‘ચિંતાજનક ઉદાસીનતા’: સદી જૂના પંજાબ મંદિરના ધ્વંસ પર ભારતે પાકિસ્તાનની કરી આકરી ટીકા
પાકિસ્તાનના પંજાબ પ્રાંતમાં આવેલા નારોવાલ વિસ્તારના સિરાજ ગામમાં ૧૨૫ વર્ષથી પણ વધુ જૂના ઐતિહાસિક હિન્દુ મંદિરને તોડી પાડવાના અહેવાલો સામે આવ્યા બાદ ભારે વિવાદ સર્જાયો છે. આ ઘટના ૨૧ ઓગસ્ટના રોજ બની હોવાનું સામે આવ્યું છે. ભારતે બુધવારે આ નિંદનીય કૃત્યની સખત શબ્દોમાં નિંદા કરી છે અને પાકિસ્તાન સરકારને આ મામલે ત્વરિત તટસ્થ તપાસ કરીને દોષિતો સામે કડક કાર્યવાહી કરવા હાકલ કરી છે. પાકિસ્તાનમાં લઘુમતી સમુદાયો અને તેમના ધાર્મિક સ્થળો પર થતા અત્યાચાર અને તોડફોડની ઘટનાઓની શ્રેણીમાં આ વધુ એક ગંભીર બનાવ ઉમેરાયો છે.
ભારતીય વિદેશ મંત્રાલયનો સખત વિરોધ અને સ્પષ્ટ સંદેશ
ભારતના વિદેશ મંત્રાલય (MEA) ના પ્રવક્તા રણધીર જયસ્વાલે આ ઘટના અંગે ઊંડી ચિંતા વ્યક્ત કરતા એક નિવેદન જારી કર્યું હતું. તેમણે જણાવ્યું હતું કે, “પાકિસ્તાનના નારોવાલના સિરાજ ગામમાં એક ઐતિહાસિક હિન્દુ મંદિરના ધ્વંસના ચિંતાજનક અહેવાલો પર અમે ઊંડી ચિંતા સાથે નોંધ લીધી છે. સદી જૂના લઘુમતી પૂજા સ્થળ સામે તોડફોડના આ નિંદનીય કૃત્યની અમે સ્પષ્ટપણે નિંદા કરીએ છીએ.”
જયસ્વાલે પાકિસ્તાની સત્તાધીશોની બેદરકારી સામે આકરા પ્રહારો કરતા કહ્યું કે, પાકિસ્તાની અધિકારીઓની સ્પષ્ટ ઉદાસીનતા અને મંદિરનું રક્ષણ કરવામાં નિષ્ફળતા અત્યંત ચિંતાજનક બાબત છે. આવી ઘટનાઓ પાકિસ્તાનમાં લઘુમતી સમુદાયોની સતત નબળાઈ, તેમની ધાર્મિક સ્વતંત્રતા પરના ત્રાપ અને પૂજા સ્થાનોના ગંભીર ઉલ્લંઘનની સ્પષ્ટ યાદ અપાવે છે. ભારતે માંગ કરી છે કે ઇસ્લામાબાદ સરકારે આ અપવિત્ર કરાયેલા મંદિરને પુનઃસ્થાપિત કરવું જોઈએ અને પોતાના લઘુમતી નાગરિકો તેમજ તેમના સાંસ્કૃતિક વારસાની સુરક્ષાની પ્રાથમિક જવાબદારી નિભાવવી જોઈએ.
પાકિસ્તાનમાં મંદિર તોડી પાડવા મુદ્દે વિવાદ અને આક્ષેપો
પાકિસ્તાની સમાચાર પત્ર ‘ધ ડોન’ના અહેવાલ અનુસાર, નારોવાલમાં મંદિર તોડી પાડવાની આ ઘટનાથી પાકિસ્તાનની અંદર પણ ભારે વિવાદ અને આક્રોશ ઊભો થયો છે. લઘુમતી અધિકારો માટે કામ કરતી સંસ્થા ‘પાકિસ્તાન મસીહા મિલ્લત પાર્ટી’ (PMMP) એ આક્ષેપ કર્યો છે કે નજીકમાં આવેલી એક મદરેસાના વિસ્તરણ માટે આ ઐતિહાસિક માળખાને જાણીજોઈને તોડી પાડવામાં આવ્યું હતું. ૨૧ ઓગસ્ટના રોજ બનેલી આ ઘટનામાં લોકોના એક જૂથે મંદિરનું માળખું તોડી પાડ્યું હતું અને તેની ઇંટો, ગુંબજમાંથી ધાતુના ફિટિંગ્સ તથા અન્ય સામગ્રી ચોરી લીધી હતી. PMMP એ આ કાયરતાપૂર્ણ કૃત્યમાં સામેલ લોકો સામે આકરી કાર્યવાહી કરવા માટે સ્થાનિક અધિકારીઓનો સંપર્ક કર્યો છે.
સ્થાનિક બોર્ડનો દાવો અને લઘુમતીઓની સુરક્ષા પર સવાલો
બીજી તરફ, પાકિસ્તાનના ‘ઈવેક્યુ ટ્રસ્ટ પ્રોપર્ટી બોર્ડ’ (ETPB) એ આ ગંભીર આરોપોને નકારતા એવો દાવો કર્યો હતો કે ભારે વરસાદ અને કટાઈના કારણે મંદિરનું માળખું કુદરતી રીતે તૂટી પડ્યું હતું. પરંતુ લઘુમતી જૂથો આ દાવાને ફગાવી રહ્યા છે અને તેને ષડયંત્ર ગણાવી રહ્યા છે.
Official Spokesperson’s response to media queries regarding reported demolition of a century-old Hindu temple in Pakistan
🔗 https://t.co/jPd7WzGdUD pic.twitter.com/iFn4ElXT2m
— Randhir Jaiswal (@MEAIndia) September 2, 2026
૧૨૫ વર્ષથી વધુ જૂનું આ મંદિર નારોવાલ ક્ષેત્રના ઐતિહાસિક વારસા સમાન હતું. પાકિસ્તાનમાં અવારનવાર હિન્દુ અને અન્ય લઘુમતી સમુદાયોના મઠો, મંદિરો અને ધાર્મિક સ્થળો પર થતા આક્રમણો અને કબ્જાની ઘટનાઓ આંતરરાષ્ટ્રીય સ્તરે ચર્ચાનો વિષય બને છે. ભારતે આ મુદ્દાને આંતરરાષ્ટ્રીય મંચ પર સતત ઉઠાવ્યો છે અને પાકિસ્તાનને પોતાના બંધારણીય અને માનવતાવાદી દાયિત્વોનું પાલન કરવા ફરી એકવાર યાદ અપાવ્યું છે.
