ED વિરુદ્ધ મમતા બેનર્જી: I-PAC રેડ કેસમાં સુપ્રીમ કોર્ટમાં મહત્વની સુનાવણી, મુખ્યમંત્રી પર પુરાવા મટાડવાનો આરોપ
પશ્ચિમ બંગાળના મુખ્યમંત્રી મમતા બેનર્જી અને કેન્દ્ર સરકાર વચ્ચેનો સંઘર્ષ હવે દેશની સર્વોચ્ચ અદાલતના ઉંબરે પહોંચ્યો છે. એન્ફોર્સમેન્ટ ડિરેક્ટોરેટ (ED) એ રાજકીય કન્સલ્ટન્સી ફર્મ I-PAC ની ઓફિસ અને તેના ડાયરેક્ટર પ્રતીક જૈનના નિવાસસ્થાને દરોડા દરમિયાન અવરોધ ઊભો કરવા અને પુરાવા સાથે છેડછાડ કરવાના આરોપસર મુખ્યમંત્રી મમતા બેનર્જી, રાજ્યના ડીજીપી રાજીવ કુમાર અને કોલકાતા પોલીસ કમિશનર વિરુદ્ધ CBI FIR નોંધવા માટે સુપ્રીમ કોર્ટમાં અરજી કરી છે.
દરોડા દરમિયાન હાઈ-વોલ્ટેજ ડ્રામા
આ સમગ્ર વિવાદ 8 જાન્યુઆરીએ શરૂ થયો હતો જ્યારે ED એ કરોડો રૂપિયાના કોલસાની દાણચોરીના કૌભાંડની તપાસના સંબંધમાં સોલ્ટ લેક સ્થિત I-PAC ઓફિસ અને પ્રતીક જૈનના લાઉડન સ્ટ્રીટ સ્થિત નિવાસસ્થાને સર્ચ ઓપરેશન શરૂ કર્યું હતું. ED નો આરોપ છે કે મુખ્યમંત્રી મમતા બેનર્જી કોઈ પણ પૂર્વ સૂચના વગર દરોડાના સ્થળે પહોંચી ગયા હતા અને તપાસ અધિકારીઓને ધમકાવ્યા હતા. તપાસ એજન્સીએ સુપ્રીમ કોર્ટને જણાવ્યું કે મુખ્યમંત્રીએ એક લેપટોપ અને એક ‘ગ્રીન ફોલ્ડર’ સહિત અનેક મહત્વપૂર્ણ ડિજિટલ અને ભૌતિક દસ્તાવેજો જબરદસ્તીથી પોતાના કબજામાં લઈ લીધા હતા, જે આ કૌભાંડના મહત્વના પુરાવા હતા.
કલકત્તા હાઈકોર્ટમાં TMC ને ફટકો
સુપ્રીમ કોર્ટમાં સુનાવણીના થોડા સમય પહેલા જ, કલકત્તા હાઈકોર્ટની જસ્ટિસ સુવ્રા ઘોષની બેન્ચે તૃણમૂલ કોંગ્રેસ (TMC) દ્વારા દાખલ કરવામાં આવેલી અરજીને ફગાવી દીધી હતી, જેમાં દાવો કરવામાં આવ્યો હતો કે ED એ પાર્ટીના ગુપ્ત ચૂંટણી ડેટાને જપ્ત કર્યો છે. સુનાવણી દરમિયાન એડિશનલ સોલિસિટર જનરલ (ASG) એસ.વી. રાજુએ કોર્ટમાં સ્પષ્ટપણે કહ્યું કે, “ED એ કંઈ જ જપ્ત કર્યું નથી, પરંતુ જે કંઈ પણ હતું તે મમતા બેનર્જી ઉઠાવીને લઈ ગયા છે.” કોર્ટે નોંધ્યું કે જ્યારે કંઈ જપ્ત થયું જ નથી તો રક્ષણની જરૂર નથી, અને TMC ની અરજીનો નિકાલ કર્યો હતો.
સુપ્રીમ કોર્ટમાં ED ની દલીલો
ED એ તેની અરજીમાં નીચે મુજબના ગંભીર આરોપો લગાવ્યા છે:
- પુરાવાનો નાશ: મુખ્યમંત્રી અને વરિષ્ઠ પોલીસ અધિકારીઓએ મળીને તપાસને પ્રભાવિત કરવા માટે પુરાવાઓ હટાવ્યા અને તેનો નાશ કર્યો.
- અધિકારીઓને ધમકાવવા: તપાસ સ્થળ પર હાજર કેન્દ્રીય અધિકારીઓને રાજ્ય તંત્રનો ઉપયોગ કરીને ડરાવવામાં અને ધમકાવવામાં આવ્યા.
- કાયદાનું ઉલ્લંઘન: ED એ મુખ્યમંત્રી અને ટોચના પોલીસ અધિકારીઓ પર લૂંટ અને ચોરી સહિત કુલ 17 ગુનાઓનો આરોપ લગાવ્યો છે.
- ન્યાયિક પ્રક્રિયામાં અવરોધ: ED એ દાવો કર્યો કે કલકત્તા હાઈકોર્ટમાં સુનાવણી દરમિયાન સમર્થકો દ્વારા હંગામો કરીને કાર્યવાહીમાં અવરોધ ઉભો કરવામાં આવ્યો હતો જેથી મામલાને ટાળી શકાય.
શું છે I-PAC અને કોલસા કૌભાંડનો સંબંધ?
પ્રતીક જૈન દ્વારા સહ-સ્થાપિત I-PAC એ 2021 ની બંગાળ વિધાનસભા ચૂંટણીમાં TMC ની જીતમાં મહત્વની ભૂમિકા ભજવી હતી. ED નો આરોપ છે કે ગેરકાયદેસર કોલસા ખનનમાંથી મેળવેલા અંદાજે 10 કરોડ રૂપિયા હવાલા ચેનલો દ્વારા I-PAC ને ચૂંટણી સેવાઓના પેમેન્ટ તરીકે મોકલવામાં આવ્યા હતા. એજન્સીનું કહેવું છે કે આ જ નાણાકીય વ્યવહારના પુરાવા શોધવા માટે આ દરોડા પાડવામાં આવ્યા હતા.
રાજકીય પ્રતિક્રિયા
મુખ્યમંત્રી મમતા બેનર્જીએ આ આરોપોને સદંતર ફગાવી દેતા તેને ‘રાજકીય વેરઝેર’ ગણાવ્યું છે. તેમણે આરોપ લગાવ્યો કે કેન્દ્ર સરકાર ચૂંટણી પહેલા તેમની પાર્ટીની ચૂંટણી વ્યૂહરચનાઓ અને ગુપ્ત દસ્તાવેજો સુધી પહોંચવા માટે કેન્દ્રીય એજન્સીઓનો દુરુપયોગ કરી રહી છે.
હવે તમામની નજર સુપ્રીમ કોર્ટના જસ્ટિસ પી.કે. મિશ્રા અને જસ્ટિસ વિપુલ પંચોલીની બેન્ચ પર ટકેલી છે, જે નક્કી કરશે કે શું આ કેસની તપાસ CBI ને સોંપવી જોઈએ અને શું વર્તમાન મુખ્યમંત્રી વિરુદ્ધ FIR નોંધવાના નિર્દેશો આપી શકાય.
