મોટી છટણી: અડીડાસે ભારતમાં 50% સ્ટાફ ખાલી કર્યો, જાણો કયા એન્જિનિયર્સની નોકરી ગઈ!
વૈશ્વિક સ્તરે આર્થિક સુસ્તી અને કંપનીઓ દ્વારા ખર્ચ ઘટાડવાની ચાલતી કવાયત વચ્ચે હવે વધુ એક મોટી સ્પોર્ટ્સવેર બ્રાન્ડનું નામ છટણી કરનારી કંપનીઓની યાદીમાં જોડાઈ ગયું છે. વિશ્વપ્રસિદ્ધ સ્પોર્ટ્સ બ્રાન્ડ અડીડાસે (Adidas) પોતાના ટેકનોલોજી વિભાગમાંથી મોટા પાયે કર્મચારીઓને છૂટા કરવાની જાહેરાત કરી છે. પ્રાપ્ત અહેવાલો મુજબ, કંપની પોતાના ગુરુગ્રામ સ્થિત ગ્લોબલ ટેકનોલોજી હબમાંથી આશરે 50 ટકા જેટલા સ્ટાફની છટણી કરવા જઈ રહી છે.
ગુરુગ્રામ સેન્ટર પર સૌથી મોટો ફટકો
‘Wocult’ ના અહેવાલ મુજબ, આ નિર્ણયથી લગભગ 350 કે તેથી વધુ ટેકનોલોજી કર્મચારીઓ સીધા પ્રભાવિત થશે. અડીડાસના હરિયાણાના ગુરુગ્રામ સ્થિત આઇટી અને ટેક સેન્ટરમાં કુલ 700 જેટલા કર્મચારીઓ કાર્યરત હતા. તેમાંથી આશરે 45 થી 50 ટકા સ્ટાફને ગુલાબી કાપલી (Pink Slip) આપી દેવામાં આવી છે.
કંપનીએ એક સત્તાવાર ટાઉન હોલ મીટિંગ દરમિયાન આ દુઃખદ નિર્ણયની જાણકારી કર્મચારીઓને આપી હતી. અચાનક લેવાયેલા આ નિર્ણયથી આઇટી ક્ષેત્રના પ્રોફેશનલ્સમાં ભારે અસંતોષ અને ચિંતાનો માહોલ જોવા મળી રહ્યો છે.
કયા હોદ્દા પર કામ કરતા પ્રોફેશનલ્સ પર પડી અસર?
આ છટણીમાં ટેકનોલોજી અને ડેટા સાયન્સ વિભાગ સાથે જોડાયેલા ઉચ્ચ લાયકાત ધરાવતા કર્મચારીઓને ટાર્ગેટ કરવામાં આવ્યા છે.
સોફ્ટવેર એન્જિનિયર્સ: મુખ્ય કોડિંગ અને પ્રોડક્ટ ડેવલપમેન્ટ સાથે જોડાયેલા એન્જિનિયર્સ.
ડેટા સાયન્ટિસ્ટ: બિઝનેસ એનાલિટિક્સ અને એઆઈ મોડલિંગનું કામ સંભાળતા વરિષ્ઠ નિષ્ણાતો.
ડેટા એન્જિનિયર્સ: ડેટા આર્કિટેક્ચર અને મેનેજમેન્ટની જવાબદારી સંભાળતા કર્મચારીઓ.
જોકે, અડીડાસે કર્મચારીઓની સંખ્યા ઘટાડવાની વાત સ્વીકારી છે, પરંતુ ચોક્કસ કેટલા લોકોની નોકરી જશે તેનો સત્તાવાર આંકડો જાહેર કરવાનું ટાળ્યું છે.
કંપનીએ છટણી પાછળ શું કારણ આપ્યું?
કંપનીના પ્રવક્તા અને મેનેજમેન્ટના જણાવ્યા અનુસાર, આ ફેરફારો વ્યવસાયની બદલાતી જરૂરિયાતો અને કંપનીના કામકાજને વધુ સરળ બનાવવાના હેતુથી કરવામાં આવ્યા છે.
કંપનીનું કહેવું છે કે આ છટણીનો મુખ્ય ઉદ્દેશ્ય ઓર્ગેનાઇઝેશન માળખાને સુવ્યવસ્થિત કરવાનો, બિનજરૂરી ખર્ચ ઘટાડવાનો અને ભવિષ્યના લાંબા ગાળાના વિકાસ માટે કંપનીને સક્ષમ બનાવવાનો છે. ગ્લોબલ લેવલે ટેકનોલોજી રિસોર્સિસના ફરીથી સેટઅપ માટે આ પગલું ભરવું જરૂરી હતું.
પ્રભાવિત કર્મચારીઓ માટે શું જોગવાઈ કરાઈ?
અહેવાલો મુજબ, નોકરી ગુમાવનારા કર્મચારીઓને બે અલગ-અલગ જૂથોમાં વહેંચવામાં આવ્યા છે:
પ્રથમ જૂથ: આ જૂથમાં સમાવિષ્ટ કર્મચારીઓને ટાઉન હોલ મીટિંગના દિવસે જ એટલે કે 15 સપ્ટેમ્બરના રોજ નોકરીમાંથી મુક્તિનું સત્તાવાર પત્ર (Exit Letter) આપી દેવામાં આવ્યું છે.
બીજું જૂથ: બીજા જૂથના કર્મચારીઓ માટે 15 ડિસેમ્બર સુધી કામ કરવાની જોગવાઈ રાખવામાં આવી છે. આ સમયગાળા દરમિયાન તેમણે પોતાનું કામ અડીડાસના અન્ય ગ્લોબલ ટેક હબમાં કામ કરતા કર્મચારીઓને હેન્ડઓવર (Handover) કરવાનું રહેશે.
આ ઉપરાંત, બીજા જૂથના પ્રોફેશનલ્સને અડીડાસની અંદર જ અન્ય કોઈ જગ્યાએ ખાલી હોદ્દા પર અરજી કરવા માટે નિશ્ચિત સમય આપવામાં આવ્યો છે, જેથી તેઓ આંતરિક રીતે નવી તક શોધી શકે.
આઇટી સેક્ટરમાં છેલ્લા કેટલાક સમયથી ચાલતી છટણીની લહેર હવે રિટેલ અને સ્પોર્ટ્સવેર બ્રાન્ડ્સના ટેક ડિવિઝન સુધી પહોંચી ગઈ છે, જે ભારતીય ટેક પ્રોફેશનલ્સ માટે મુશ્કેલ સમય તરફ ઈશારો કરે છે.
