દેવલા ગ્રામ પંચાયતમાં મૃત સપ્લાયરની સહીથી લાખોની ગેરરીતિ, સરપંચ સસ્પેન્ડ

બીલ બુકના ખોટા ઉપયોગનો ખુલાસો થતાં દેવલા ગામમાં રાજકીય તણાવ

જંબુસર તાલુકાના દેવલા ગામમાં ગામ પંચાયતના દસ્તાવેજોમાં મૃત સપ્લાયરની સહી દેખાતા સમગ્ર પંથકમાં ભારે ચકચાર મચી છે. માલ સપ્લાય કરનાર વ્યક્તિનું વર્ષ 2021માં અવસાન થઈ ચૂક્યું હોવા છતાં બાદના વર્ષોમાં તેમના નામે બીલો રજૂ થયા હતા. આ અંગે જાગૃત નાગરિકે ગંભીર આક્ષેપ કરતા રૂ. 30 લાખથી વધુના કૌભાંડની ચર્ચા ઉઠી છે. આ દાવામાં સત્યના કદમો જણાતા જિલ્લા વિકાસ અધિકારીએ તાત્કાલિક પગલાં લઈને સરપંચને સસ્પેન્ડ કરવાનો આદેશ કર્યો છે.

બીલ બુકનો ખોટો ઉપયોગ કરી લાખોની ગોબાચારી કરવાનો શંકાસ્પદ દાવો

મૃત સપ્લાયર યાકુબભાઈ નવાબનું 2021માં અવસાન થયુ હોવા છતાં 2022માં તેમની બીલ બુકમાંથી સીમેન્ટ, રેતી અને અન્ય સામગ્રીના બીલો રજૂ કરાયા હતા. આરોપ મુજબ આ તમામ બીલો પર નકલી સહી કરી ચૂકવણી મેળવવાનો પ્રયાસ કરાયો હતો. જાગૃત નાગરિકે આ સમગ્ર બાબતને પ્રકાશમાં લાવતા સ્થાનિક સ્તરે ભારે ચર્ચા જાગી છે. આ પ્રકરણ ગામ પંચાયતની કામગીરી અને દસ્તાવેજ વ્યવસ્થામાં ગંભીર ખામી દર્શાવે છે.

જિલ્લા વિકાસ અધિકારીની તપાસમાં પ્રાથમિક ગેરરીતિઓ સામે આવી

ફરિયાદ મળ્યા બાદ જિલ્લાકક્ષાએ તપાસ હાથ ધરાઈ હતી. પ્રાથમિક તપાસમાં ગેરરિતીઓનો સંકેત મળતાં દેવલા ગામ પંચાયતની સરપંચ રેહાનાબાનુ અબ્દુલસમદ પટેલને તાત્કાલિક અસરથી સસ્પેન્ડ કરવામાં આવ્યા છે. સાથે જ પંચાયતનો ચાર્જ ઉપસરપંચને સોંપવાનો આદેશ પણ આપવામાં આવ્યો છે. આ કાર્યવાહી કારણે રાજકીય માહોલ ગરમાયો છે અને ગેરક્રમચારી તત્વોમાં ભયનું વાતાવરણ સર્જાયું છે. સમગ્ર મામલે આગળની તપાસ શરૂ કરી વધુ વિગતો બહાર આવશે તેવી શક્યતા છે.

મુખ્યમંત્રી ભૂપેન્દ્ર પટેલ ભરૂચમાં રૂ. ૧૩૫૦ કરોડથી વધુના ૧૩૯ વિકાસકાર્યોના લોકાર્પણ અને ખાતમુહૂર્ત કરશે

ભરૂચની ચીકી હવે વૈશ્વિક બજારમાં છવાઈ, પરંપરા અને સ્વાદે રચી નવી ઓળખ