિને રાવલકોટથી મુઝફ્ફરાબાદ સુધીના વિસ્તારોમાં ફેલાયેલા આ પ્રદર્શનો દરમિયાન – પાકિસ્તાની સુરક્ષા દળોએ અતિશય બળપ્રયોગ કર્યો હતો. સૂત્રોના જણાવ્યા અનુસાર, આ હિંસક અથડામણોમાં મોટી સંખ્યામાં લોકો માર્યા ગયા હતા, અને ડઝનબંધ વિરોધીઓ અને વિદ્યાર્થી નેતાઓ ઘાયલ થયા હતા. પોલીસે ઘણા યુવા નેતાઓને બળજબરીથી અટકાયતમાં પણ લીધા છે.
માનવાધિકાર સંસ્થાઓની પણ વધી ચિંતા
માત્ર ભારત જ નહીં, વિવિધ વૈશ્વિક માનવ અધિકાર અને પ્રેસ સ્વતંત્રતા સંગઠનો – જેમ કે એમ્નેસ્ટી ઇન્ટરનેશનલ અને ‘કમિટી ટુ પ્રોટેક્ટ જર્નાલિસ્ટ્સ’ (CPJ એશિયા) – એ પણ પીઓકેની પરિસ્થિતિ પર ઊંડી ચિંતા વ્યક્ત કરી છે. પત્રકારોના બળજબરીથી ગુમ થવા, મીડિયા આઉટલેટ્સ પર પ્રતિબંધો અને વારંવાર ઇન્ટરનેટ બંધ થવા જેવી ઘટનાઓએ આંતરરાષ્ટ્રીય મંચ પર પાકિસ્તાનના વર્તનને ઉજાગર કર્યું છે. ભારતે પુનરોચ્ચાર કર્યો છે કે જ્યાં સુધી પાકિસ્તાન સરહદ પારના આતંકવાદ અને તેના પોતાના નાગરિ
