દેશભરની ૫૨ ટીમો ભાવનગરના સાયન્સ સેન્ટરમાં ૩૬ કલાકના AI રોબોટિક્સ હેકાથોનમાં બતાવશે કમાલ
ટેકનોલોજી અને નવીનતાના યુગમાં ગુજરાત હવે રોબોટિક્સ અને આર્ટિફિશિયલ ઇન્ટેલિજન્સ (AI) ક્ષેત્રે એક નવો ઇતિહાસ રચવા જઈ રહ્યું છે. ભાવનગર ખાતે સ્થિત રિજનલ સાયન્સ સેન્ટર (RSC) ખાતે આગામી ૬ થી ૯ ઓક્ટોબર દરમિયાન “AI-Powered Robotics Innovation Challenge” થીમ પર આધારિત 36 કલાકની અતિ-સઘન રોબોટિક્સ ઇનોવેશન હેકાથોનનું ભવ્ય આયોજન કરવામાં આવ્યું છે. ગુજરાત સરકારના વિજ્ઞાન અને ટેકનોલોજી વિભાગ હેઠળ કાર્યરત ગુજરાત કાઉન્સિલ ઓન સાયન્સ એન્ડ ટેકનોલોજી (GUJCOST) દ્વારા આયોજિત આ મહાકુંભમાં દેશભરમાંથી આવેલી ઉત્સાહી ટીમો પોતાના કૌશલ્યનું પ્રદર્શન કરશે.
સ્વદેશી રોબોટિક્સ ક્ષમતાઓને મજબૂત બનાવવાનો અભિનવ અભિગમ
આજના વૈશ્વિક સ્પર્ધાત્મક યુગમાં દેશને ટેકનોલોજીના ક્ષેત્રે આત્મનિર્ભર બનાવવો એ સમયની સૌથી મોટી માંગ છે. ROBOFEST-GUJARAT 6.0 નો મુખ્ય ઉદ્દેશ્ય આપણા યુવા ઇનોવેટરોમાં સ્વદેશી રોબોટિક્સ ક્ષમતાઓને પ્રોત્સાહન આપવાનો અને તેમના મૌલિક વિચારોને સ્વાયત્ત અને વૈશ્વિક સ્તરે સ્પર્ધાત્મક સોલ્યુશન્સમાં રૂપાંતરિત કરવાનો છે. પ્રધાનમંત્રી નરેન્દ્ર મોદીના વિઝન અને માર્ગદર્શન હેઠળ દેશમાં આર્ટિફિશિયલ ઇન્ટેલિજન્સ અને રોબોટિક્સ ક્ષેત્રે નવી ક્રાંતિ આવી છે.
આ સંદર્ભમાં, વિજ્ઞાન અને ટેકનોલોજી મંત્રી અર્જુન મોઢવાડિયાએ જણાવ્યું છે કે મુખ્યમંત્રી ભૂપેન્દ્ર પટેલના કુશળ માર્ગદર્શન હેઠળ ગુજરાત દેશનો સૌથી મોટો રોબોટિક્સ ફેસ્ટિવલ યોજી રહ્યો છે, જેનો મુખ્ય હેતુ સમાજના વાસ્તવિક પડકારો સામે ટેકનોલોજી આધારિત સચોટ ઉકેલો શોધવાનો છે.
દેશભરમાંથી મળેલો અભૂતપૂર્વ પ્રતિસાદ અને ભવ્ય સ્પર્ધા
આ હેકાથોનને લઈને દેશભરના યુવા ટેકીઓમાં ભારે ઉત્સાહ જોવા મળ્યો છે. GUJCOST ના ડિરેક્ટર જનરલ દિગ્વિજયસિંહ જાડેજાની માહિતી મુજબ, આ સ્પર્ધા માટે શરૂઆતના આઇડિયેશન તબક્કામાં દેશભરમાંથી આશ્ચર્યજનક રીતે 480 ટીમોએ નોંધણી કરાવવી હતી. પ્રાથમિક ચકાસણી અને મૂલ્યાંકન બાદ 100 થી વધુ ઉત્કૃષ્ટ વિચારોમાંથી અંતે 52 તેજસ્વી ટીમોની પસંદગી કરવામાં આવી છે.
આ 52 ટીમોમાં માત્ર ગુજરાતના જ 9 જુદા-જુદા જિલ્લાઓની 37 ટીમો સામેલ નથી, પરંતુ મહારાષ્ટ્ર, પંજાબ, મધ્યપ્રદેશ, છત્તીસગઢ, કર્ણાટક અને પશ્ચિમ બંગાળ જેવા અન્ય 6 રાજ્યોની 15 પ્રતિભાશાળી ટીમો પણ પોતાની પ્રતિભા દેખાડવા ભાવનગર આવી રહી છે.
36 કલાકની સઘન મથામણ અને વાસ્તવિક જીવનના પડકારોના ઉકેલ
ભાવનગરના સાયન્સ સેન્ટર ખાતે યોજાનાર આ 36 કલાકનો હેકાથોન માત્ર એક સ્પર્ધા નથી, પરંતુ યુવાનો માટે પોતાની વૈજ્ઞાનિક સૂઝબૂઝ સાબિત કરવાની સુવર્ણ તક છે. આ સઘન સમયગાળા દરમિયાન તમામ ભાગ લેનાર ટીમો વાસ્તવિક જીવનની સમસ્યાઓને હલ કરી શકે તેવા કાર્યક્ષમ ટેકનોલોજી સોલ્યુશન્સ ડિઝાઇન કરશે, તેનું સખત પરીક્ષણ કરશે, તેમાં જરૂરી સુધારા-વધારા કરશે અને અંતે તેનું લાઈવ પ્રદર્શન કરશે.
આ સમગ્ર પ્રક્રિયા દરમિયાન દેશભરના નામાંકિત મેન્ટરો, શિક્ષણવિદો અને ઉદ્યોગ જગતના ટેકનિકલ નિષ્ણાતો વિદ્યાર્થીઓને સતત માર્ગદર્શન પૂરું પાડશે. આ હેકાથોનમાં વિદ્યાર્થીઓની નવીનતા (Innovation), ટેકનિકલ શક્યતા (Technical Feasibility), રોજિંદા જીવનમાં વ્યવહારુ ઉપયોગિતા (Practical Utility) અને વ્યાપક સ્તરે અમલીકરણની ક્ષમતાનું ઝીણવટભર્યું મૂલ્યાંકન કરવામાં આવશે.
સુરક્ષાથી લઈને સમુદ્રના ઊંડાણ સુધીના સ્વાયત્ત રોબોટિક સિસ્ટમ્સના પડકારો
આજની આધુનિક જરૂરિયાતોને ધ્યાનમાં રાખીને સ્પર્ધકોને અત્યંત રોમાંચક અને પડકારજનક વિષયો સોંપવામાં આવ્યા છે. આ હેકાથોનમાં ભાગ લેનાર ટીમોએ સુરક્ષા વ્યવસ્થા, સમુદ્રના અજાણ્યા અને ઊંડાણમાં સંશોધન, રમતગમતમાં અદ્ભુત ચોકસાઈ લાવવા, સ્વાયત્ત ડ્રાઇવિંગ (Autonomous Driving), માનવતાવાદી આપત્તિ વ્યવસ્થાપન કામગીરી અને શૈક્ષણિક હેતુઓ માટે અત્યાધુનિક સ્વાયત્ત રોબોટિક સિસ્ટમ્સ (Autonomous Robotic Systems) વિકસાવવાની રહેશે.
