સાગબારાના લોકાર્પણ કાર્યક્રમમાં રાજકીય ટકરાવ, એક જ સ્ટેજ પર ચૈતર અને મનસુખ વસાવા આમને-સામને

એકલવ્ય સ્કૂલના લોકાર્પણમાં રાજકારણ ગરમાયું, નેતાઓના નિવેદનો વાયરલ

નર્મદા જિલ્લાના રાજકારણમાં ફરી એકવાર ગરમાવો જોવા મળ્યો છે. સાગબારા તાલુકામાં યોજાયેલા સરકારી લોકાર્પણ કાર્યક્રમમાં AAPના ધારાસભ્ય ચૈતર વસાવા અને BJPના સાંસદ મનસુખ વસાવા એક જ સ્ટેજ પર આમને-સામને આવ્યા હતા. કાર્યક્રમમાં આમંત્રણ ન મળ્યાનો મુદ્દો ઉઠતાં સમગ્ર વાતાવરણ તણાવપૂર્ણ બની ગયું હતું. બંને નેતાઓના ભાષણો બાદ કાર્યક્રમ રાજકીય ચર્ચાનું કેન્દ્ર બન્યો છે.

એકલવ્ય મોડેલ સ્કૂલના લોકાર્પણમાં વિવાદનો આરંભ

સાગબારા તાલુકામાં એકલવ્ય મોડેલ સ્કૂલનું લોકાર્પણ આયોજન કરવામાં આવ્યું હતું. આ સરકારી કાર્યક્રમમાં પ્રોટોકોલ મુજબ સ્થાનિક સાંસદ અને ધારાસભ્યને આમંત્રણ આપવાની જવાબદારી જિલ્લા પ્રશાસનની હોય છે. આ કાર્યક્રમમાં સાંસદ મનસુખ વસાવાને આમંત્રણ અપાયું હતું અને તેઓ મંચ પર હાજર રહ્યા હતા. જોકે ધારાસભ્ય ચૈતર વસાવાનું નામ આમંત્રણ પત્રિકામાં ન હોવાથી વિવાદ ઊભો થયો હતો.

આમંત્રણ વિના પહોંચેલા ધારાસભ્યે વ્યક્ત કરી નારાજગી

આમંત્રણ ન હોવા છતાં ચૈતર વસાવા કાર્યક્રમ સ્થળે પહોંચ્યા હતા અને સ્ટેજ પર જઈ પોતાની નારાજગી વ્યક્ત કરી હતી. તેમણે કલેક્ટર અને હાજર અધિકારીઓને પ્રશ્ન કરતાં કહ્યું કે, વિસ્તારના ધારાસભ્ય હોવા છતાં તેમનું નામ કેમ સમાવાયું નથી. તેમણે સરકારી કાર્યક્રમોમાં ખર્ચના હિસાબ અંગે પણ તીખી ટિપ્પણી કરી હતી. આ ભાષણ દરમિયાન તેમના શબ્દો તીવ્ર બનતાં કાર્યક્રમમાં હોબાળો મચી ગયો હતો.

મંચ પર તણાવ, નેતાઓ અને સમર્થકો વચ્ચે ઘમાસાણ

ચૈતર વસાવાના આક્રમક વક્તવ્ય દરમિયાન સ્ટેજ પર હાજર ભાજપના હોદ્દેદારોએ તેમને ભાષણ બંધ કરવા જણાવ્યું હતું. પરિસ્થિતિ સંભાળવા માટે મંત્રી નરેશ પટેલ પણ આગળ આવ્યા અને ભાષણ ટૂંકાવવાનો સંકેત આપ્યો હતો. તે દરમિયાન ચૈતર વસાવાના સમર્થકોએ સૂત્રોચ્ચાર કરીને વાતાવરણ વધુ ઉગ્ર બનાવ્યું હતું. સમગ્ર ઘટનાનો વીડિયો સોશિયલ મીડિયામાં ઝડપથી ફેલાઈ રહ્યો છે.

મુખ્યમંત્રી ગ્રામોત્થાન યોજના હેઠળ નર્મદા જિલ્લાના ગ્રામ પંચાયતોના આધુનિક વિકાસ માટે ભચરવાડા ખાતે જિલ્લા કક્ષાનો પ્રારંભ

નાંદોદ તાલુકાના વડિયામાં પ્રાકૃતિક ખેતી માટે કૃષિ સખી અને ખેડૂત મિત્રો માટે માર્ગદર્શક તાલીમ શિબિર યોજાઈ

સાંસદનો વળતો પ્રહાર, આગામી દિવસોમાં રાજકારણ ગરમાવાની શક્યતા

વાયરલ વીડિયોમાં જોવા મળે છે કે બાદમાં સાંસદ મનસુખ વસાવાએ મંચ પરથી જવાબ આપતાં કહ્યું કે વિકાસના કામોની વાત કરનારોએ પહેલા પોતાનો હિસાબ આપવો જોઈએ. સમર્થકોના હોબાળા વચ્ચે તેમણે શાંતિ રાખવાની અપીલ કરી અને સ્પષ્ટ શબ્દોમાં પોતાનું વક્તવ્ય પૂરું કર્યું. આ ઘટનાએ નર્મદા અને આસપાસના વિસ્તારોમાં રાજકીય ચર્ચાને વેગ આપ્યો છે. આગામી દિવસોમાં આ મુદ્દે વધુ રાજકારણ ગરમાય તેવી શક્યતા વ્યક્ત કરવામાં આવી રહી છે.