પીએમ મોદીએ મૂક્યો ‘સ્ટાર્ટઅપ ઇનોવેશન ફંડ’નો પ્રસ્તાવ, કહ્યું- ‘સૌને સાથે લઈને આગળ વધવા પર જ ખરી પ્રગતિ’
રાજધાની નવી દિલ્હીના ભવ્ય ભારત મંડપમ ખાતે આયોજિત ૧૮મા બ્રિક્સ (BRICS) સમિટ ૨૦૨૬ નો બીજો અને અંતિમ દિવસ વૈશ્વિક આર્થિક સહયોગ, નવોન્મેશ (ઈનોવેશન) અને પર્યાવરણીય સંતુલનના ક્ષેત્રે અત્યંત નિર્ણાયક સાબિત થયો છે. બે દિવસીય શિખર સંમેલનના પહેલા દિવસે તમામ સભ્ય દેશોની સર્વસંમતિથી ઐતિહાસિક ‘નવી દિલ્હી ઘોષણાપત્ર ૨૦૨૬’ જાહેર કરવામાં આવ્યું હતું. પરિષદના બીજા દિવસે વિવિધ દેશોના વડાઓ અને આંતરરાષ્ટ્રીય સંગઠનોના પ્રમુખો ભારત મંડપમ પહોંચ્યા હતા, જ્યાં ખુલ્લી બેઠકમાં ગ્લોબલ સાઉથના ભવિષ્ય અંગે વિસ્તૃત ચર્ચા થઈ હતી.
અંતિમ દિવસે સંયુક્ત રાષ્ટ્ર (UN) ના મહાસચિવ એન્ટોનિયો ગુટેરેસ, દક્ષિણ આફ્રિકાના રાષ્ટ્રપતિ સિરિલ રામાફોસા, ફિલિપાઇન્સના રાષ્ટ્રપતિ ફર્ડિનાન્ડ આર. માર્કોસ જુનિયર તેમજ વિયેતનામના વડા પ્રધાન લે મિન્હ હુંગ સહિતના વૈશ્વિક નેતાઓ ભારત મંડપમ ખાતે ઉપસ્થિત રહ્યા હતા. વડાપ્રધાન નરેન્દ્ર મોદીએ તમામ મહેમાનોનું ઉષ્માભર્યું સ્વાગત કર્યું હતું.
દ્વિપક્ષીય વાટાઘાટો અને રાજદ્વારી શાંતિનો સંદેશ
સમિટના ભાગરૂપે વડાપ્રધાન નરેન્દ્ર મોદીએ ઈરાનના રાષ્ટ્રપતિ મસૂદ પેઝેશ્કિયાન અને રશિયાના રાષ્ટ્રપતિ વ્લાદિમીર પુતિન સાથે ઉચ્ચ સ્તરીય દ્વિપક્ષીય બેઠકો યોજી હતી. પશ્ચિમ એશિયાની વર્તમાન પરિસ્થિતિ અને કાળા સમુદ્ર ક્ષેત્રની ચિંતાઓ પર ચર્ચા કરતા પીએમ મોદીએ સ્પષ્ટ શબ્દોમાં પુનરોચ્ચાર કર્યો હતો કે, કોઈપણ વિવાદ કે સંઘર્ષનો ઉકેલ યુદ્ધથી નહીં પરંતુ કેવળ વાતચીત અને રાજદ્વારી (ડિપ્લોમસી) દ્વારા જ શક્ય છે. ભારત વૈશ્વિક શાંતિના તમામ પ્રયાસોમાં સક્રિય યોગદાન આપવા હંમેશા તૈયાર છે. રશિયા સાથે ભારતમાં આયોજિત પ્રથમ ‘ઈનોપ્રોમ ઈન્ડિયા’ ઔદ્યોગિક પ્રદર્શન અંગે વાત કરતા બંને દેશો વચ્ચે વેપાર અને ટેકનોલોજી સહયોગ વધારવા પર પણ સંમતિ સાધવામાં આવી હતી.
ગ્લોબલ સાઉથનો અવાજ અને બ્રિક્સની તાકાત
બ્રિક્સ સમિટના બીજા દિવસે ખુલ્લી બેઠકને સંબોધિત કરતા પીએમ મોદીએ જણાવ્યું હતું કે, “ગ્લોબલ સાઉથના દેશોનો બ્રિક્સ પરનો વિશ્વાસ સતત વધી રહ્યો છે. તેનું મુખ્ય કારણ એ છે કે અહીં દરેક દેશનો અવાજ સાંભળવામાં આવે છે, તેમના અનુભવોનું સન્માન કરાય છે અને સમાધાન શોધવા માટે મળીને કામ થાય છે.” પીએમ મોદીએ વધુમાં ઉમેર્યું કે, “આપણી વિવિધતા જ આપણી ઓળખ છે અને આપણો પરસ્પર સહયોગ જ આપણી સાચી પ્રેરણા છે. ભલે આપણી પૃષ્ઠભૂમિ અલગ હોય, પરંતુ આપણી પ્રગતિનો લાભ સમગ્ર માનવતાને મળવો જોઈએ.”
‘બ્રિક્સ સ્ટાર્ટઅપ ઇનોવેશન ફંડ’નો પ્રસ્તાવ અને ડિજિટલ કૃષિ
નવીનતા અને ટેકનોલોજીના ક્ષેત્રે બ્રિક્સ દેશોને અગ્રેસર બનાવવા માટે પીએમ મોદીએ ‘બ્રિક્સ સ્ટાર્ટઅપ ઇનોવેશન ફંડ’ સ્થાપવાનો મહત્ત્વપૂર્ણ પ્રસ્તાવ મૂક્યો હતો. આ ફંડ દ્વારા સભ્ય દેશોના યુવા ઉદ્યોગસાહસિકો અને ઇન્ક્યુબેટર્સને વૈશ્વિક સ્તરે જોડી શકાશે.
આ ઉપરાંત, તેમણે ડિજિટલ એગ્રીકલ્ચર પર વિશેષ ભાર મૂકતા જણાવ્યું કે આર્ટિફિશિયલ ઇન્ટેલિજન્સ (AI), જિયો-સ્પેશિયલ ટેકનોલોજી અને ડિજિટલ પબ્લિક ઇન્ફ્રાસ્ટ્રક્ચરને ખેડૂતોની મૂળભૂત જરૂરિયાતો સાથે જોડવામાં આવશે. ટેકનોલોજી કે મહત્વપૂર્ણ ખનિજોનું શસ્ત્રીકરણ (વૈશ્વિક અસમાનતા) આપણી પ્રગતિને રોકી શકે છે, તેથી ભારત દરેક દેશને ટેકનોલોજીમાં સાથે રાખીને ચાલવાના પક્ષમાં છે.
પર્યાવરણ અને સ્માર્ટ એનર્જીનો મંત્ર
ભારતીય સંસ્કૃતિમાં પ્રકૃતિને માતાનો દરજ્જો આપવાનો ઉલ્લેખ કરતાં વડાપ્રધાને કલ્યાણકારી વિકાસ અને પર્યાવરણ રક્ષણને એકબીજાના પૂરક ગણાવ્યા હતા. તેમણે સ્વચ્છ ઊર્જા માટે ‘બ્રિક્સ ડિજિટલ સેન્ટર ઓફ એક્સેલન્સ’ ની સ્થાપના કરવાનો ઉલ્લેખ કર્યો, જે સ્માર્ટ ગ્રીડ અને ઊર્જા સંગ્રહ ક્ષેત્રે નવી ક્રાંતિ લાવશે. આ પગલાં આગામી પેઢી પ્રત્યેની આપણી જવાબદારી દર્શાવે છે.
